ਪੰਚਕੂਲਾ ਜ਼ਿਲ੍ਹੇ ’ਚ ਸ਼ਾਂਤੀਪੂਰਵਕ ਨੇਪੜੇ ਚੜ੍ਹੀ ਪ੍ਰੀਖਿਆ

ਐੱਚਐੱਸਐੱਸਸੀ ਵੱਲੋਂ ਲਈ ਗਈ ਸੀਈਟੀ ਪ੍ਰੀਖਿਆ ਦੂਜੇ ਦਿਨ ਪੰਚਕੂਲਾ ਜ਼ਿਲ੍ਹੇ ਵਿੱਚ ਦੋਵੇਂ ਸ਼ਿਫਟਾਂ ਵਿੱਚ ਸ਼ਾਂਤੀਪੂਰਵਕ ਨੇਪਰੇ ਚੜ੍ਹੀ। ਡਿਪਟੀ ਕਮਿਸ਼ਨਰ ਮੋਨਿਕਾ ਗੁਪਤਾ ਨੇ ਕਿਹਾ ਕਿ ਉਮੀਦਵਾਰਾਂ ਦੀ ਸਹੂਲਤ ਲਈ ਜ਼ਿਲ੍ਹਾ ਪ੍ਰਸ਼ਾਸਨ ਵੱਲੋਂ ਸੀਈਟੀ ਨੂੰ ਸਫਲਤਾਪੂਰਵਕ ਸੰਪੰਨ ਕਰਨ ਲਈ ਸਾਰੇ ਜ਼ਰੂਰੀ ਪ੍ਰਬੰਧ ਕੀਤੇ ਗਏ ਸਨ। ਸੀਈਟੀ ਦੇ ਦੂਜੇ ਦਿਨ ਐਤਵਾਰ ਨੂੰ ਪੰਚਕੂਲਾ ਜ਼ਿਲ੍ਹੇ ਦੇ ਉਮੀਦਵਾਰਾਂ ਨੂੰ 46 ਬੱਸਾਂ ਰਾਹੀਂ ਯਮੁਨਾਨਗਰ ਭੇਜਿਆ ਗਿਆ। ਕਰਨਾਲ ਅਤੇ ਕੈਥਲ ਜ਼ਿਲ੍ਹਿਆਂ ਤੋਂ ਉਮੀਦਵਾਰਾਂ ਨੂੰ ਲੈ ਕੇ 256 ਬੱਸਾਂ ਪੰਚਕੂਲਾ ਪਹੁੰਚੀਆਂ। ਡਿਪਟੀ ਕਮਿਸ਼ਨਰ ਮੋਨਿਕਾ ਗੁਪਤਾ ਨੇ ਕਿਹਾ ਕਿ ਪਹਿਲੀ ਸ਼ਿਫਟ ਲਈ 25 ਬੱਸਾਂ ਅਤੇ ਦੂਜੀ ਸ਼ਿਫਟ ਲਈ 21 ਬੱਸਾਂ ਪੰਚਕੂਲਾ ਜ਼ਿਲ੍ਹੇ ਦੇ ਉਮੀਦਵਾਰਾਂ ਨੂੰ ਪੰਚਕੂਲਾ ਜ਼ਿਲ੍ਹੇ ਦੇ 6 ਸਥਾਨਾਂ (ਕਾਲਕਾ, ਪਿੰਜੌਰ, ਮੋਰਨੀ, ਪੰਚਕੂਲਾ, ਬਰਵਾਲਾ, ਰਾਏਪੁਰ ਰਾਣੀ) ਤੋਂ ਯਮੁਨਾਨਗਰ ਲੈ ਕੇ ਗਈਆਂ। ਉਨ੍ਹਾਂ ਦੱਸਿਆ ਕਿ ਐਤਵਾਰ ਨੂੰ ਕਰਨਾਲ ਤੋਂ 80 ਬੱਸਾਂ ਅਤੇ ਕੈਥਲ ਤੋਂ 45 ਬੱਸਾਂ ਪਹਿਲੀ ਸ਼ਿਫਟ ਵਿੱਚ ਕਰਨਾਲ ਅਤੇ ਕੈਥਲ ਦੇ ਵਿਦਿਆਰਥੀਆਂ ਲਈ ਲਿਆਂਦੀਆਂ ਗਈਆਂ ਅਤੇ ਦੂਜੀ ਸ਼ਿਫਟ ਵਿੱਚ ਕਰਨਾਲ ਤੋਂ 81 ਬੱਸਾਂ ਅਤੇ ਕੈਥਲ ਜ਼ਿਲ੍ਹੇ ਤੋਂ 50 ਬੱਸਾਂ ਪੰਚਕੂਲਾ ਜ਼ਿਲ੍ਹੇ ਵਿੱਚ ਪ੍ਰੀਖਿਆ ਦੇਣ ਲਈ ਲਿਆਂਦੀਆਂ ਗਈਆਂ। ਦੋਵਾਂ ਸ਼ਿਫਟਾਂ ਦੌਰਾਨ, ਵਿਦਿਆਰਥੀਆਂ ਨੂੰ ਪ੍ਰੀਖਿਆ ਕੇਂਦਰਾਂ 'ਤੇ ਲਿਜਾਣ ਅਤੇ ਫੀਡਰ ਬੱਸ ਸੇਵਾ ਰਾਹੀਂ ਬੱਸ ਸਟੈਂਡ 'ਤੇ ਵਾਪਸ ਲਿਆਉਣ ਦਾ ਪ੍ਰਬੰਧ ਕੀਤਾ ਗਿਆ ਹੈ।

ਬੱਸ ਤੋਂ ਖੁੰਝੇ ਵਿਦਿਆਰਥੀ ਨੂੰ ਵਿਸ਼ੇਸ਼ ਵਾਹਨ ਰਾਹੀਂ ਪ੍ਰੀਖਿਆ ਕੇਂਦਰ ਪਹੁੰਚਾਇਆ

ਜਦੋਂ ਇੱਕ ਉਮੀਦਵਾਰ ਆਪਣੀ ਬੱਸ ਖੁੰਝ ਗਿਆ ਤਾਂ ਉਸ ਨੂੰ ਇੱਕ ਵਿਸ਼ੇਸ਼ ਵਾਹਨ ਦਾ ਪ੍ਰਬੰਧ ਕਰਕੇ ਯਮੁਨਾਨਗਰ ਲਿਜਾਇਆ ਗਿਆ। ਜ਼ਿਲ੍ਹੇ ਦੇ ਥਪਾਲੀ ਦੇ ਇੱਕ ਉਮੀਦਵਾਰ ਦੀ ਬੱਸ ਖੁੰਝ ਗਈ। ਇਸ ਤੋਂ ਬਾਅਦ ਕੰਟਰੋਲ ਰੂਮ ਵਿੱਚ ਹੈਲਪਲਾਈਨ ਨੰਬਰ- 0172-2566262 ’ਤੇ ਇੱਕ ਕਾਲ ਆਈ। ਟਰੈਫਿਕ ਸਿਸਟਮ ਦੇ ਇੰਚਾਰਜ ਐੱਸਡੀਐੱਮ ਚੰਦਰਕਾਂਤ ਕਟਾਰੀਆ ਨੇ ਤੁਰੰਤ ਕਾਰਵਾਈ ਕਰਦਿਆਂ ਇੱਕ ਵਿਸ਼ੇਸ਼ ਵਾਹਨ ਦਾ ਪ੍ਰਬੰਧ ਕੀਤਾ ਅਤੇ ਉਮੀਦਵਾਰ ਨੂੰ ਯਮੁਨਾਨਗਰ ਲੈ ਗਏ। ਡਿਪਟੀ ਕਮਿਸ਼ਨਰ ਮੋਨਿਕਾ ਗੁਪਤਾ ਨੇ ਕਿਹਾ ਕਿ ਅਜਿਹੇ ਲਗਭਗ 50 ਉਮੀਦਵਾਰ ਪੰਚਕੂਲਾ ਬੱਸ ਅੱਡੇ ਵੀ ਪਹੁੰਚੇ, ਜਿਨ੍ਹਾਂ ਦਾ ਪ੍ਰੀਖਿਆ ਕੇਂਦਰ ਪੰਚਕੂਲਾ ਜ਼ਿਲ੍ਹੇ ਤੋਂ ਬਾਹਰ ਮਨੀਮਾਜਰਾ ਵਿੱਚ ਸੀ। ਇਨ੍ਹਾਂ ਉਮੀਦਵਾਰਾਂ ਨੂੰ ਵਿਸ਼ੇਸ਼ ਤੌਰ ’ਤੇ ਫੀਡਰ ਬੱਸ ਰਾਹੀਂ ਮਨੀਮਾਜਰਾ ਪ੍ਰੀਖਿਆ ਕੇਂਦਰਾਂ ਵਿੱਚ ਭੇਜਿਆ ਗਿਆ।