ਗੁਰੂ ਤੇਗ ਬਹਾਦਰ ਜੀ ਦੇ 350ਵੇਂ ਸ਼ਹੀਦੀ ਸਮਾਗਮਾਂ ’ਤੇ 95 ਕਿਲੋ ਦਸਤਾਰ, 100 ਸਾਲ ਪੁਰਾਣਾ ਨਗਾਰਾ ਬਣਿਆ ਸੰਗਤਾਂ ਦਾ ਖਿੱਚ ਦਾ ਕੇਂਦਰ

ਸ੍ਰੀ ਗੁਰੂ ਤੇਗ ਬਹਾਦਰ ਜੀ ਦੇ 350ਵੇਂ ਸ਼ਹੀਦੀ ਦਿਹਾੜੇ ਨੂੰ ਸਮਰਪਿਤ ਸ੍ਰੀ ਆਨੰਦਪੁਰ ਸਾਹਿਬ ਵਿਖੇ ਚੱਲ ਰਹੇ ਯਾਦਗਾਰੀ ਸਮਾਗਮਾਂ ਵਿੱਚ ਸ਼ਰਧਾ ਦੇ ਅਦਭੁਤ ਨਜ਼ਾਰੇ ਦੇਖਣ ਨੂੰ ਮਿਲੇ।

ਉੜੀਸਾ ਤੋਂ ਵਿਸ਼ੇਸ਼ ਤੌਰ ’ਤੇ ਪਹੁੰਚੇ ਬਾਬਾ ਅਵਤਾਰ ਸਿੰਘ, 95 ਕਿਲੋ ਦੀ ਹੈਰਾਨੀਜਨਕ ਦਸਤਾਰ ਸਜਾ ਕੇ ਪਵਿੱਤਰ ਨਗਰੀ ਪਹੁੰਚੇ, ਜਿਸ ਕਾਰਨ ਉਹ ਸੰਗਤਾਂ ਵਿੱਚ ਖਿੱਚ ਦਾ ਮੁੱਖ ਕੇਂਦਰ ਬਣ ਗਏ।

ਉਨ੍ਹਾਂ ਦੀ ਇਹ ਵਿਸ਼ਾਲ ਪੱਗ, ਜਿਸ ਨੂੰ ਸਿੱਖ ਪਰੰਪਰਾ ਅਨੁਸਾਰ ਬੜੀ ਮਿਹਨਤ ਨਾਲ ਸਜਾਇਆ ਗਿਆ ਸੀ, ਨੌਵੇਂ ਗੁਰੂ ਜੀ ਅਤੇ ਉਨ੍ਹਾਂ ਦੀਆਂ ਸਿੱਖਿਆਵਾਂ ਪ੍ਰਤੀ ਡੂੰਘੇ ਸਤਿਕਾਰ ਦਾ ਪ੍ਰਤੀਕ ਸੀ। ਸ਼ਰਧਾਲੂ ਵੱਡੀ ਗਿਣਤੀ ਵਿੱਚ ਉਨ੍ਹਾਂ ਦੇ ਆਲੇ-ਦੁਆਲੇ ਇਕੱਠੇ ਹੋਏ ਅਤੇ ਉਨ੍ਹਾਂ ਦੀ ਸਰੀਰਕ ਸਹਿਣਸ਼ੀਲਤਾ ਅਤੇ ਅਧਿਆਤਮਿਕ ਵਚਨਬੱਧਤਾ ’ਤੇ ਹੈਰਾਨੀ ਪ੍ਰਗਟਾਈ।

‘ਟ੍ਰਿਬਿਊਨ’ ਨਾਲ ਗੱਲ ਕਰਦਿਆਂ ਬਾਬਾ ਅਵਤਾਰ ਸਿੰਘ ਨੇ ਕਿਹਾ ਕਿ ਉਨ੍ਹਾਂ ਨੇ ਇਹ ਉਪਰਾਲਾ ਸਿੱਖੀ ਦਾ ਸੰਦੇਸ਼ ਫੈਲਾਉਣ ਅਤੇ ਗੁਰੂ ਤੇਗ ਬਹਾਦਰ ਜੀ ਦੁਆਰਾ ਦਰਸਾਏ ਗਏ ਕੁਰਬਾਨੀ, ਹਿੰਮਤ ਅਤੇ ਸਰਬ-ਸਾਂਝੀਵਾਲਤਾ ਦੇ ਕਦਰਾਂ-ਕੀਮਤਾਂ ਨੂੰ ਉਜਾਗਰ ਕਰਨ ਲਈ ਕੀਤਾ ਹੈ।

ਅੰਮ੍ਰਿਤਸਰ ਤੋਂ ਮਹੰਤ ਬਾਬਾ ਦਰਸ਼ਨ ਦਾਸ ਵੀ ਆਪਣਾ ਰਵਾਇਤੀ ਨਗਾਰਾ ਲੈ ਕੇ ਪਹੁੰਚੇ, ਜਿਸ ਬਾਰੇ ਉਹ ਦਾਅਵਾ ਕਰਦੇ ਹਨ ਕਿ ਇਹ 100 ਸਾਲ ਪੁਰਾਣਾ ਹੈ। ਮਹੰਤ ਵੱਲੋਂ ਮਹਾਨ ਗੁਰੂ ਜੀ ਦੀ ਮਹਾਨ ਕੁਰਬਾਨੀ ਨੂੰ ਸਤਿਕਾਰ ਦੇਣ ਲਈ ਇਸ ਇਤਿਹਾਸਕ ਨਗਾਰੇ ਨੂੰ ਵਜਾਇਆ ਗਿਆ, ਜਿਸ ਦੀ ਆਵਾਜ਼ ਪਿਛਲੀ ਸਦੀ ਤੋਂ ਅਨੇਕਾਂ ਮਹੱਤਵਪੂਰਨ ਸਿੱਖ ਸਮਾਗਮਾਂ ਦਾ ਹਿੱਸਾ ਰਹੀ ਹੈ, ਪੂਰੇ ਸਥਾਨ ਵਿੱਚ ਗੂੰਜ ਰਹੀ ਸੀ।

ਉਨ੍ਹਾਂ ਦੀ ਹਾਜ਼ਰੀ -ਇੱਕ ਮਹਾਨ ਦਸਤਾਰ ਨਾਲ ਅਤੇ ਦੂਜਾ ਇੱਕ ਸਦੀ ਪੁਰਾਣੇ ਨਗਾਰੇ ਨਾਲ , ਨੇ ਚੱਲ ਰਹੇ ਸਮਾਗਮਾਂ ਵਿੱਚ ਵਿਰਾਸਤ ਅਤੇ ਸ਼ਰਧਾ ਦੀ ਡੂੰਘੀ ਭਾਵਨਾ ਨੂੰ ਜੋੜਿਆ, ਜਿਸ ਨਾਲ ਪਵਿੱਤਰ ਨਗਰੀ ਵਿੱਚ ਅਧਿਆਤਮਿਕ ਮਾਹੌਲ ਹੋਰ ਵੀ ਵਧ ਗਿਆ।