ਹਰਿਆਣਾ ਪੈਵੇਲੀਅਨ ਨੂੰ ਸੋਨ ਤਗ਼ਮਾ ਮਿਲਿਆ

ਨਵੀਂ ਦਿੱਲੀ ਦੇ ਭਾਰਤ ਮੰਡਪਮ ਵਿੱਚ ਕਰਵਾਏ ਗਏ 44ਵੇਂ ਕੌਮਾਂਤਰੀ ਵਪਾਰ ਮੇਲੇ ਦੌਰਾਨ ਹਰਿਆਣਾ ਨੇ ਆਪਣੀ ਵੱਖਰੀ ਪਛਾਣ ਬਣਾਈ ਹੈ। ਮੇਲੇ ਵਿੱਚ ਵੱਖ-ਵੱਖ ਸ਼੍ਰੇਣੀਆਂ ਤਹਿਤ ਦਿੱਤੇ ਗਏ ਪੁਰਸਕਾਰਾਂ ਵਿੱਚ ਹਰਿਆਣਾ ਪੈਵੇਲੀਅਨ ਨੇ ‘ਸਾਫ਼-ਸੁਥਰੇ ਪੈਵੇਲੀਅਨ’ ਲਈ ਸੋਨ ਤਗਮਾ ਜਿੱਤਿਆ ਹੈ। ਇਹ ਜਾਣਕਾਰੀ ਪੈਵੇਲੀਅਨ ਦੇ ਡਾਇਰੈਕਟਰ ਅਨਿਲ ਚੌਧਰੀ ਨੇ ਦਿੱਤੀ।

15 ਤੋਂ 27 ਨਵੰਬਰ ਤੱਕ ਚੱਲੇ ਇਸ ਮੇਲੇ ਵਿੱਚ ਹਰਿਆਣਾ ਪੈਵੇਲੀਅਨ ਸੈਲਾਨੀਆਂ ਲਈ ਮੁੱਖ ਖਿੱਚ ਦਾ ਕੇਂਦਰ ਰਿਹਾ। ਇੱਥੇ ਹਰਿਆਣਾ ਦੇ ਸੱਭਿਆਚਾਰ, ਵਿਕਾਸ ਅਤੇ ਨਵੀਨਤਾ ਨੂੰ ਬਾਖੂਬੀ ਪ੍ਰਦਰਸ਼ਿਤ ਕੀਤਾ ਗਿਆ। ਮੇਲੇ ਦੀ ਸਮਾਪਤੀ ’ਤੇ ਹੋਏ ਸਮਾਗਮ ਦੌਰਾਨ ਹਰਿਆਣਾ ਨੂੰ ਇਹ ਸਨਮਾਨ ਮਿਲਿਆ। ਡਾਇਰੈਕਟਰ ਅਨਿਲ ਚੌਧਰੀ ਨੇ ਇਸ ਸਫ਼ਲਤਾ ਲਈ ਮੁੱਖ ਮੰਤਰੀ ਨਾਇਬ ਸਿੰਘ ਸੈਣੀ, ਮੁੱਖ ਸਕੱਤਰ ਅਨੁਰਾਗ ਰਸਤੋਗੀ ਅਤੇ ਹੋਰ ਅਧਿਕਾਰੀਆਂ ਦਾ ਧੰਨਵਾਦ ਕੀਤਾ।

ਇਸ ਵਾਰ ਪੈਵੇਲੀਅਨ ਵਿੱਚ ਸਭ ਤੋਂ ਵੱਧ ਚਰਚਾ ਆਰਟੀਫਿਸ਼ੀਅਲ ਇੰਟੈਲੀਜੈਂਸ ਰਾਹੀਂ ਤਿਆਰ ਕੀਤੇ ਗਏ ‘ਤਾਊ’ ਦੀ ਰਹੀ। ਇੱਕ ਬਟਨ ਦਬਾਉਣ ’ਤੇ ਏ ਆਈ ‘ਤਾਊ’ ਖੜ੍ਹੇ ਹੋ ਕੇ ਠੇਠ ਹਰਿਆਣਵੀ ਅੰਦਾਜ਼ ਵਿੱਚ ਦਰਸ਼ਕਾਂ ਨਾਲ ਗੱਲਬਾਤ ਕਰਦੇ ਅਤੇ ਸਰਕਾਰੀ ਯੋਜਨਾਵਾਂ ਬਾਰੇ ਜਾਣਕਾਰੀ ਦਿੰਦੇ ਸਨ। ਇਸ ਤੋਂ ਇਲਾਵਾ ਪੈਵੇਲੀਅਨ ਵਿੱਚ ਸੂਰਜਕੁੰਡ ਮੇਲਾ ਅਤੇ ਗੀਤਾ ਜੈਯੰਤੀ ਦੀ ਝਲਕ ਵੀ ਪੇਸ਼ ਕੀਤੀ ਗਈ।

ਪੈਵੇਲੀਅਨ ਅੰਦਰ 11 ਕਾਰੀਗਰਾਂ, ਸਵੈ-ਸਹਾਇਤਾ ਸਮੂਹਾਂ ਅਤੇ 22 ਐੱਮ ਐੱਸ ਐੱਮ ਈ ਵੱਲੋਂ ਲਾਏ ਸਟਾਲਾਂ ਨੇ ਖਰੀਦਦਾਰਾਂ ਨੂੰ ਕਾਫੀ ਆਕਰਸ਼ਿਤ ਕੀਤਾ। ‘ਏਕ ਭਾਰਤ-ਸ੍ਰੇਸ਼ਠ ਭਾਰਤ’ ਦੀ ਥੀਮ ’ਤੇ ਬਣੇ ਇਸ ਪੈਵੇਲੀਅਨ ਵਿੱਚ ਲੋਕਾਂ ਨੇ ਸੈਲਫੀਆਂ ਲਈਆਂ ਅਤੇ ਹਰਿਆਣਾ ਦੇ ਵਿਰਸੇ ਬਾਰੇ ਜਾਣਕਾਰੀ ਹਾਸਲ ਕੀਤੀ।