ਪੋਸਟ ਗ੍ਰੈਜੂਏਟ ਅਤੇ ਪ੍ਰੋਫ਼ੈਸ਼ਨਲਲ ਕੋਰਸਾਂ ਦੇ ਵਿਦਿਆਰਥੀਆਂ ਲਈ ਗੋਲਡਨ ਚਾਂਸ

ਪੰਜਾਬ ਯੂਨੀਵਰਸਿਟੀ ਨੇ ਸਾਰੇ ਪੋਸਟ ਗ੍ਰੈਜੂਏਟ ਅਤੇ ਪ੍ਰੋਫੈਸ਼ਨਲ ਕੋਰਸਾਂ ਦੇ ਸਮੈਸਟਰ ਸਿਸਟਮ ਦੇ ਦਾਖਲਾ ਸਾਲ-2011 ਤੋਂ ਆਪਣੇ ਕਿਸੇ ਵੀ ਪੈਂਡਿੰਗ ਰੀ-ਅਪੀਅਰ, ਕੰਪਾਰਟਮੈਂਟ, ਪੂਰੇ ਵਿਸ਼ੇ ਜਾਂ ਇੰਪਰੂਵਮੈਂਟ ਅਤੇ ਪ੍ਰੈਕਟੀਕਲ ਮਿਸ ਕਰ ਚੁੱਕੇ ਵਿਦਿਆਰਥੀਆਂ ਨੂੰ ਪਾਸ ਕਰਨ ਦਾ ਸੁਨਹਿਰੀ ਮੌਕਾ ਦਿੱਤਾ ਹੈ। ਪਹਿਲਾਂ ਇਹ ਮੌਕਾ 2014 ਤੋਂ ਸਾਰੇ ਅੰਡਰ-ਗ੍ਰੈਜੁਏਟ, ਪੋਸਟ ਗ੍ਰੈਜੂਏਟ ਅਤੇ ਪ੍ਰੋਫੈਸ਼ਨਲ ਕੋਰਸਾਂ ਦੇ ਸਮੈਸਟਰ ਦੇ ਵਿਦਿਆਰਥੀਆਂ ਲਈ ਉਪਲਬਧ ਸੀ ਪ੍ਰੰਤੂ ਇਸ ਵਾਰ ’ਵਰਸਿਟੀ ਨੇ ਸਾਲ-2011 ਤੋਂ ਵੀ ਕਰ ਦਿੱਤਾ ਹੈ।

ਕੰਟਰੋਲਰ ਪ੍ਰੀਖਿਆਵਾਂ ਪ੍ਰੋ. ਜਗਤ ਭੂਸ਼ਣ ਨੇ ਦੱਸਿਆ ਕਿ ਜਿਨ੍ਹਾਂ ਵਿਦਿਆਰਥੀਆਂ ਕੋਲ ਰੀ-ਅਪੀਅਰ ਦੇ ਮੌਕੇ ਉਪਲਬਧ ਨਹੀਂ ਹਨ, ਉਹ ਇਸ ਪ੍ਰੀਖਿਆ ਲਈ ਆਪਣੇ ਸਬੰਧਿਤ ਰੀ-ਅਪੀਅਰ / ਕੰਪਾਰਟਮੈਂਟ / ਪੂਰੇ ਵਿਸ਼ੇ / ਇੰਪਰੂਵਮੈਂਟ/ ਮਿੱਸਡ ਪ੍ਰੈਕਟੀਕਲ ਪਾਸ ਕਰਨ ਲਈ ਅਰਜ਼ੀ ਦੇ ਸਕਦੇ ਹਨ।

ਉਨ੍ਹਾਂ ਸਪੱਸ਼ਟ ਕੀਤਾ ਕਿ ਇਹ ਸੁਨਹਿਰੀ ਮੌਕਾ ਸਿਰਫ਼ ਸਮੈਸਟਰ ਸਿਸਟਮ ਕੋਰਸਾਂ ਲਈ ਹੈ ਅਤੇ ਇਹ ਅੰਤਿਮ ਸਮੈਸਟਰ ਪ੍ਰੀਖਿਆਵਾਂ ਦੇ ਨਾਲ਼ ਨਵੰਬਰ/ਦਸੰਬਰ 2025 ਵਿੱਚ ਔਡ ਸਮੈਸਟਰਾਂ ਲਈ ਅਤੇ ਅਪ੍ਰੈਲ/ਮਈ 2026 ਵਿੱਚ ਈਵਨ ਸਮੈਸਟਰਾਂ ਲਈ ਆਯੋਜਿਤ ਕੀਤਾ ਜਾਵੇਗਾ। ਪੀ.ਜੀ. ਕੋਰਸਾਂ ਦਾ ਸਮੈਸਟਰ ਸਿਸਟਮ ਸਾਲ-2011 ਵਿੱਚ ਸ਼ੁਰੂ ਕੀਤਾ ਗਿਆ ਸੀ, ਇਸ ਲਈ ਯੂਨੀਵਰਸਿਟੀ ਅਥਾਰਿਟੀ ਨੇ ਹੁਣ ਗੋਲਡਨ ਚਾਂਸ ਦਾ ਲਾਭ ਸਿਰਫ਼ ਦਾਖਲਾ ਸਾਲ-2011 ਤੋਂ ਪੀ.ਜੀ./ਪ੍ਰੋਫੈਸ਼ਨਲ ਕੋਰਸਾਂ ਦੇ ਸਮੈਸਟਰ ਸਿਸਟਮ ਨੂੰ ਹੀ ਦਿੱਤਾ ਹੈ।

ਇਸ ਸਮੇਂ ਉਮੀਦਵਾਰ ਸਿਰਫ਼ ਔਡ ਸਮੈਸਟਰ ਗੋਲਡਨ ਚਾਂਸ ਪ੍ਰੀਖਿਆ ਲਈ ਅਰਜ਼ੀ ਦੇ ਸਕਦੇ ਹਨ। ਔਡ ਸਮੈਸਟਰਾਂ ਦੇ ਪੀਜੀ/ਪ੍ਰੋਫੈਸ਼ਨਲ ਕੋਰਸਾਂ ਲਈ ਔਨਲਾਈਨ ਅਰਜ਼ੀ ਪੋਰਟਲ ‘ਪੀਜੀਐਗਜ਼ਾਮ.ਪੀਯੂਐਗਜ਼ਾਮ.ਇਨ’ ਹੈ। ਆਨਲਾਈਨ ਅਰਜ਼ੀ ਪੋਰਟਲ 16 ਅਗਸਤ, 2025 ਤੱਕ ਖੁੱਲ੍ਹਾ ਰਹੇਗਾ। ਸਾਰੀਆਂ ਅਰਜ਼ੀਆਂ ਸਿਰਫ਼ ਆਨਲਾਈਨ ਜਮ੍ਹਾਂ ਕਰਵਾਈਆਂ ਜਾਣੀਆਂ ਚਾਹੀਦੀਆਂ ਹਨ। ਈਵਨ ਸਮੈਸਟਰਾਂ ਲਈ ਪੋਰਟਲ ਦੀ ਖੁੱਲ੍ਹਣ ਦੀ ਮਿਤੀ ਅਸਥਾਈ ਤੌਰ ’ਤੇ ਫਰਵਰੀ-2026 ਦੇ ਮਹੀਨੇ ਵਿੱਚ ਹੋਵੇਗੀ ਅਤੇ ਇਸਦੇ ਲਈ ਪ੍ਰੀਖਿਆ ਅੰਤਿਮ ਸਮੈਸਟਰ ਪ੍ਰੀਖਿਆ ਦੇ ਨਾਲ਼ ਮਈ-2026 ਵਿੱਚ ਲਈ ਜਾਵੇਗੀ। ਪੀ.ਜੀ./ਪ੍ਰੋਫੈਸ਼ਨਲ ਕੋਰਸਾਂ ਲਈ ਪ੍ਰਤੀ ਸਮੈਸਟਰ ਫੀਸ 15 ਹਜ਼ਾਰ ਰੁਪਏ ਹੈ। ਐੱਸ.ਸੀ./ਐੱਸ.ਟੀ. ਉਮੀਦਵਾਰਾਂ ਲਈ 50 ਪ੍ਰਤੀਸ਼ਤ ਰਿਆਇਤ ਹੈ। ਅਕਾਦਮਿਕ ਸਾਲ 2025-26 ਦੇ ਸਿਲੇਬਸ ਦੀ ਪਾਲਣਾ ਕੀਤੀ ਜਾਵੇਗੀ ਅਤੇ ਪ੍ਰੀਖਿਆ ਦਾ ਢੰਗ ਸਿਰਫ਼ ਆਫਲਾਈਨ ਹੋਵੇਗਾ।