ਚਾਰ ਪਿੰਡਾਂ ਵੱਲੋਂ ਚੋਣਾਂ ਦੇ ਬਾਈਕਾਟ ਦਾ ਐਲਾਨ

ਜ਼ਿਲ੍ਹੇ ਦੇ ਚਾਰ ਪਿੰਡਾਂ ਨੇ ਜ਼ਿਲ੍ਹਾ ਪਰਿਸ਼ਦ ਅਤੇ ਬਲਾਕ ਸਮਿਤੀ ਚੋਣਾਂ ਦਾ ਬਾਈਕਾਟ ਕਰਨ ਦਾ ਐਲਾਨ ਕੀਤਾ ਹੈ। ਇਹ ਚਾਰੇ ਪਿੰਡ ਸੁਜਾਨਪੁਰ ਵਿਧਾਨ ਸਭਾ ਹਲਕੇ ਅੰਦਰ ਪੈਂਦੇ ਹਨ। ਬਾਈਕਾਟ ਦਾ ਕਾਰਨ ਸਿਰਫ਼ ਵਿਕਾਸ ਕਾਰਜਾਂ ਦਾ ਨਾ ਹੋਣਾ ਹੈ। ਸੱਤਾਧਾਰੀ ਸਰਕਾਰਾਂ ਦੀ ਅਣਦੇਖੀ ਤੋਂ ਨਿਰਾਸ਼ ਲੋਕ ਹੁਣ ਸੜਕਾਂ ’ਤੇ ਉਤਰ ਆਏ ਹਨ ਅਤੇ ਚੋਣਾਂ ਦਾ ਬਾਈਕਾਟ ਕਰਨ ਲਈ ਮਜਬੂਰ ਹਨ।

ਅੱਜ ਸੁਜਾਨਪੁਰ ਹਲਕੇ ਅੰਦਰ ਪੈਂਦੇ ਪਿੰਡ ਰਾਣੀਪੁਰ ਝਿਕਲਾਂ ਮੁਹੱਲਾ ਬੈਂਸਾਂ ਦੇ ਵਾਸੀਆਂ ਕੁਲਵੰਤ ਸਿੰਘ, ਸ਼ੇਰ ਸਿੰਘ, ਸੂਬਾ ਸਿੰਘ ਆਦਿ ਨੇ ਕਿਹਾ ਕਿ 20 ਸਾਲਾਂ ਤੋਂ ਕਿਸੇ ਵੀ ਸਰਕਾਰ ਨੇ ਉਨ੍ਹਾਂ ਦੇ ਪਿੰਡ ਦੀ ਟੁੱਟੀ ਸੜਕ ਦੀ ਸਾਰ ਨਹੀਂ ਲਈ। ਇਸ ਕਰਕੇ ਉਹ ਇਨ੍ਹਾਂ ਚੋਣਾਂ ਦਾ ਬਾਈਕਾਟ ਕਰਨਗੇ।

ਇਸੇ ਤਰ੍ਹਾਂ ਧਾਰਕਲਾਂ ਖੇਤਰ ਦੇ ਭੰਗੂੜੀ ਪਿੰਡ ਦੇ ਵਾਸੀਆਂ ਨੇ ‘ਪੁਲ ਨਹੀਂ ਤਾਂ ਪੋਲ ਨਹੀਂ’ ਕਹਿ ਕੇ ਚੋਣਾਂ ਦਾ ਬਾਈਕਾਟ ਕਰਨ ਦਾ ਐਲਾਨ ਕੀਤਾ ਹੈ। ਸਥਾਨਕ ਲੋਕਾਂ ਅਨੁਸਾਰ, ਚੰਡੋਲਾ ਵਿੱਚ ਸਥਾਈ ਸੜਕ ਦਾ ਨਿਰਮਾਣ ਅਤੇ ਕੰਕਰੀਟ ਪੁਲ ਦੀ ਘਾਟ ਪਿਛਲੇ ਸਾਲ ਮੌਨਸੂਨ ਵਿੱਚ ਰੁੜ੍ਹ ਜਾਣ ਨਾਲ ਚਿੰਤਾ ਦਾ ਕਾਰਨ ਬਣੀ ਹੋਈ ਹੈ। ਪੁਲ ਦੀ ਇਸ ਘਾਟ ਨੇ ਨਾ ਸਿਰਫ ਲੋਕਾਂ ਦੀ ਆਵਾਜਾਈ ਵਿੱਚ ਰੁਕਾਵਟ ਪਾਈ ਹੈ ਬਲਕਿ ਰੋਜ਼ਾਨਾ ਜੀਵਨ ਨੂੰ ਵੀ ਬੁਰੀ ਤਰ੍ਹਾਂ ਪ੍ਰਭਾਵਿਤ ਕਰ ਰੱਖਿਆ ਹੈ।

ਇੱਕ ਹੋਰ ਸੜਕ ਸੁਜਾਨਪੁਰ-ਜੁਗਿਆਲ ਵਾਲੀ 25 ਸਾਲਾਂ ਤੋਂ ਨਾ ਬਣਨ ਕਰਕੇ ਮੈਰਾ ਪਿੰਡ ਦੇ ਵਾਸੀਆਂ ਨੇ ਚੋਣਾਂ ਦਾ ਬਾਈਕਾਟ ਕਰਨ ਦਾ ਫੈਸਲਾ ਕੀਤਾ ਹੈ। ਚੌਥਾ ਮਾਮਲਾ ਗੰਦਲਾ ਲਾਹੜੀ-ਛੋਟੇਪੁਰ ਵਾਲੀ ਸੜਕ ਦਾ ਹੈ। ਇਸ ਸੜਕ ਦੇ ਨਿਰਮਾਣ ਵਿੱਚ ਦੇਰੀ ਨੂੰ ਲੈ ਕੇ ਪਿੰਡ ਵਾਸੀਆਂ ਨੇ ਚੋਣਾਂ ਦਾ ਬਾਈਕਾਟ ਕਰਨ ਦਾ ਫੈਸਲਾ ਕੀਤਾ ਹੈ।