ਉਚੇਰੀ ਸਿੱਖਿਆ ਲਈ ਦਸ ਵਿਦਿਆਰਥਣਾਂ ਨੂੰ ਸਾਢੇ ਦਸ ਲੱਖ ਦੀ ਰਾਸ਼ੀ ਵੰਡੀ

ਸਰਦਾਰਨੀ ਮਨਜੀਤ ਕੌਰ ਘੁਮਾਣ ਚੈਰੀਟੇਬਲ ਟਰੱਸਟ ਵੱਲੋਂ ਅੱਜ ਦਸ ਵਿਦਿਆਰਥਣਾਂ ਨੂੰ ਉਚੇਰੀ ਸਿੱਖਿਆ ਲਈ ਕਰੀਬ ਸਾਢੇ ਦਸ ਲੱਖ ਰੁਪਏ ਦੀ ਰਾਸ਼ੀ ਵੰਡੀ ਗਈ। ਇਹ ਰਾਸ਼ੀ ਅਮਰੀਕਾ ’ਚ ਕਾਰੋਬਾਰੀ ਘੁਮਾਣ ਬ੍ਰਦਰਜ਼ ‘(ਅਮਰਬੀਰ ਸਿੰਘ ਅਤੇ ਹਰਸ਼ਰਨ ਸਿੰਘ) ਵੱਲੋਂ ਆਪਣੀ ਮਾਤਾ ਮਰਹੂਮ ਮਨਜੀਤ ਕੌਰ ਦੀ ਯਾਦ ’ਚ ਦਿੱਤੀ ਗਈ। ਸਰਕਾਰੀ ਸੀਨੀਅਰ ਸੈਕੰਡਰੀ ਸਕੂਲ ਧੰਦੋਈ ’ਚ ਸਮਾਗਮ ਕਰਵਾਇਆ ਗਿਆ, ਹਲਕਾ ਸ੍ਰੀ ਹਰਗੋਬਿੰਦਪੁਰ ਦੇ ਵਿਧਾਇਕ ਐਡਵੋਕੇਟ ਅਮਰਪਾਲ ਸਿੰਘ ਕਿਸ਼ਨਕੋਟ, ਡੀਈਓ ਪਰਮਜੀਤ ਸਮੇਤ ਹੋਰ ਹਸਤੀਆਂ ਨੇ ਸ਼ਿਰਕਤ ਕੀਤੀ। ਸਕੂਲ ਪ੍ਰਿੰਸੀਪਲ ਪ੍ਰਭਜੋਤ ਸਿੰਘ ਘੁੰਮਣ ਨੇ ਦੱਸਿਆ ਕਿ ਘੁਮਾਣ ਬਰਦਰਜ਼ ਵੱਲੋਂ ਖੇਤਰ ਦੀਆਂ ਲੜਕੀਆਂ ਦੀ ਉਚੇਰੀ ਸਿੱਖਿਆ ਨੂੰ ਉਤਸਾਹਿਤ ਕਰਨ ਲਈ ਇਸ ਵਾਰ ਦਸ ਲੜਕੀਆਂ ਨੂੰ ਕਰੀਬ ਸਾਢੇ ਦਸ ਲੱਖ ਰੁਪਏ ਦੀ ਆਰਥਿਕ ਸਹਾਇਤਾ ਦਿੱਤੀ ਗਈ ਹੈ।

ਵਿਧਾਇਕ ਕਿਸ਼ਨਕੋਟ ਨੇ ਘੁਮਾਣ ਭਰਾਵਾਂ ਦੀ ਸ਼ਲਾਘਾ ਕੀਤੀ। ਇਸ ਤੋਂ ਪਹਿਲਾ ਟਰੱਸਟ ਦੀ ਪ੍ਰਾਜੈਕਟ ਮੈਨੇਜਰ ਵਰਸ਼ਾ ਰਾਣਾ ਨੇ ਘੁਮਾਣ ਭਰਾਵਾਂ ਦੇ ਅਗਲੇ ਸਮਾਗਮ ਮੌਕੇ ਦਸ ਵਿਦਿਆਰਥਣਾਂ ਤੋਂ ਵਧਾ ਕੇ ਇਲਾਕੇ ਦੀਆਂ ਸੌ ਵਿਦਿਆਰਥਣਾਂ ਨੂੰ ਆਰਥਿਕ ਸਹਾਇਤਾ ਦੇਣ ਬਾਰੇ ਜਾਣੂ ਕਰਵਾਇਆ।