ਟਰੱਕ ਨੂੰ ਅੱਗ ਲੱਗੀ, ਡਰਾਈਵਰ ਦੀ ਮੌਤ

ਫਿਰੋਜ਼ਪੁਰ ਰੋਡ ’ਤੇ ਭਾਈਵਾਲਾ ਚੌਕ ਤੋਂ ਪੁਲ ਵੱਲ ਨੂੰ ਜਾਂਦੇ ਹੋਏ ਸ਼ੁੱਕਰਵਾਰ ਦੇਰ ਰਾਤ ਇੱਕ ਟਰੱਕ ਵਿੱਚ ਸੀ ਐੱਨ ਜੀ ਸਿਲੰਡਰ ਫਟ ਗਿਆ ਜਿਸ ਵਿੱਚ ਡਰਾਈਵਰ ਦੀ ਮੌਤ ਹੋ ਗਈ। ਧਮਾਕਾ ਇੰਨਾ ਜ਼ਬਰਦਸਤ ਸੀ ਕਿ ਸ਼ਹਿਰ ਵਾਸੀਆਂ ਨੂੰ ਜਾਪਿਆ ਕਿ ਕੋਈ ਬੰਬ ਫਟਿਆ ਹੈ। ਸੀ ਐੱਨ ਜੀ ਟੈਂਕਰ ਫੱਟਣ ਨਾਲ ਟਰੱਕ ਨੂੰ ਅੱਗ ਲੱਗ ਗਈ ਅਤੇ ਡਰਾਈਵਰ ਆਪਣੇ ਕੈਬਿਨ ਵਿੱਚ ਹੀ ਫਸ ਗਿਆ। ਉਹ ਮਦਦ ਲਈ ਹੱਥ ਹਿਲਾਉਂਦਾ ਰਿਹਾ, ਪਰ ਅੱਗ ਦੀਆਂ ਤੇਜ਼ ਲਪਟਾਂ ਕਾਰਨ ਕਿਸੇ ਦੀ ਅੱਗੇ ਆਉਣ ਦੀ ਹਿੰਮਤ ਨਹੀਂ ਹੋਈ। ਅੱਗ ਬੁਝਾਉਣ ਅਤੇ ਡਰਾਈਵਰ ਨੂੰ ਸਮੇਂ ਸਿਰ ਬਚਾਉਣ ਲਈ ਨੇੜੇ ਕੋਈ ਪਾਣੀ ਨਹੀਂ ਸੀ। ਸੂਚਨਾ ਮਿਲਣ ’ਤੇ ਦੋ-ਤਿੰਨ ਫਾਇਰ ਬ੍ਰਿਗੇਡ ਦੀਆਂ ਗੱਡੀਆਂ ਪਹੁੰਚੀਆਂ। ਉਨ੍ਹਾਂ ਨੇ ਅੱਗ ’ਤੇ ਕਾਬੂ ਪਾਇਆ, ਪਰ ਉਦੋਂ ਤੱਕ ਡਰਾਈਵਰ ਸੜ ਚੁੱਕਾ ਸੀ। ਥਾਣਾ ਡਿਵੀਜ਼ਨ-5 ਪੁਲੀਸ ਸਟੇਸ਼ਨ ਦੀ ਪੁਲੀਸ ਘਟਨਾ ਸਥਾਨ ’ਤੇ ਪਹੁੰਚੀ। ਉਨ੍ਹਾਂ ਲਾਸ਼ ਕਬਜ਼ੇ ਵਿੱਚ ਲੈ ਕੇ ਪੋਸਟਮਾਰਟਮ ਲਈ ਭੇਜ ਦਿੱਤੀ ਹੈ। ਫਾਇਰ ਅਫਸਰ ਰਜਿੰਦਰ ਕੁਮਾਰ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਸ਼ੁੱਕਰਵਾਰ ਰਾਤ 11:30 ਵਜੇ ਘਟਨਾ ਦੀ ਸੂਚਨਾ ਮਿਲੀ ਸੀ। ਟਰੱਕ ਦਵਾਈਆਂ ਦੇ ਪਾਰਸਲਾਂ ਨਾਲ ਭਰਿਆ ਹੋਇਆ ਸੀ, ਜਿਸ ਕਾਰਨ ਅੱਗ ਹੋਰ ਵੀ ਤੇਜ਼ ਹੋ ਗਈ। ਧੂੰਆਂ ਨਾ ਨਿਕਲਣ ਕਾਰਨ ਜਲਦੀ ਅੰਦਰ ਜਾਣਾ ਅਸੰਭਵ ਸੀ। ਡਰਾਈਵਰ ਲਗਪਗ ਅੱਧੇ ਘੰਟੇ ਤੱਕ ਫਸਿਆ ਰਿਹਾ, ਜਿਸ ਕਾਰਨ ਉਸਦੀ ਮੌਤ ਹੋ ਗਈ। ਜਾਂਚ ਅਧਿਕਾਰੀ ਏ ਐੱਸ ਆਈ ਮੇਵਾ ਸਿੰਘ ਨੇ ਦੱਸਿਆ ਕਿ ਮੁੱਢਲੀ ਜਾਂਚ ਤੋਂ ਪਤਾ ਲੱਗਾ ਹੈ ਕਿ ਟਰੱਕ ਮੁੱਖ ਬੋਰਡ ਦੇ ਖੰਭੇ ਨਾਲ ਟਕਰਾ ਗਿਆ ਸੀ। ਇਹ ਟਰੱਕ ਇੱਕ ਸੀ ਐੱਨ ਜੀ ਟਰੱਕ ਸੀ।

ਅੱਧਾ ਘੰਟਾ ਮੰਗਦਾ ਰਿਹਾ ਮਦਦ

ਜਾਣਕਾਰੀ ਮੁਤਾਬਕ ਮਾਲਵਾ ਟਰਾਂਸਪੋਰਟ ਦਾ ਮਾਲ ਫਿਰੋਜ਼ਪੁਰ ਲਈ ਜਾ ਰਿਹਾ ਸੀ। ਮਾਲ ਲੱਦਣ ਮਗਰੋਂ ਡਰਾਈਵਰ ਭੂਸ਼ਣ ਰਵਾਨਾ ਹੋ ਗਿਆ। ਮਾਲ ਨੂੰ ਵੱਖ-ਵੱਖ ਦੁਕਾਨਾਂ ’ਤੇ ਪਹੁੰਚਾਇਆ ਜਾਣਾ ਸੀ। ਸ਼ੁੱਕਰਵਾਰ ਰਾਤ ਲਗਪਗ 11 ਵਜੇ ਜਦੋਂ ਉਹ ਭਾਈਵਾਲਾ ਚੌਕ ਤੋਂ ਨਾਨਕਸਰ ਗੁਰਦੁਆਰਾ ਸਾਹਿਬ ਵੱਲ ਜਾਣ ਵਾਲੇ ਫਲਾਈਓਵਰ ’ਤੇ ਪਹੁੰਚਿਆ ਤਾਂ ਅਚਾਨਕ ਸੀ ਐੱਨ ਜੀ ਵਾਲਾ ਸਿਲੰਡਰ ਫਟ ਗਿਆ, ਜਿਸ ਨਾਲ ਟਰੱਕ ਅੱਗ ਦੀ ਲਪੇਟ ਵਿੱਚ ਆ ਗਿਆ। ਚਸ਼ਮਦੀਦਾਂ ਨੇ ਧਮਾਕੇ ਨੂੰ ਇਸ ਤਰ੍ਹਾਂ ਦੱਸਿਆ ਜਿਵੇਂ ਕੋਈ ਬੰਬ ਡਿੱਗਿਆ ਹੋਵੇ ਜਾਂ ਦੋ ਵਾਹਨਾਂ ਦਰਮਿਆਨ ਭਾਰੀ ਟੱਕਰ ਹੋਈ ਹੋਵੇ। ਜਦੋਂ ਉਹ ਮੌਕੇ ’ਤੇ ਪਹੁੰਚੇ ਤਾਂ ਟਰੱਕ ਅੱਗ ਦੀਆਂ ਲਪਟਾਂ ਵਿੱਚ ਸੀ। ਡਰਾਈਵਰ ਕੈਬਿਨ ਵਿੱਚ ਫਸਿਆ ਹੋਇਆ ਸੀ, ਮਦਦ ਲਈ ਹੱਥ ਹਿਲਾ ਰਿਹਾ ਸੀ। ਧਿਆਨ ਨਾਲ ਜਾਂਚ ਕਰਨ ’ਤੇ ਉਨ੍ਹਾਂ ਦੇਖਿਆ ਕਿ ਡਰਾਈਵਰ ਮੁੱਖ ਸਾਈਨਬੋਰਡ ਥੰਮ ਨਾਲ ਟਕਰਾ ਗਿਆ ਸੀ, ਜਿਸ ਕਾਰਨ ਟਰੱਕ ਦੇ ਅਗਲੇ ਹਿੱਸੇ ਨੂੰ ਅੱਗ ਲੱਗ ਗਈ ਅਤੇ ਕੁਝ ਹੀ ਸੈਕਿੰਡ ਵਿੱਚ ਟਰੱਕ ਪੂਰੀ ਤਰ੍ਹਾਂ ਅੱਗ ਦੀ ਲਪੇਟ ਵਿੱਚ ਆ ਗਿਆ।