ਪਿੰਡ ਚਿੱਲਾ ’ਚ ਅੱਜ ਮਨਾਈ ਜਾਵੇਗੀ ਦੀਵਾਲੀ

ਇਥੋਂ ਦੇ ਸੈਕਟਰ 81 ਵਿੱਚ ਆ ਚੁੱਕੇ ਪਿੰਡ ਚਿੱਲਾ ਦੇ ਵਸਨੀਕ 22 ਅਕਤੂਬਰ ਨੂੰ ਦੀਵਾਲੀ ਮਨਾਉਣਗੇ। ਦੀਵਾਲੀ ਤੋਂ ਦੂਜੇ ਦਿਨ ਦੀਵਾਲੀ ਮਨਾਉਣ ਦੀ ਸਦੀਆਂ ਪੁਰਾਣੀ ਪਰੰਪਰਾ ਨੂੰ ਪਿੰਡ ਵਾਸੀ ਛੱਡਣ ਲਈ ਤਿਆਰ ਨਹੀਂ। ਇਸ ਵਰ੍ਹੇ 20 ਅਤੇ 21 ਅਕਤੂਬਰ ਨੂੰ ਦੀਵਾਲੀ ਮਨਾਏ ਜਾਣ ਦੇ ਬਾਵਜੂਦ ਚਿੱਲਾ ਵਾਸੀ ਆਪਣੀ ਨਿਵੇਕਲੀ ਪਿਰਤ ਜਾਰੀ ਰੱਖਣ ਲਈ 22 ਅਕਤੂਬਰ ਨੂੰ ਦੀਵਾਲੀ ਮਨਾ ਰਹੇ ਹਨ।

ਪਿੰਡ ਚਿੱਲਾ ਦੇ ਪਤਵੰਤਿਆਂ ਨੇ ਦੱਸਿਆ ਪਿੰਡ ਦੀ ਦੀਵਾਲੀ ਤੋਂ ਦੂਜੇ ਦਿਨ ਦੀਵਾਲੀ ਮਨਾਉਣ ਦੀ ਅਨੋਖੀ ਪਿਰਤ ਸਦੀਆਂ ਪੁਰਾਣੀ ਹੈ। ਬਹੁਤ ਸਮਾਂ ਪਹਿਲਾਂ ਜਦੋਂ ਪਿੰਡ ਦੇ ਸਾਰੇ ਪਸ਼ੂ ਪਿੰਡੋਂ ਬਾਹਿਰ ਇੱਕੋ ਥਾਂ ਖੜ੍ਹਦੇ ਕਰਦੇ ਸਨ, ਉਦੋਂ ਦੀਵਾਲੀ ਵਾਲੀ ਰਾਤ ਨੂੰ ਜਦੋਂ ਪਿੰਡ ਵਾਸੀ ਦੀਵਾਲੀ ਦਾ ਮੱਥਾ ਟੇਕਣ ਦੀ ਤਿਆਰੀ ਕਰ ਰਹੇ ਸਨ ਤਾਂ ਮੱਝਾਂ ਤੇ ਹੋਰ ਪਸ਼ੂਆਂ ਦਾ ਸਮੁੱਚਾ ਵੱਗ ਆਪ-ਮੁਹਾਰੇ ਕਿੱਧਰੇ ਨਿਕਲ ਤੁਰਿਆ। ਪਿੰਡ ਵਾਸੀਆਂ ਨੂੰ ਪਤਾ ਲੱਗਣ ਉੱਤੇ ਸਾਰੇ ਮਰਦ ਪਸ਼ੂਆਂ ਦੀ ਭਾਲ ਲਈ ਚਲੇ ਗਏ।

ਮਰਦ ਮੈਂਬਰਾਂ ਦੀ ਗੈਰਹਾਜ਼ਰੀ ਵਿੱਚ ਘਰਾਂ ਵਿੱਚ ਰਹਿ ਗਈਆਂ ਔਰਤਾਂ ਨੇ ਵੀ ਦੀਵਾਲੀ ਦਾ ਮੱਥਾ ਟੇਕਣਾ ਚੰਗਾ ਨਹੀਂ ਸਮਝਿਆ। ਦੇਰ ਰਾਤੀਂ ਪਿੰਡ ਵਾਸੀ ਪਸ਼ੂਆਂ ਦੇ ਵੱਗ ਨੂੰ ਮੋੜਕੇ ਲਿਆਏ ਉਦੋਂ ਪਹਿਰ ਰਾਤ ਗੁਜ਼ਰ ਗਈ ਸੀ। ਥੱਕੇ ਟੁੱਟੇ ਪਿੰਡ ਵਾਸੀਆਂ ਨੇ ਪਸ਼ੂਆਂ ਦੇ ਆਪ ਮੁਹਾਰੇ ਜਾਣ ਨੂੰ ਅਸ਼ੁੱਭ ਮੰਨਦਿਆਂ ਦੂਜੇ ਦਿਨ ਦੀਵਾਲੀ ਦਾ ਮੱਥਾ ਟੇਕਣ ਦਾ ਫ਼ੈਸਲਾ ਕਰ ਲਿਆ।

ਸਦੀਆਂ ਪੁਰਾਣੀ ਇਸ ਘਟਨਾ ਤੋਂ ਲੈ ਕੇ ਅੱਜ ਤੱਕ ਪਿੰਡ ਚਿੱਲਾ ਦੇ ਸਮੁੱਚੇ ਵਸਨੀਕ ਦੀਵਾਲੀ ਤੋਂ ਦੂਜੇ ਦਿਨ ਦੀਵਾਲੀ ਮਨਾਉਂਦੇ ਆ ਰਹੇ ਹਨ। ਨਵੀਂ ਪੀੜ੍ਹੀ ਵੀ ਆਪਣੀ ਪਿਤਾ-ਪੁਰਖੀ ਪਰੰਪਰਾ ਨੂੰ ਛੱਡਣ ਦੇ ਰੌਂਅ ਵਿੱਚ ਨਹੀਂ ਹੈ। ਦੇਸ਼ ਦੀ ਦੀਵਾਲੀ ਵਾਲੀ ਰਾਤ ਨੂੰ ਪਿੰਡ ਦੇ ਬਹੁਤੇ ਵਸਨੀਕ ਰਿਸ਼ਤੇਦਾਰਾਂ ਦੇ ਘਰ ਦੀਵਾਲੀ ਮਨਾਉਣ ਚਲੇ ਜਾਂਦੇ ਹਨ ਤੇ ਚਿੱਲੇ ਦੀ ਦੀਵਾਲੀ ਵਾਲੇ ਦਿਨ ਪਿੰਡ ਵਿੱਚ ਮੇਲੇ ਵਰਗਾ ਮਾਹੌਲ ਬਣਿਆਂ ਹੁੰਦਾ ਹੈ।

ਹਰ ਘਰ ਵਿੱਚ ਦਰਜਨਾਂ ਮਹਿਮਾਨ ਪਿੰਡ ਚਿੱਲਾ ਦੀ ਦੀਵਾਲੀ ਮਨਾਉਣ ਆਉਂਦੇ ਹਨ। ਬਾਹਰਲੇ ਕਸਬਿਆਂ ਤੋਂ ਆ ਕੇ ਦੁਕਾਨਦਾਰ ਪਿੰਡ ਵਿੱਚ ਦੁਕਾਨਾਂ ਸਜਾਕੇ ਆਪਣੀਆਂ ਵਸਤਾਂ ਵੇਚਦੇ ਹਨ।

ਪਿੰਡ ਵਿੱਚ ਪਹਿਲਾਂ ਦੀਵਾਲੀ ਵਾਲੇ ਦਿਨ ਬੱਕਰੇ ਦੀ ਬਲੀ ਦਿੱਤੀ ਜਾਂਦੀ ਸੀ, ਇੱਕੋ ਟੱਕ ਨਾਲ ਬੱਕਰਾ ਵੱਢਣ ਨੂੰ ਲੈ ਕੇ ਕਈਂ ਵੇਰ ਤੂੰ-ਤੂੰ, ਮੈਂ-ਮੈਂ ਹੋ ਜਾਂਦੀ ਸੀ ਪਰ ਕਈਂ ਦਹਾਕਿਆਂ ਤੋਂ ਇਹ ਪਿਰਤ ਬੰਦ ਕਰ ਦਿੱਤੀ ਗਈ ਹੈ ਪਰ ਦੀਵਾਲੀ ਤੋਂ ਦੂਜੇ ਦਿਨ ਦੀਵਾਲੀ ਮਨਾਏ ਜਾਣ ਦੀ ਪਰੰਪਰਾ ਜਾਰੀ ਹੈ।