ਯਮੁਨਾਨਗਰ ਵਿੱਚ ‘1947 ਦੀ ਭਾਰਤ ਵੰਡ ਦਾ ਦਰਦ’ ਬਾਰੇ ਸੈਮੀਨਾਰ

ਦਵਿੰਦਰ ਸਿੰਘ

ਯਮੁਨਾਨਗਰ, 16 ਅਗਸਤ

ਸਮਾਜਿਕ ਸਮਰਸਤਾ ਮੰਚ ਵੱਲੋਂ ‘1947 ਦੀ ਭਾਰਤ ਵੰਡ ਦਾ ਦਰਦ’ ਵਿਸ਼ੇ ‘ਤੇ ਸੈਮੀਨਾਰ ਕਰਵਾਇਆ ਗਿਆ। ਸੰਸਥਾ ਵੱਲੋਂ ਇਹ ਸੈਮੀਨਾਰ ਅਖੰਡ ਭਾਰਤ ਸੰਕਲਪ ਦਿਵਸ ਮੌਕੇ ਕਰਵਾਇਆ ਗਿਆ, ਜਿਸ ਵਿੱਚ ਮੁੱਖ ਮਹਿਮਾਨ ਹਰਿਆਣਾ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਪ੍ਰਧਾਨ ਮਹੰਤ ਕਰਮਜੀਤ ਸਿੰਘ, ਕਰਨਾਲ ਤੋਂ ਆਏ ਬਾਬਾ ਜੋਗਾ ਸਿੰਘ, ਰਾਜੇਸ਼ ਖਰਬੰਦਾ ਅਤੇ ਡਾ. ਨਰਿੰਦਰ ਵਿਰਕ ਵਿਸ਼ੇਸ਼ ਮਹਿਮਾਨ ਵਜੋਂ ਸ਼ਾਮਲ ਹੋਏ। ਇਸ ਮੌਕੇ ਪੰਜਾਬ ਤੋਂ ਆਏ ਗੁਰਬਚਨ ਸਿੰਘ ਮੋਖਾ ਮੁੱਖ ਬੁਲਾਰੇ ਸਨ। ਪ੍ਰੋਗਰਾਮ ਦੇ ਪ੍ਰਧਾਨਗੀ ਸਿੱਖਿਆ ਸ਼ਾਸਤਰੀ ਡਾ. ਕੇ.ਐਨ.ਕਪੂਰ, ਡਿਪਟੀ ਕਮਿਸ਼ਨਰ ਰਾਹੁਲ ਹੁੱਡਾ, ਜ਼ਿਲ੍ਹਾ ਸੰਘ ਦੇ ਡਾਇਰੈਕਟਰ ਮਾਨ ਸਿੰਘ, ਸਹਿ-ਜ਼ਿਲ੍ਹਾ ਡਾਇਰੈਕਟਰ ਸੇਵਾ ਰਾਮ, ਰਮੇਸ਼ ਧਾਰੀਵਾਲ ਅਤੇ ਸਿਟੀ ਡਾਇਰੈਕਟਰ ਜਗਾਧਰੀ ਮੁਲਕ ਰਾਜ ਦੁਆ ਨੇ ਕੀਤੀ । ਸੈਮੀਨਾਰ ਦੌਰਾਨ ਦੇਸ਼ ਦੀ ਵੰਡ ਦਾ ਦਰਦ ਝੱਲਣ ਵਾਲੇ 106 ਸਾਲਾ ਮੋਹਨ ਲਾਲ, 97 ਸਾਲਾ ਖੇਲ ਸਿੰਘ, 95 ਸਾਲਾ ਚੰਦਰ ਮਹਿਤਾ, 96 ਸਾਲਾ ਸੁਮਿਤਰਾ ਦੇਵੀ ਸਮੇਤ 85 ਸਾਲ ਤੋਂ ਵੱਧ ਉਮਰ ਦੇ 13 ਬੁੱਧੀਜੀਵੀਆਂ ਨੂੰ ਸਨਮਾਨਿਤ ਕੀਤਾ ਗਿਆ। ਸੈਮੀਨਾਰ ਦੇ ਮੁੱਖ ਬੁਲਾਰੇ ਗੁਰਬਚਨ ਸਿੰਘ ਨੇ ਕਿਹਾ ਕਿ ਨੌਜਵਾਨਾਂ ਨੂੰ ਇਹ ਪ੍ਰਣ ਲੈਣਾ ਚਾਹੀਦਾ ਹੈ ਕਿ ਉਹ ਭਾਰਤ ਦੀ ਵੰਡ ਦੇ ਹਾਲਾਤ ਦੁਬਾਰਾ ਪੈਦਾ ਨਹੀਂ ਹੋਣ ਦੇਣਗੇ। ਸੈਮੀਨਾਰ ਵਿੱਚ ਹਰਿਆਣਾ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਮੁਖੀ ਮਹੰਤ ਕਰਮਜੀਤ ਸਿੰਘ ਨੇ ਕਿਹਾ ਕਿ ਅੱਜ ਨੌਜਵਾਨਾਂ ਵਿੱਚ ਵਿਦੇਸ਼ ਜਾਣ ਦੀ ਹੋੜ ਲੱਗੀ ਹੋਈ ਹੈ ਜਦਕਿ ਭਾਰਤ ਵਰਗੀ ਪਵਿੱਤਰ, ਮਿਹਨਤਕਸ਼ ਧਰਤੀ ਕਿਤੇ ਨਹੀਂ ਹੈ। ਇਸ ਲਈ ਮਾਪਿਆਂ ਨੂੰ ਚਾਹੀਦਾ ਹੈ ਕਿ ਉਹ ਆਪਣੇ ਬੱਚਿਆਂ ਅੰਦਰ ਦੇਸ਼ ਭਗਤੀ ਦੀ ਭਾਵਨਾ ਪੈਦਾ ਕਰਨ। ਡਿਪਟੀ ਕਮਿਸ਼ਨਰ ਰਾਹੁਲ ਹੁੱਡਾ ਨੇ ਕਿਹਾ ਕਿ ਸਾਡੇ ਪੁਰਖਿਆਂ ਨੇ ਵੰਡ ਦਾ ਦੌਰ ਦੇਖਿਆ ਸੀ, ਨਦੀਆਂ ਵਿੱਚ ਲਾਸ਼ਾਂ ਤੈਰਦੀਆਂ ਦੇਖੀਆਂ ਸਨ । ਉਨ੍ਹਾਂ ਕਿਹਾ ਕਿ ਦੇਸ਼ ਦੀ ਵੰਡ ਵੇਲੇ ਦੀਆਂ ਗੱਲਾਂ ਸੁਣ ਕੇ ਸਾਨੂੰ ਹਉਕਾ ਆ ਜਾਂਦਾ ਹੈ ਕਿ ਉਨ੍ਹਾਂ ਲੋਕਾਂ ਦੇ ਦਿਲਾਂ ਤੇ ਕੀ ਬੀਤਿਆ ਹੋਵੇਗਾ ਜਿਨ੍ਹਾਂ ਨੇ ਵੰਡ ਦਾ ਦਰਦ ਝੱਲਿਆ ਹੈ । ਵਿਸ਼ੇਸ਼ ਮਹਿਮਾਨ ਰਾਜੇਸ਼ ਖਰਬੰਦਾ ਨੇ ਕਿਹਾ ਕਿ ਪ੍ਰਮਾਤਮਾ ਨੇ ਸਾਰੇ ਮਨੁੱਖਾਂ ਨੂੰ ਬਰਾਬਰ ਬਣਾਇਆ ਹੈ, ਜੇਕਰ ਧਰਤੀ ‘ਤੇ ਸਾਰੇ ਮਨੁੱਖ ਪਿਆਰ ਅਤੇ ਭਾਈਚਾਰਕ ਸਾਂਝ ਨਾਲ ਰਹਿਣ ਤਾਂ ਦੁਨੀਆ ‘ਚ ਕਿਤੇ ਵੀ ਵੰਡ ਵਰਗੀ ਸਥਿਤੀ ਪੈਦਾ ਨਹੀਂ ਹੋ ਸਕਦੀ। ਸੈਮੀਨਾਰ ਦੇ ਪ੍ਰਬੰਧਕ ਅਤੇ ਸਮਰਸਤਾ ਮੰਚ ਦੇ ਕਨਵੀਨਰ ਸੁਰਿੰਦਰ ਨੇ ਸਾਰੇ ਮਹਿਮਾਨਾਂ ਦਾ ਧੰਨਵਾਦ ਕੀਤਾ। ਇਸ ਮੌਕੇ ਰਾਕੇਸ਼, ਗੌਰਵ, ਪਿ੍ੰਸੀਪਲ ਡਾ.ਪੀ.ਕੇ.ਬਾਜਪਾਈ, ਹਰਜੀਤ ਸਿੰਘ ਮੋਂਗਾ ਤੇ ਅਰੁਣ ਆਦਿ ਹਾਜ਼ਰ ਸਨ।