ਪਾਤੜਾਂ: ਏ ਟੀ ਐੱਮ ਠੱਗ ਪੁਲੀਸ ਹਵਾਲੇ ਕੀਤਾ

ਸ਼ਹਿਰ ਦੀ ਨਰਵਾਣਾ ਰੋਡ ਬੈਂਕ ਦੇ ਬਾਹਰ ਲੱਗੇ ਏ ਟੀ ਐੱਮ ਵਿੱਚੋਂ ਕਾਰਡ ਬਦਲ ਕੇ ਪੈਸੇ ਕਢਾਉਣ ਵਾਲੇ ਠੱਗ ਨੂੰ ਮੌਕੇ ਉੱਤੇ ਦੋ ਲੜਕੀਆਂ ਨੇ ਬਹਾਦਰੀ ਦਿਖਾਉਂਦਿਆਂ ਦਬੋਚ ਲਿਆ। ਪੈਸੇ ਕਢਵਾ ਕੇ ਨਿਕਲਣ ਦੀ ਕੋਸ਼ਿਸ਼ ਕਰਨ ਵਾਲੇ ਠੱਗ ਨੂੰ ਲੜਕੀਆਂ ਨੇ ਫੜ ਕੇ ਰੌਲਾ ਪਾ ਦਿੱਤਾ। ਇਸ ਮੌਕੇ ਇਕੱਤਰ ਭੀੜ ਨੇ ਠੱਗ ਨੂੰ ਪੁਲੀਸ ਦੇ ਹਵਾਲੇ ਕੀਤਾ। ਜਾਣਕਾਰੀ ਮੁਤਾਬਕ ਦਿੱਲੀ-ਸੰਗਰੂਰ ਕੌਮੀ ਮੁੱਖ ਮਾਰਗ ਉੱਤੇ ਸ਼ਹਿਰ ਦੀ ਨਰਵਾਣਾ ਰੋਡ ’ਤੇ ਯੂਨੀਅਨ ਬੈਂਕ ਦੀ ਬਰਾਂਚ ਦੇ ਬਾਹਰ ਲੱਗੇ ਏਟੀਐੱਮ ਵਿੱਚੋਂ ਦੋ ਲੜਕੀਆਂ ਪੈਸੇ ਕਢਵਾਉਣ ਲਈ ਪੁੱਜੀਆਂ ਸਨ। ਇਸ ਦੌਰਾਨ ਜਦੋਂ ਇੱਕ ਲੜਕੀ ਨੇ ਆਪਣੇ ਖਾਤੇ ਵਿੱਚੋਂ ਤੀਹ ਹਜ਼ਾਰ ਕਢਾਉਣ ਦੀ ਕੋਸ਼ਿਸ਼ ਕੀਤੀ ਤਾਂ ਏ ਟੀ ਐੱਮ ਵਿੱਚੋਂ ਇਕੱਠੇ ਨਹੀਂ ਨਿਕਲੇ। ਇੰਨੇ ਵਿੱਚ ਪਿੱਛੇ ਖੜ੍ਹੇ ਠੱਗ ਨੇ ਉਨ੍ਹਾਂ ਨੂੰ ਪੈਸੇ ਕਢਵਾ ਕੇ ਦੇਣ ਲਈ ਕਿਹਾ। ਉਨ੍ਹਾਂ ਏ ਟੀ ਐੱਮ ਦੇ ਦਿੱਤਾ ਪਰ ਵਾਰ-ਵਾਰ ਕੋਸ਼ਿਸ਼ ਕਰਨ ’ਤੇ ਜਦੋਂ ਪੈਸੇ ਨਹੀਂ ਨਿਕਲੇ ਤਾਂ ਇਸ ਵਿਅਕਤੀ ਨੇ ਬੜੀ ਹੁਸ਼ਿਆਰੀ ਨਾਲ ਏ ਟੀ ਐੱਮ ਕਾਰਡ ਬਦਲ ਦਿੱਤਾ ਪਰ ਲੜਕੀ ਨੇ ਆਪਣਾ ਕਾਰਡ ਪਛਾਣ ਲਿਆ। ਜਦੋਂ ਲੜਕੀ ਨੇ ਕਾਰਡ ਮੰਗਿਆ ਤਾਂ ਉਸ ਨੇ ਭੱਜਣ ਦੀ ਕੋਸ਼ਿਸ਼ ਕੀਤੀ। ਉਨ੍ਹਾਂ ਬਹਾਦਰੀ ਨਾਲ ਏ ਟੀ ਐੱਮ ਵਾਲੇ ਵਿੱਚੋਂ ਨਿਕਲ ਕੇ ਫ਼ਰਾਰ ਹੋਣ ਦੀ ਕੋਸ਼ਿਸ਼ ਕਰਨ ਵਾਲੇ ਠੱਗ ਨੂੰ ਫੜ ਕੇ ਰੌਲਾ ਪਾ ਦਿੱਤਾ। ਮੌਕੇ ਉੱਤੇ ਜੁੜੀ ਭੀੜ ਨੇ ਸਿਟੀ ਪੁਲੀਸ ਚੌਕੀ ਨੂੰ ਸੂਚਨਾ ਦੇਣ ’ਤੇ ਪੁਲੀਸ ਨੇ ਠੱਗ ਨੂੰ ਆਪਣੀ ਹਿਰਾਸਤ ਵਿੱਚ ਲੈ ਲਿਆ। ਪਤਾ ਲੱਗਾ ਹੈ ਕਿ ਠੱਗ ਕੋਲੋਂ ਕਈ ਦਰਜਨ ਏ ਟੀ ਐੱਮ ਕਾਰਡ ਬਰਾਮਦ ਹੋਏ ਹਨ। ਸਿਟੀ ਪੁਲੀਸ ਚੌਕੀ ਦੇ ਇੰਚਾਰਜ ਕੁਲਬੀਰ ਸਿੰਘ ਨੇ ਕਿਹਾ ਹੈ ਕਿ ਪੁਲੀਸ ਮਾਮਲੇ ਦੀ ਜਾਂਚ ਕਰ ਰਹੀ ਹੈ।