ਵੋਟਰ ਕਾਰਡਾਂ ਦੀ ਸੁਧਾਈ ਵਾਲੀ ਐਪ ’ਚ ਗੜਬੜੀ ਕਾਰਨ ਲੋਕ ਪ੍ਰੇਸ਼ਾਨ

ਵੋਟਰ ਕਾਰਡਾਂ ’ਚ ਵਾਰ-ਵਾਰ ਆ ਰਹੀਆਂ ਗਲਤੀਆਂ ਕਾਰਨ ਲੋਕਾਂ ਨੂੰ ਭਾਰੀ ਦਿੱਕਤਾਂ ਆ ਰਹੀਆਂ ਹਨ। ਚੋਣ ਕਮਿਸ਼ਨ ਦੀਆਂ ਹਦਾਇਤਾਂ ’ਤੇ ਚੋਣ ਅਮਲੇ ਵੱਲੋਂ ਵੋਟਾਂ ’ਚ ਸੁਧਾਈ ਦਾ ਕੰਮ ਇੱਕ ਵਾਰ ਸ਼ੁਰੂ ਕੀਤਾ ਗਿਆ ਹੈ। ਪਿੰਡ-ਪਿੰਡ ਕੈਂਪ ਲਗਾ ਕੇ ਬੀਐੱਲਓ ਵੋਟਰ ਕਾਰਡਾਂ ਅਤੇ ਲਿਸਟਾਂ ’ਚ ਸੁਧਾਈ ਕਰ ਰਹੇ ਹਨ। ਪਰ ਸੁਧਾਈ ਉਪਰੰਤ ਨਵੇਂ ਬਣੇ ਪਲਾਸਟਿਕ ਦੇ ਅਧੁਨਿਕ ਵੋਟਰ ਕਾਰਡਾਂ ਵਿੱਚ ਫਿਰ ਵੀ ਅਣਗਿਣਤ ਗਲਤੀਆਂ ਹੁੰਦੀਆਂ ਹਨ। ਅੱਜ ਸਰਕਾਰੀ ਹਾਈ ਸਕੂਲ ਮਲਕ ਵਿੱਚ ਪਿੰਡ ਮਲਕ ਅਤੇ ਜਗਰਾਉਂ ਪੱਤੀ ਮਲਕ ਦੇ ਵੋਟਰਾਂ ਨੂੰ ਵੋਟਰ ਸੂਚੀਆਂ, ਨਵੀਆਂ ਵੋਟਾਂ ਬਣਾਉਣ, ਪਹਿਲਾਂ ਬਣੇ ਵੋਟਰ ਕਾਰਡਾਂ ’ਚ ਸੁਧਾਈ ਲਈ ਸੂਚਿਤ ਕੀਤਾ ਗਿਆ। ਵੋਟਾਂ ’ਚ ਸੁਧਾਈ ਕਰਨ ਲਈ ਪੂਰੀ ਤਿਆਰੀ ਵਿੱਚ ਬੈਠੇ ਅਮਲੇ ਨਾਲ ਜਦੋਂ ਵੋਟਰ ਕਾਰਡਾਂ ’ਚ ਵਾਰ-ਵਾਰ ਗਲਤੀਆਂ ਆਉਣ ਬਾਰੇ ਜਾਣਕਾਰੀ ਲੈਣ ਲਈ ਪੁੱਛਿਆ ਤਾਂ ਉਨ੍ਹਾਂ ਦੱਸਿਆ ਕਿ ਅਸੀਂ ਵੋਟਰ ਸੂਚੀਆਂ ਵਿੱਚ ਗਲਤੀਆਂ ਸੁਧਾਰ ਕੇ ਭੇਜਦੇ ਹਾਂ ਪਰ ਫਿਰ ਵੀ ਕੋਈ ਨਵੀਂ ਗਲਤੀ ਆ ਜਾਂਦੀ ਹੈ।

ਸੋਧ ਦੇ ਬਾਵਜੂਦ ਛਪ ਰਿਹੈ ਗ਼ਲਤ ਡਾਕਘਰ ਦਾ ਪਤਾ 

Advertisement

ਪਿੰਡ ਮਲਕ ਅਤੇ ਜਗਰਾਉਂ ਪੱਤੀ ਮਲਕ ਦਾ ਮੁੱਖ ਡਾਕਘਰ ਪਹਿਲਾਂ ਜਗਰਾਉਂ ਹੁੰਦਾ ਸੀ। ਪਿਛਲੇ ਸਮੇਂ ਵਿੱਚ ਕੇਂਦਰ ਸਰਕਾਰ ਦੇ ਡਾਕ ਵਿਭਾਗ ਵੱਲੋਂ ਕੀਤੀਆਂ ਤਬਦੀਲੀਆਂ ਮਗਰੋਂ ਇਨ੍ਹਾਂ ਪਿੰਡਾਂ ਨੂੰ ਸਿੱਧਵਾਂ ਖੁਰਦ ਡਾਕਘਰ ਨਾਲ ਜੋੜ ਦਿੱਤਾ ਗਿਆ ਪਰ ਵੋਟਰ ਕਾਰਡ ਐਪ ਵਿੱਚ ਡਾਕਘਰ ਦਾ ਨਾਮ ਸ਼ੇਰਪੁਰ ਕਲਾਂ ਹੀ ਛੱਪ ਕੇ ਆ ਰਿਹਾ ਹੈ। ਇਸ ਬਾਰੇ ਸੁਧਾਈ ਦਾ ਕੰਮ ਕਰਨ ਵਾਲੇ ਅਮਲੇ ਨੇ ਕਈ ਵਾਰ ਆਪਣੇ ਉੱਚ ਅਧਿਕਾਰੀਆਂ ਨੂੰ ਜਾਣੂ ਕਰਵਾਇਆ ਹੈ। ਪਰ ਇਸ ਗਲਤੀ ਵਿੱਚ ਸੁਧਾਰ ਨਹੀਂ ਹੋ ਰਿਹਾ।

ਸਮੱਸਿਆ ਬਾਰੇ ਉੱਚ ਅਧਿਕਾਰੀਆਂ ਨੂੰ ਦੱਸਿਆ ਜਾਵੇਗਾ: ਬੀਐੱਲਓ 

ਵੋਟਰ ਕਾਰਡ ਦੀਆਂ ਗਲਤੀਆਂ ਕਾਰਨ ਵੋਟ ਪਾਉਣ ਵੇਲੇ ਅਤੇ ਕਿਤੇ ਪਛਾਣ ਪੱਤਰ ਵੱਜੋਂ ਵਰਤਣ ਸਮੇਂ ਆਉਂਦੀਆਂ ਦਿੱਕਤਾਂ ਬਾਰੇ ਵੋਟਰ ਗੁਰਮੇਲ ਸਿੰਘ ਅਤੇ ਗੁਰਮੀਤ ਸਿੰਘ ਨੇ ਵੀ ਬੀਐੱਲਓ ਟੀਮ ਨੂੰ ਜਾਣੂ ਕਰਵਾਇਆ। ਸੁਧਾਈ ਕਰਨ ਵਾਲੀ ਟੀਮ ਦੇ ਮੈਂਬਰ ਸੁਖਦੀਪ ਸਿੰਘ ਢਿੱਲੋਂ ਨੇ ਆਪਣਾ ਪੱਖ ਰੱਖਦੇ ਹੋਏ ਦੱਸਿਆ ਕਿ ਉਹ ਵਾਰ-ਵਾਰ ਗਲਤੀਆਂ ਸੋਧ ਕੇ ਐਪ ’ਤੇ ਦਾਖਲ ਕਰਦੇ ਹਨ ਪਰ ਕਈ ਗਲਤੀਆਂ ਫਿਰ ਉਸੇ ਤਰ੍ਹਾਂ ਹੀ ਆ ਰਹੀਆਂ ਹਨ। ਉਨ੍ਹਾਂ ਭਰੋਸਾ ਦਿੱਤਾ ਕਿ ਉਹ ਲੋਕਾਂ ਦੀਆਂ ਸਮੱਸਿਆਂਵਾ ਬਾਰੇ ਉੱਚ ਅਧਿਕਾਰੀਆਂ ਨੂੰ ਜਾਣੂ ਕਰਵਾਉਣਗੇ।