ਬਲਾਕ ਰਈਆ ਦੇ ਬੀ ਡੀ ਪੀ ਓ ਸਣੇ ਸੱਤ ਮੁਲਾਜ਼ਮ ਗ਼ੈਰਹਾਜ਼ਰ

ਬਲਾਕ ਵਿਕਾਸ ਅਤੇ ਪੰਚਾਇਤ ਅਫ਼ਸਰ ਰਈਆ ਦੇ ਦਫ਼ਤਰ ਵਿੱਚ ਅੱਜ 11 ਵਜੇ ਤੱਕ ਬੀ ਡੀ ਪੀ ਓ (ਰਈਆ) ਸਮੇਤ ਸੱਤ ਕਰਮਚਾਰੀ ਕਥਿਤ ਤੌਰ ’ਤੇ ਗੈਰਹਾਜ਼ਰ ਰਹੇ। ਕੁੱਲ 12 ਕਰਮਚਾਰੀਆਂ ਵਿੱਚੋਂ 5 ਕਰਮਚਾਰੀ ਹੀ ਸੁਪਰਡੈਂਟ ਦੇ ਹਾਜ਼ਰੀ ਰਜਿਸਟਰ ਵਿੱਚ ਹਾਜ਼ਰ ਸਨ। ਪੰਚਾਇਤੀ ਵਿਭਾਗ ਦੇ ਐੱਸ ਡੀ ਓ ਦਫ਼ਤਰ ਨੂੰ ਵੀ ਖ਼ਬਰ ਲਿਖੇ ਜਾਣ ਤੱਕ ਤਾਲਾ ਲੱਗਾ ਹੋਇਆ ਸੀ। ਇਸ ਕਾਰਨ ਪਿੰਡਾਂ ਤੋਂ ਕੰਮ ਕਰਵਾਉਣ ਆਏ ਲੋਕ ਖੱਜਲ ਖ਼ੁਆਰ ਹੋਣਾ ਪਿਆ।

ਅੱਜ ਕਰੀਬ 11 ਵਜੇ ਮੀਡੀਆ ਟੀਮ ਵੱਲੋਂ ਲੋਕਾਂ ਦੀ ਸ਼ਿਕਾਇਤ ’ਤੇ ਬਲਾਕ ਵਿਕਾਸ ਅਤੇ ਪੰਚਾਇਤ ਅਫ਼ਸਰ ਰਈਆ ਦੇ ਦਫ਼ਤਰ ਪੁੱਜ ਕੇ ਪ੍ਰਾਪਤ ਕੀਤੀ ਜਾਣਕਾਰੀ ਅਨੁਸਾਰ ਬਲਾਕ ਵਿਕਾਸ ਅਤੇ ਪੰਚਾਇਤ ਦਫ਼ਤਰ ਰਈਆ ਵਿੱਚ ਵੱਡੀ ਗਿਣਤੀ ਵਿਚ ਕਮਰਿਆਂ ਨੂੰ ਤਾਲੇ ਲੱਗੇ ਹੋਏ ਸਨ ਅਤੇ ਬੀ ਡੀ ਪੀ ਓ ਰਈਆ ਦੇ ਦਫ਼ਤਰ ਵਿੱਚ ਪੱਖਾ ਚੱਲ ਰਿਹਾ ਸੀ ਅਤੇ ਉੱਥੇ ਕੋਈ ਵੀ ਅਧਿਕਾਰੀ ਹਾਜ਼ਰ ਨਹੀਂ ਸੀ। ਇਸ ਸਬੰਧੀ ਦਫ਼ਤਰ ਦੇ ਸੁਪਰਡੈਂਟ ਮੇਜਰ ਸਿੰਘ ਨੂੰ ਮਿਲਣ ’ਤੇ ਉਨ੍ਹਾਂ ਦੱਸਿਆ ਕਿ ਦਫ਼ਤਰ ਵਿੱਚ ਬੀ ਡੀ ਪੀ ਓ ਸਮੇਤ ਕੁਲ 12 ਕਰਮਚਾਰੀ ਕੰਮ ਕਰਦੇ ਹਨ ਅਤੇ ਹੁਣ ਤੱਕ ਸਿਰਫ਼ 5 ਕਰਮਚਾਰੀ ਹੀ ਹਾਜ਼ਰ ਹਨ। ਉਨ੍ਹਾਂ ਕਿਹਾ ਬੀ ਡੀ ਪੀ ਓ ਸਬੰਧੀ ਉਨ੍ਹਾਂ ਨੂੰ ਕੋਈ ਜਾਣਕਾਰੀ ਨਹੀਂ ਹੈ।

ਇਸ ਸਬੰਧੀ ਜਦੋਂ ਸਬ ਡਿਵੀਜ਼ਨ ਬਾਬਾ ਬਕਾਲਾ ਦੇ ਐੱਸ ਡੀ ਐੱਮ ਅਮਨਦੀਪ ਸਿੰਘ ਨਾਲ ਸੰਪਰਕ ਕੀਤਾ ਤਾਂ ਉਨ੍ਹਾਂ ਦੱਸਿਆ ਕਿ ਬੀ ਡੀ ਪੀ ਓ ਕਿਸੇ ਮੀਟਿੰਗ ਵਿਚ ਹੋ ਸਕਦੇ ਹਨ। ਡਿਪਟੀ ਕਮਿਸ਼ਨਰ (ਅੰਮ੍ਰਿਤਸਰ) ਦਲਵਿੰਦਰਜੀਤ ਸਿੰਘ ਨਾਲ ਦਫ਼ਤਰ ਦੀ ਗੈਰਹਾਜ਼ਰੀ ਸਬੰਧੀ ਫ਼ੋਟੋ ਅਤੇ ਵੀਡੀਓ ਭੇਜ ਕੇ ਪੱਖ ਜਾਣਨ ’ਤੇ ਉਨ੍ਹਾਂ ਕਿਹਾ ਕਿ ਇਸ ਸਬੰਧੀ ਏ ਡੀ ਸੀ (ਵਿਕਾਸ) ਨੂੰ ਜਾਂਚ ਲਈ ਆਖ ਦਿੱਤਾ ਗਿਆ ਹੈ।