ਬੰਦ ਨਿਕਾਸੀ ਨਾਲਿਆਂ ਕਾਰਨ ਡੁੱਬੀ ਆਈਟੀਆਈ...

ਸ਼ਹਿਰ ਦੇ ਗੰਦੇ ਨਾਲਿਆਂ ਦੀ ਸਹੀ ਢੰਗ ਨਾਲ ਸਫ਼ਾਈ ਨਾ ਹੋਣ ਅਤੇ ਤਹਿਸੀਲ ਕੰਪਲੈਕਸ ਦੇ ਨਾਲ ਚੱਲਦੇ ਬੰਦ ਪਏ ਨਿਕਾਸੀ ਨਾਲੇ ਕਾਰਨ ਸਰਕਾਰੀ ਆਈ ਟੀ ਆਈ ਪਾਣੀ ਵਿੱਚ ਡੁੱਬ ਗਈ ਹੈ। ਬੰਦ ਪਏ ਨਿਕਾਸੀ ਨਾਲਿਆਂ ਕਾਰਨ ਖੇਤਾਂ ਦਾ ਓਵਰ ਫਲੋਅ ਹੋਇਆ ਪਾਣੀ ਸਿਵਲ ਅਦਾਲਤ ਨੂੰ ਜਾਂਦੀ ਸੜਕ ਨੂੰ ਪਾਰ ਕਰਕੇ ਪੁੱਡਾ ਕਲੋਨੀ ਅਤੇ ਤਹਿਸੀਲ ਕੰਪਲੈਕਸ ਅੰਦਰ ਵੀ ਜਾ ਵੜਿਆ। ਪ੍ਰਸ਼ਾਸਨ ਵੱਲੋਂ ਕਾਹਲੀ ਵਿੱਚ ਜੇ ਸੀ ਬੀ ਬੁਲਾ ਕੇ ਬੰਦ ਪਏ ਨਿਕਾਸੀ ਨਾਲੇ ਖੁਲਵਾਏ ਗਏ ਅਤੇ ਆਈ ਟੀ ਆਈ ਪ੍ਰਬੰਧਕਾਂ ਵੱਲੋਂ ਵੀ ਆਈ ਟੀ ਆਈ ਅੰਦਰ ਭਰਿਆ ਪਾਣੀ ਮੋਟਰ ਲਾ ਕੇ ਬਾਹਰ ਕੱਢਿਆ ਜਾ ਰਿਹਾ ਹੈ।

ਪਿੰਡ ਖੜਕ ਬੱਡਲਾ ਨੇੜਲੇ ਖੇਤਾਂ ਦਾ ਪਾਣੀ ਨਿਕਾਸੀ ਨਾਲਿਆਂ ਰਾਹੀਂ ਪਿੰਡ ਰਾਮਗੜ੍ਹ ਕੁੱਲੀਆਂ ਨੇੜਿਓਂ ਖੇਤਾਂ ਵਿੱਚ ਦੀ ਪਾਰ ਕਰਕੇ ਡਰੇਨਾਂ ਵਿੱਚ ਜਾ ਪੈਂਦਾ ਸੀ ਪਰ ਕੁਝ ਸਮਾਂ ਪਹਿਲਾਂ ਇਸਦੇ ਰਾਹ ਵਿੱਚ ਪੁੱਡਾ ਕਲੋਨੀ ਅਤੇ ਸਿਵਲ ਅਦਾਲਤ ਦੀ ਉਸਾਰੀ ਹੋ ਜਾਣ ਕਾਰਨ ਨਿਕਾਸੀ ਨਾਲੇ ਠੱਪ ਹੋ ਗਏ। ਕੇਵਲ ਇੱਕ ਹੀ ਨਿਕਾਸੀ ਨਾਲਾ ਰਹਿ ਗਿਆ, ਜਿਹੜਾ ਸਰਕਾਰੀ ਆਈ ਟੀ ਆਈ ਦੇ ਨਾਲ ਚੱਲਦਾ ਸੀ ਅਤੇ ਤਹਿਸੀਲ ਕੰਪਲੈਕਸ ਦੇ ਨੇੜਿਓਂ ਸ਼ਾਹ ਨਹਿਰ ਵਿੱਚ ਡਿੱਗਦਾ ਸੀ ਪਰ ਕਾਫੀ ਦੇਰ ਤੋਂ ਬੰਦ ਪਏ ਇਸ ਨਾਲੇ ਨੂੰ ਖੁੱਲ੍ਹਵਾਉਣ ਲਈ ਨਗਰ ਕੌਂਸਲ ਜਾਂ ਪ੍ਰਸਾਸ਼ਨ ਨੇ ਕਦੇ ਧਿਆਨ ਨਹੀਂ ਦਿੱਤਾ। ਕਿਸਾਨ ਸਭਾ ਦੇ ਜ਼ਿਲ੍ਹਾ ਪ੍ਰਧਾਨ ਆਸ਼ਾ ਨੰਦ ਨੇ ਬੰਦ ਪਏ ਨਿਕਾਸੀ ਨਾਲਿਆਂ ਨੂੰ ਖੁੱਲ੍ਹਵਾਉਣ ਦੀ ਮੰਗ ਕਰਦਿਆਂ ਸ਼ਹਿਰ ਦੀ ਸਫਾਈ ਲਈ ਵਰਤੇ ਗਏ ਫੰਡਾਂ ਦੀ ਉੱਚ ਪੱਧਰੀ ਜਾਂਚ ਮੰਗੀ ਹੈ।

ਬੰਦ ਨਾਲੇ ਬਾਰੇ ਜਾਣਕਾਰੀ ਨਹੀਂ ਸੀ: ਐੱਸਡੀਐੱਮ

ਐੱਸਡੀਐੱਮ ਅੰਕੁਰ ਮਹਿੰਦਰੂ ਨੇ ਕਿਹਾ ਕਿ ਉਹ ਹਾਲ ਹੀ ਵਿੱਚ ਇੱਥੇ ਆਏ ਹਨ ਅਤੇ ਬੰਦ ਪਏ ਨਿਕਾਸੀ ਨਾਲੇ ਬਾਰੇ ਉਨ੍ਹਾਂ ਨੂੰ ਜਾਣਕਾਰੀ ਨਹੀਂ ਸੀ। ਨਿਕਾਸੀ ਨਾਲਾ ਖੁੱਲ੍ਹਵਾ ਦਿੱਤਾ ਗਿਆ ਹੈ ਅਤੇ ਬਰਸਾਤੀ ਪਾਣੀ ਦੀ ਨਿਕਾਸੀ ਕੀਤੀ ਜਾ ਰਹੀ ਹੈ।