13 ਲੱਖ ਤੋਂ ਵੱਧ ਉਮੀਦਵਾਰਾਂ ਦੇ ਦਿੱਤੀ ਸੀਈਟੀ ਪ੍ਰੀਖ਼ਿਆ
ਹਰਿਆਣਾ ਸਟਾਫ਼ ਸਿਲੈਕਸ਼ਨ ਕਮਿਸ਼ਨ ਦੇ ਚੇਅਰਮੈਨ ਵੱਲੋਂ ਪ੍ਰੀਖ਼ਿਆ ਕੇਂਦਰਾਂ ਦਾ ਦੌਰਾ
Advertisement
ਹਰਿਆਣਾ ਸਟਾਫ਼ ਸਿਲੈਕਸ਼ਨ ਕਮਿਸ਼ਨ (ਐੱਚਐੱਸਐੱਸਸੀ) ਵੱਲੋਂ ਦੋ ਦਿਨਾਂ ਵਿੱਚ ਲਏ ਗਏ ਕਾਮਨ ਐੱਲਿਜੀਬਿਲਿਟੀ ਟੈਸਟ (ਸੀਈਟੀ) ਦੀ ਪ੍ਰੀਖ਼ਿਆ ਵਿੱਚ ਸੂਬੇ ਭਰ ਤੋਂ 13 ਲੱਖ ਤੋਂ ਵੱਧ ਉਮੀਦਵਾਰਾਂ ਨੇ ਹਿੱਸਾ ਲਿਆ ਹੈ। ਸੀਈਟੀ ਦੀ ਪ੍ਰੀਖਿਆ ਵਿੱਚ ਹਰਿਆਣਾ ਸਰਕਾਰ ਦੇ ਪੁਲੀਸ ਤੇ ਪ੍ਰਸ਼ਾਸਨ ਵੱਲੋਂ ਪੁਖ਼ਤਾ ਪ੍ਰਬੰਧ ਕੀਤੇ ਗਏ ਸਨ। ਇਸ ਦੌਰਾਨ ਹਰਿਆਣਾ ਸਟਾਫ ਸਿਲੈਕਸ਼ਨ ਕਮਿਸ਼ਨ ਦੇ ਚੇਅਰਮੈਨ ਹਿੰਮਤ ਸਿੰਘ ਨੇ ਰੋਹਤਕ ਦੇ ਵੱਖ-ਵੱਖ ਪ੍ਰੀਖਿਆ ਕੇਂਦਰਾਂ ਦਾ ਦੌਰਾ ਕੀਤਾ। ਸਾਰੇ ਉਮੀਦਵਾਰਾਂ ਦੇ ਕੜੇ, ਚੂੜੀਆਂ, ਪੰਜੇਬਾਂ, ਘੜੀਆਂ, ਮੰਗਲਸੂਤਰ, ਹੱਥਾਂ ਵਿੱਚ ਬੰਨ੍ਹੇ ਧਾਗੇ ਤੱਕ ਉਤਰਵਾ ਕੇ ਹੀ ਉਮੀਦਵਾਰ ਨੂੰ ਪ੍ਰੀਖਿਆ ਕੇਂਦਰ ਵਿੱਚ ਦਾਖ਼ਲ ਹੋਣ ਦਿੱਤਾ ਹੈ। ਰੋਹਤਕ ਵਿੱਚ ਲੜਕੀਆਂ ਦੀਆਂ ਚੁੰਨੀਆਂ ਤੱਕ ਉਤਰਵਾ ਦਿੱਤੀਆਂ ਗਈਆਂ, ਜਿਸ ਦਾ ਵਿਰੋਧ ਹੋਣ ’ਤੇ ਬਾਅਦ ਵਿੱਚ ਚੁੰਨੀਆਂ ਲੈਣ ਦੀ ਪ੍ਰਵਾਨਗੀ ਦਿੱਤੀ ਗਈ।
Advertisement
ਵਿਸ਼ੇਸ਼ ਗੱਡੀ ਡੇਢ ਘੰਟਾ ਲੇਟ ਹੋਈ
ਹਰਿਆਣਾ ਸੀਈਟੀ ਪ੍ਰੀਖਿਆਰਥੀਆਂ ਲਈ ਅੱਜ ਦੂਜੇ ਦਿਨ ਰੇਲਵੇ ਵੱਲੋਂ ਚਲਾਈ ਗਈ ਵਿਸ਼ੇਸ਼ ਗੱਡੀ ਤੈਅ ਸਮੇਂਂ ਤੋਂ ਕਾਫੀ ਦੇਰੀ ਨਾਲ ਪਹੁੰਚੀ, ਜਿਸ ਕਰਕੇ ਕਈ ਪ੍ਰੀਖਿਆਰਥੀ ਪ੍ਰੀਖ਼ਿਆ ਕੇਂਦਰਾਂ ’ਤੇ ਸਮੇਂ ਸਿਰ ਪਹੁੰਚਣ ਤੋਂ ਪੱਛੜ ਗਏ। ਸੋਨੀਪਤ-ਚੰਡੀਗੜ੍ਹ ਐਗਜ਼ਾਮ ਵਿਸ਼ੇਸ਼ ਗੱਡੀ ਨੰਬਰ 04503 ਅੰਬਾਲਾ ਕੈਂਟ ਰੇਲਵੇ ਸਟੇਸ਼ਨ ’ਤੇ 1 ਘੰਟਾ 40 ਮਿੰਟ ਦੀ ਦੇਰੀ ਨਾਲ ਪਹੁੰਚੀ। ਗੱਡੀ ਲੇਟ ਹੋਣ ਕਰਕੇ ਹਜ਼ਾਰਾਂ ਪ੍ਰੀਖਿਆਰਥੀਆਂ ਨੂੰ ਮੁਸ਼ਕਲ ਦਾ ਸਾਹਮਣਾ ਕਰਨਾ ਪਿਆ। ਉਨ੍ਹਾਂ ਦੀ ਪ੍ਰੀਖਿਆ ਦੀ ਪਹਿਲੀ ਸ਼ਿਫਟ 10 ਵਜੇ ਸ਼ੁਰੂ ਹੋਣੀ ਸੀ। ਰੇਲਵੇ ਸੂਤਰਾਂ ਦਾ ਕਹਿਣਾ ਹੈ ਕਿ ਵਿਸ਼ੇਸ਼ ਗੱਡੀਆਂ ਨੂੰ ਸੁਪਰ-ਫਾਸਟ ਗੱਡੀਆਂ ਦੇ ਮੁਕਾਬਲੇ ਤਰਜੀਹ ਨਹੀਂ ਦਿੱਤੀ ਜਾਂਦੀ, ਜਿਸ ਕਰਕੇ ਵਿਸ਼ੇਸ਼ ਗੱਡੀ ਲੇਟ ਹੋ ਗਈ।
ਅੱਜ ਦਿੱਲੀ-ਅੰਮ੍ਰਿਤਸਰ ਰੂਟ ਦੀਆਂ ਕਈ ਗੱਡੀਆਂ ਅੱਧੇ ਤੋਂ ਇਕ ਘੰਟਾ ਦੇਰੀ ਨਾਲ ਅੰਬਾਲਾ ਕੈਂਟ ਰੇਲਵੇ ਸਟੇਸ਼ਨ ’ਤੇ ਪਹੁੰਚੀਆਂ। ਊਂਚਾਹਾਰ ਐਕਸਪ੍ਰੈੱਸ ਕਰੀਬ ਢਾਈ ਘੰਟੇ ਦੇਰੀ ਨਾਲ ਅੰਬਾਲਾ ਕੈਂਟ ਰੇਲਵੇ ਸਟੇਸ਼ਨ ’ਤੇ ਪਹੁੰਚੀ।
Advertisement
Copyright @2025 Punjabi Tribune
Designed and developed by : 