ਮਿਗ 21 ਨੂੰ ਹਵਾਈ ਸੈਨਾ ’ਚੋਂ ਵਿਦਾਇਗੀ; ਏਅਰ ਚੀਫ ਮਾਰਸ਼ਲ ਏਪੀ ਸਿੰਘ ਨੇ ਭਰੀ ਆਖਰੀ ਉਡਾਨ

ਭਾਰਤੀ ਫ਼ੌਜ ਨੂੰ ਹਰ ਜੰਗ ਵਿੱਚ ਜਿੱਤ ਦਿਵਾਉਣ ਵਿੱਚ ਮੋਹਰੀ ਭੁੂਮਿਕਾ ਨਿਭਾਉਣ ਵਾਲੇ ਮਿੱਗ-21 ਨੂੰ ਅੱਜ ਹਮੇਸ਼ਾ ਲਈ ਵਿਦਾਇਗੀ ਦੇ ਦਿੱਤੀ ਹੈ। ਇਸ ਸਬੰਧੀ ਚੰਡੀਗੜ੍ਹ ਏਅਰ ਫੋਰਸ ਸਟੇਸ਼ਨ ’ਤੇ ਵੱਡਾ ਸਮਾਗਮ ਰੱਖਿਆ ਗਿਆ ਹੈ, ਜਿੱਥੇ ਮਿੱਗ-21 ਜਹਾਜ਼ ਨੇ ਛੇ ਦਹਾਕਿਆਂ ਬਾਅਦ ਆਖਰੀ ਵਾਰ ਉਡਾਣ ਭਰੀ। ਮਿਗ 21 ਦੀ ਆਖਰੀ ਉਡਾਨ ਏਅਰ ਚੀਫ ਮਾਰਸ਼ਲ ਏਪੀ ਸਿੰਘ ਨੇ ਭਰੀ ਹੈ। ਇਸ ਦੇ ਨਾਲ ਹੀ ਮਿੱਗ- 21 ਨੇ ਆਖਰੀ ਵਾਰ ਅਸਮਾਨ ਵਿੱਚ ਕਈ ਕਰਤੱਬ ਵੀ ਦਿਖਾਏ।ਇਸ ਮੌਕੇ ਰੱਖਿਆ ਮੰਤਰੀ ਰਾਜਨਾਥ ਸਿੰਘ ਵਿਸ਼ੇਸ਼ ਤੌਰ ’ਤੇ ਮੌਜੂਦ ਰਹੇ, ਜਿਨ੍ਹਾਂ ਨੇ ਮਿਗ 21 ਨੂੰ ਭਾਰਤ ਅਤੇ ਰੂਸ ਦੇ ਆਪਸੀ ਸਬੰਧਾਂ ਦਾ ਪ੍ਰਤੀਕ ਦੱਸਿਆ। ਸਮਾਗਮ ’ਚ ਹਵਾਈ ਫ਼ੌਜ ਦੇ ਏਅਰ ਚੀਫ਼ ਮਾਰਸ਼ਲ ਏ ਪੀ ਸਿੰਘ, ਚੀਫ਼ ਆਫ਼ ਡਿਫੈਂਸ ਸਟਾਫ ਜਨਰਲ ਅਨਿਲ ਚੌਹਾਨ, ਥਲ ਸੈਨਾ ਮੁਖੀ ਜਨਰਲ ਉਪੇਂਦਰ ਦਿਵੇਦੀ ਸ਼ਿਰਕਤ ਨੇ ਵੀ ਸ਼ਿਰਕਤ ਕੀਤੀ।

 

ਮਿਗ-21 ਨੂੰ ਇੱਕ ਸ਼ਕਤੀਸ਼ਾਲੀ ਮਸ਼ੀਨ ਅਤੇ ਕੌਮੀ ਮਾਣ ਦੱਸਦੇ ਹੋਏ ਰੱਖਿਆ ਮੰਤਰੀ ਰਾਜਨਾਥ ਸਿੰਘ ਨੇ ਕਿਹਾ ਕਿ ਇਸ ਜਹਾਜ਼ ਨਾਲ ਡੂੰਘਾ ਲਗਾਅ ਹੈ ਜਿਸਨੇ ਸਾਡੇ ਵਿਸ਼ਵਾਸ ਨੂੰ ਆਕਾਰ ਦਿੱਤਾ। ਉਨ੍ਹਾਂ ਕਿਹਾ, ‘‘ਮਿਗ-21 ਨਾ ਸਿਰਫ਼ ਇੱਕ ਜਹਾਜ਼ ਜਾਂ ਮਸ਼ੀਨ ਹੈ ਬਲਕਿ ਭਾਰਤ-ਰੂਸ ਦੇ ਡੂੰਘੇ ਸਬੰਧਾਂ ਦਾ ਸਬੂਤ ਵੀ ਹੈ।’’

ਉਨ੍ਹਾਂ ਅੱਗੇ ਕਿਹਾ ਕਿ, ‘‘ਫੌਜੀ ਹਵਾਬਾਜ਼ੀ ਦਾ ਇਤਿਹਾਸ ਸ਼ਾਨਦਾਰ ਹੈ। ਮਿਗ 21 ਨੇ ਸਾਡੀ ਫੌਜੀ ਹਵਾਬਾਜ਼ੀ ਯਾਤਰਾ ਵਿੱਚ ਬਹੁਤ ਸਾਰੇ ਮਾਣਮੱਤੇ ਪਲ ਜੋੜ ਦਿੱਤੇ।’’

ਜ਼ਿਕਰਯੋਗ ਹੈ ਕਿ ਮਿੱਗ-21 ਨੇ ਆਪਣੀ ਪਹਿਲੀ ਉਡਾਨ ਸਾਲ 1963 ਵਿੱਚ ਚੰਡੀਗੜ੍ਹ ਦੇ ਤਿੰਨ ਤੰਬੂਆਂ ’ਚ ਸਥਿਤ ਏਅਰ ਫੋਰਸ ਸਟੇਸ਼ਨ ਤੋਂ ਭਰੀ ਸੀ। ਮਿੱਗ-21 ਨੇ ਕਈ ਲੜਾਈਆਂ ਵਿੱਚ ਜਿੱਤ ਦਿਵਾਉਣ ਵਿੱਚ ਅਹਿਮ ਭੂਮਿਕਾ ਨਿਭਾਈ ਹੈ। ਮਿਗ-21 ਨੇ ਸਾਲ 1965 ਤੇ 1971 ਦੀ ਜੰਗ ਅਤੇ 1999 ਦੀ ਕਾਰਗਿਲ ਜੰਗ ਵਿੱਚ ਜੌਹਰ ਦਿਖਾਏ ਸਨ। ਸਾਲ 2019 ਵਿੱਚ ਬਾਲਾਕੋਟ ਏਅਰ ਸਟ੍ਰਾਈਕ ਦੌਰਾਨ ਵੀ ਮਿਗ-21 ਨੇ ਦੁਸ਼ਮਣ ਦੇ ਐੱਫ-16 ਲੜਾਕੂ ਜੈੱਟ ਨੂੰ ਨਸ਼ਟ ਕੀਤਾ ਸੀ।

ਸਾਬਕਾ ਪਾਇਲਟ ਅਤੇ ਭਾਰਤੀ ਹਵਾਈ ਸੈਨਾ ਦੇ ਸਾਬਕਾ ਮੁਖੀ ਏਅਰ ਚੀਫ਼ ਮਾਰਸ਼ਲ ਏ ਵਾਈ ਟਿਪਨਿਸ (ਸੇਵਾਮੁਕਤ) ਨੇ ਕਿਹਾ ‘‘ਮਿਗ-21 ਨੇ ਸਾਨੂੰ ਸਿਖਾਇਆ ਕਿ ਨਵੀਨਤਾਕਾਰੀ ਕਿਵੇਂ ਬਣਨਾ ਹੈ ਅਤੇ ਨਤੀਜੇ ਕਿਵੇਂ ਪੈਦਾ ਕਰਨੇ ਹਨ।’’

ਚੰਡੀਗੜ੍ਹ ਵਿੱਚ ਹੋਣ ਵਾਲੇ ਉੱਚ-ਪ੍ਰੋਫਾਈਲ ਸੇਵਾਮੁਕਤੀ ਸਮਾਰੋਹ ਤੋਂ ਇੱਕ ਦਿਨ ਪਹਿਲਾਂ IAF ਵੱਲੋਂ X 'ਤੇ ਸਾਂਝੇ ਕੀਤੇ ਗਏ ਇੱਕ ਰਿਕਾਰਡ ਕੀਤੇ ਵੀਡੀਓ ਪੋਡਕਾਸਟ ਵਿੱਚ ਉਨ੍ਹਾਂ ਨੇ ਚੁਣੌਤੀਆਂ ਨੂੰ ਯਾਦ ਕੀਤਾ ਜਿਨ੍ਹਾਂ ਦਾ ਸਾਹਮਣਾ ਉਨ੍ਹਾਂ ਅਤੇ ਹੋਰ ਪਾਇਲਟਾਂ ਨੇ ਮਿਗ-21 ਜਹਾਜ਼ ਦੀ ਸ਼ੁਰੂਆਤ ਵੇਲੇ ਕੀਤਾ ਸੀ।

ਏਅਰ ਸ਼ੋਅ ਕਾਰਨ ਚੰਡੀਗੜ੍ਹ ਪੁਲੀਸ ਵੱਲੋਂ ਆਵਾਜਾਈ ਰੂਟਾਂ ’ਚ ਬਦਲਾਅ

ਚੰਡੀਗੜ੍ਹ ਅੱਜ ਏਅਰ ਫੋਰਸ ਸਟੇਸ਼ਨ ਵਿਖੇ ਭਾਰਤੀ ਹਵਾਈ ਸੈਨਾ ਦੇ ਮਿਗ-21 ਲੜਾਕੂ ਜੈੱਟ ਦੇ ਰਸਮੀ ਵਿਦਾਈ ਸਮਾਰੋਹ ਦੀ ਮੇਜ਼ਬਾਨੀ ਦੇ ਚਲਦਿਆਂ ਇਸ ਲਈ ਟਰੈਫਿਕ ਪੁਲੀਸ ਨੇ ਆਮ ਜਨਤਾ ਲਈ ਇੱਕ ਟਰੈਫਿਕ ਸਲਾਹ ਜਾਰੀ ਕੀਤੀ ਹੈ।

ਮੁੱਖ ਸੜਕਾਂ ’ਤੇ ਦੁਪਹਿਰ 1:30 ਵਜੇ ਤੋਂ 3 ਵਜੇ ਤੱਕ ਆਵਾਜਾਈ ਨੂੰ ਨਿਯੰਤ੍ਰਿਤ ਕੀਤਾ ਜਾਵੇਗਾ। ਪਾਬੰਦੀਆਂ ਹੇਠ ਲਿਖੇ ਮੁੱਖ ਮਾਰਗਾਂ 'ਤੇ ਲਾਗੂ ਰਹਿਣਗੀਆਂ:

3BRD ਤੋਂ ਕਾਲੀ ਬਾੜੀ ਲਾਈਟ ਪੁਆਇੰਟ ਤੱਕ, ਪੂਰਵ ਮਾਰਗ 'ਤੇ: ਕਾਲੀ ਬਾੜੀ ਲਾਈਟ ਪੁਆਇੰਟ ਤੋਂ ਟ੍ਰਾਂਸਪੋਰਟ ਏਰੀਆ ਜੰਕਸ਼ਨ ਤੱਕ, ਮੱਧ ਮਾਰਗ 'ਤੇ: ਟ੍ਰਾਂਸਪੋਰਟ ਏਰੀਆ ਲਾਈਟ ਪੁਆਇੰਟ ਤੋਂ ਪੁਲਿਸ ਸਟੇਸ਼ਨ ਈਸਟ ਚੌਂਕ (ਸੈਕਟਰ 7/26/19/27) ਤੱਕ। ਇਸੇ ਤਰ੍ਹਾਂ ਸੁਖਨਾ ਪਾਥ 'ਤੇ: ਪੁਲੀਸ ਸਟੇਸ਼ਨ ਈਸਟ ਚੌਂਕ ਤੋਂ ਗੋਲਫ ਕੋਰਸ ਮੋੜ ਤੱਕ ਪੰਜਾਬ ਰਾਜ ਭਵਨ ਵੱਲ ਆਵਾਜਾਈ ਸੀਮਤ ਰਹੇਗੀ।

ਚੰਡੀਗੜ੍ਹ ਪੁਲੀਸ ਨੇ ਸਲਾਹ ਜਾਰੀ ਕੀਤੀ ਹੈ ਕਿ ਉਹ ਇਨ੍ਹਾਂ ਸਮਿਆਂ ਦੌਰਾਨ ਬਦਲਵੇਂ ਰਸਤਿਆਂ ਦੀ ਵਰਤੋਂ ਕਰਨ।