ਬਾਬਾ ਫ਼ਰੀਦ ਯੂਨੀਵਰਸਿਟੀ ਵੱਲੋਂ ਭਾਰਤੀ ਫੌਜ ਦੀ ਵੈਸਟਰਨ ਕਮਾਂਡ ਨਾਲ ਸਮਝੌਤਾ

ਬਾਬਾ ਫਰੀਦ ਯੂਨੀਵਰਸਿਟੀ ਆਫ਼ ਹੈਲਥ ਸਾਇੰਸਜ਼ ਵੱਲੋਂ ਵਾਈਸ ਚਾਂਸਲਰ ਪ੍ਰੋਫੈਸਰ ਡਾ. ਰਾਜੀਵ ਸੂਦ ਦੀ ਅਗਵਾਈ ਹੇਠ, ਅੱਜ ਹੈੱਡਕੁਆਰਟਰ ਵੈਸਟਰਨ ਕਮਾਂਡ, ਭਾਰਤੀ ਫੌਜ ਨਾਲ ਮੌਜੂਦਾ ਐੱਮਓਯੂ ਤਹਿਤ ਇੱਕ ਮੈਮੋਰੰਡਮ ਸਾਇਨ ਕੀਤਾ ਗਿਆ।

ਪੰਜਾਬ ਦੇਸ਼ ਦਾ ਪਹਿਲਾ ਰਾਜ ਬਣਨ ਜਾ ਰਿਹਾ ਹੈ ਜਿੱਥੇ ਅਗਨੀਵੀਰਾਂ ਲਈ ਸੰਰਚਿਤ ਹੈਲਥਕੇਅਰ ਸਕਿੱਲ ਟ੍ਰੇਨਿੰਗ ਸ਼ੁਰੂ ਕੀਤੀ ਜਾਵੇਗੀ। ਇਸ ਮੁਹਿੰਮ ਦੀ ਅਗਵਾਈ ਬਾਬਾ ਫ਼ਰੀਦ ਯੂਨੀਵਰਸਿਟੀ ਵੱਲੋਂ ਰਾਜ ਦੇ ਕਈ ਕੇਂਦਰਾਂ ਰਾਹੀਂ ਕੀਤੀ ਜਾਵੇਗੀ। ਪ੍ਰੋਗਰਾਮ ਦਾ ਉਦੇਸ਼ ਅਗਨੀਵੀਰਾਂ ਨੂੰ ਕੀਮਤੀ ਹੈਲਥਕੇਅਰ ਸਕਿੱਲ ਪ੍ਰਦਾਨ ਕਰਨਾ ਹੈ, ਜਿਸ ਨਾਲ ਉਹ ਸਿਵਲ ਜੀਵਨ ਵਿੱਚ ਸਫਲ ਤਬਦੀਲੀ ਕਰ ਸਕਣ ਅਤੇ ਦੇਸ਼ ਵਿੱਚ ਮੈਡੀਕਲ ਪ੍ਰੋਫ਼ੈਸ਼ਨਲਾਂ ਦੀ ਵੱਧ ਰਹੀ ਲੋੜ ਨੂੰ ਪੂਰਾ ਕੀਤਾ ਜਾ ਸਕੇ। ਨਵੇਂ ਮੈਮੋਰੰਡਮ ਅਨੁਸਾਰ ਸੈਨਿਕ ਕਰਮਚਾਰੀਆਂ ਅਤੇ ਨਾਗਰਿਕਾਂ ਦੋਹਾਂ ਲਈ ਦਾਖਲਾ ਖੋਲ੍ਹਣਾ, ਪੈਰਾਮੈਡੀਕਲ, ਸਿਹਤ-ਸੰਬੰਧੀ ਅਤੇ ਸਹਾਇਕ ਸਕਿੱਲ ਸਰਟੀਫਿਕੇਟ ਪ੍ਰੋਗਰਾਮਾਂ ਦਾ ਵਿਸਥਾਰ, ਮਿਲੀ-ਜੁਲੀ ਅਤੇ ਦੂਰੀ ਸਿੱਖਿਆ ਲਈ ਡਿਜੀਟਲ ਅਤੇ ਈ-ਲਰਨਿੰਗ ਸਰੋਤਾਂ ਦੀ ਤਿਆਰੀ, ਜਾਗਰੂਕਤਾ ਅਤੇ ਦਾਖਲੇ ਵਧਾਉਣ ਲਈ ਆਉਟਰੀਚ ਪ੍ਰੋਗਰਾਮਾਂ ਦਾ ਆਯੋਜਨ ਅਤੇ ਲੋੜ ਅਨੁਸਾਰ “ਟ੍ਰੇਨਿੰਗ ਆਫ਼ ਟ੍ਰੇਨਰਜ਼” ਪ੍ਰੋਗਰਾਮਾਂ ਦੀ ਸ਼ੁਰੂਆਤ ਕੀਤੀ ਜਾਵੇਗੀ। ਮੈਮੋਰੰਡਮ ’ਤੇ ਯੂਨੀਵਰਸਿਟੀ ਵੱਲੋਂ ਰਜਿਸਟਰਾਰ ਅਰਵਿੰਦ ਕੁਮਾਰ ਅਤੇ ਹੈੱਡਕੁਆਰਟਰ ਵੈਸਟਰਨ ਕਮਾਂਡ, ਭਾਰਤੀ ਫੌਜ ਵੱਲੋਂ ਬ੍ਰਿਗੇਡੀਅਰ ਰਾਹੁਲ ਯਾਦਵ ਨੇ ਦਸਤਖ਼ਤ ਕੀਤੇ।