ਕੁੱਲੀ, ਗੁੱਲੀ ਤੇ ਜੁੱਲੀ ਤੋਂ ਵੀ ਮੁਥਾਜ ਹੈ ਬਚਨ ਕੌਰ ਦਾ ਪਰਿਵਾਰ

ਹਲਕੇ ਦੇ ਪਿੰਡ ਕਾਵਾਂ ਵਾਲਾ ਵਿੱਚ ਬਿਰਧ ਬਚਨ ਕੌਰ ਦਾ ਪਰਿਵਾਰ ਗ਼ੁਰਬਤ ਦਾ ਜੀਵਨ ਹੰਢਾ ਰਿਹਾ ਹੈ। ਪਰਿਵਾਰ ਦੇ ਨਸੀਬ ਹਨੇਰੇ ’ਚ ਗੁਆਚ ਗਏ ਲੱਗਦੇ ਹਨ। ਦੇਸ਼ ਦੀ ਆਜ਼ਾਦੀ ਸਮੇਂ ਕੁੱਲੀ, ਗੁੱਲੀ ਅਤੇ ਜੁੱਲੀ ਦਾ ਲੱਗਿਆ ਨਾਅਰਾ ਇਸ ਪਰਿਵਾਰ ਦਾ ਜੀਵਨ ਪੱਧਰ ਉੱਚਾ ਨਹੀਂ ਚੁੱਕ ਸਕਿਆ ਹੈ। ਲੰਘੇ 30 ਵਰ੍ਹਿਆਂ ਤੋਂ ਮਾਤਾ ਬਚਨ ਕੌਰ ਪਿੰਡ ਤੋਂ ਬਾਹਰ ਪੰਚਾਇਤ ਦੇ ਇੱਕ ਜ਼ਮੀਨੀ ਟੁੱਕੜੇ ਵਿੱਚ ਆਪਣਾ ਜੀਵਨ ਨਿਰਬਾਹ ਕਰ ਰਹੀ ਹੈ। ਉਸ ਦੇ ਪਰਿਵਾਰ ਵਿੱਚ ਇਸ ਵੇਲੇ ਦੋ ਪੁੱਤਰਾਂ ਸਣੇ ਕੁੱਲ ਦਸ ਜੀਅ ਹਨ।

ਉਨ੍ਹਾਂ ਦਾ ਮਿੱਟੀ ਨਾਲ ਬਣਾਇਆ ਕੱਚਾ ਘਰ ਹੌਲੀ-ਹੌਲੀ ਖੁਰਕੇ ਖੰਡਰ ਬਣ ਗਿਆ ਅਤੇ ਹੁਣ ਪਰਿਵਾਰ ਤਰਪਾਲਾਂ ਦੇ ਬਣਾਏ ਤੰਬੂ ਨੁਮਾ ਘਰ ਵਿੱਚ ਰਹਿ ਰਿਹਾ ਹੈ। ਪਰਿਵਾਰ ਬਿਜਲੀ ਅਤੇ ਸਵੱਛ ਪਾਣੀ ਤੋਂ ਪੂਰੀ ਤਰ੍ਹਾਂ ਵਿਹੂਣਾ ਹੈ। ਸਰਕਾਰੀ ਸਹੂਲਤਾਂ ਨੇ ਹਾਲੇ ਇਸ ਪਰਿਵਾਰ ਦੇ ਦਰ ਉੱਤੇ ਦਸਤਕ ਨਹੀਂ ਦਿੱਤੀ। ਦਿਨ ਭਰ ਮਿਹਨਤ ਮਜ਼ਦੂਰੀ ਕਰ ਕੇ ਪਰਿਵਾਰ ਦਾ ਪਾਲਣ ਪੋਸ਼ਣ ਮੁਸ਼ਕਲ ਨਾਲ ਹੋ ਪਾ ਰਿਹਾ ਹੈ। ਮਾਤਾ ਬਚਨ ਕੌਰ ਨੂੰ ਝੋਰਾ ਹੈ ਕਿ ਪਿੰਡ ਦੀ ਪੰਚਾਇਤ ਤੋਂ ਲੈ ਕੇ ਕਿਸੇ ਮੰਤਰੀ ਤੇ ਸੰਤਰੀ ਨੇ ਉਨ੍ਹਾਂ ਦਾ ਦੁੱਖ ਨਹੀਂ ਜਾਣਿਆ ਹੈ। ਪੰਚਾਇਤ ਪਰਿਵਾਰ ਤੋਂ ਆਪਣੀ ਜਗ੍ਹਾਂ ਦੇ ਟੁਕੜੇ ਦਾ ਸਾਲਾਨਾ ਸੱਤ ਹਜ਼ਾਰ ਰੁਪਏ ਮਾਲੀਆ ਵੀ ਵਸੂਲ ਰਿਹਾ ਹੈ। ਮਾਤਾ ਦੇ ਦੋ ਪੋਤਰੇ ਕਈ ਕੋਹਾਂ ਦਾ ਪੈਦਲ ਸਫ਼ਰ ਤੈਅ ਕਰਕੇ ਕਮਾਲਕੇ ਸਰਕਾਰੀ ਸਕੂਲ ਪੜ੍ਹਨ ਜਾਂਦੇ ਹਨ। ਬੱਚਿਆਂ ਨੂੰ ਪੜ੍ਹਾਈ ਦਾ ਸ਼ੌਕ ਹੈ ਪਰ ਪਰਿਵਾਰ ਦੀ ਆਰਥਿਕਤਾ ਅੜਿੱਕਾ ਬਣਦੀ ਦਿਖਾਈ ਦੇ ਰਹੀ ਹੈ। ਬੱਚਿਆਂ ਦਾ ਸੁਪਨਾ ਪੜ੍ਹ ਲਿਖ ਕੇ ਫੌਜ ਜਾਂ ਪੁਲੀਸ ਵਿੱਚ ਭਰਤੀ ਹੋ ਕੇ ਦੇਸ਼ ਸੇਵਾ ਕਰਨ ਦਾ ਹੈ।