ਬਨੂੜ ਮੰਡੀ ’ਚ 600 ਕੁਇੰਟਲ ਝੋਨਾ ਵਿਕਿਆ

ਬਨੂੜ ਦੀ ਅਨਾਜ ਮੰਡੀ ਵਿਚ ਅੱਜ ਹਲਕਾ ਰਾਜਪੁਰਾ ਦੀ ਵਿਧਾਇਕਾ ਨੀਨਾ ਮਿੱਤਲ ਨੇ ਝੋਨੇ ਦੀ ਸਰਕਾਰੀ ਖ਼ਰੀਦ ਸ਼ੁਰੂ ਕਰਵਾਈ। ਇਸ ਮੌਕੇ ਪਨਗ੍ਰੇਨ ਦੇ ਇੰਸਪੈਕਟਰ ਦੀਪਕ ਸਿਨਹਾ, ਮਾਰਕੀਟ ਕਮੇਟੀ ਦੇ ਸਕੱਤਰ ਗੁਰਨਾਮ ਸਿੰਘ ਸਮੇਤ ਸਮੁੱਚੀਆਂ ਖਰੀਦ ਏਜੰਸੀਆਂ ਦੇ ਕਰਮਚਾਰੀ ਹਾਜ਼ਰ ਸਨ। ਪਹਿਲੇ ਦਿਨ ਸ਼ੁਰੂ ਹੋਈ ਸਰਕਾਰੀ ਖਰੀਦ ਤਹਿਤ 600 ਕੁਇੰਟਲ ਦੇ ਕਰੀਬ ਜ਼ੀਰੀ ਦੀ ਖਰੀਦ ਕੀਤੀ ਗਈ।

ਵਿਧਾਇਕਾ ਨੀਨਾ ਮਿੱਤਲ ਨੇ ਮਾਰਕੀਟ ਕਮੇਟੀ ਦਫ਼ਤਰ ਵਿੱਚ ਮੰਡੀ ਦੇ ਆੜ੍ਹਤੀਆਂ ਤੇ ਅਧਿਕਾਰੀਆਂ ਨਾਲ ਮੀਟਿੰਗ ਕਰਕੇ ਖ਼ਰੀਦ ਪ੍ਰਬੰਧਾਂ ਦਾ ਜਾਇਜ਼ਾ ਲਿਆ। ਇਸ ਦੌਰਾਨ ਉਨਾਂ ਏ ਐਸ ਟੀ ਟ੍ਰੇਡਰਜ਼ ਕੋਲ ਆਈ ਧਰਮਗੜ੍ਹ ਦੇ ਕਿਸਾਨ ਜਗਤਾਰ ਸਿੰਘ, ਗੁਲਾਟੀ ਟ੍ਰੇਡਰਜ਼ ਕੋਲ ਆਈ ਅਜੀਜ਼ਪੁਰ ਦੇ ਕਿਸਾਨ ਜਸਵਿੰਦਰ ਸਿੰਘ, ਜੈਨ ਟ੍ਰੇਡਰਜ਼ ਦੀ ਢੇਰੀ ਦੀ ਖਰੀਦ ਕਰਾਈ। ਇਸ ਮੌਕੇ ਆੜਤੀਆਂ ਨੇ ਲੱਡੂ ਵੰਡੇ।

ਵਿਧਾਇਕਾ ਨੀਨਾ ਮਿੱਤਲ ਨੇ ਕਿਹਾ ਕਿ ਬਨੂੜ ਮੰਡੀ ਵਿਚ ਕਿਸਾਨਾਂ ਨੂੰ ਖਰੀਦ ਸਬੰਧੀ ਕੋਈ ਮੁਸ਼ਕਲ ਨਹੀਂ ਆਉਣ ਦਿੱਤੀ ਜਾਵੇਗੀ। ਉਨ੍ਹਾਂ ਕਿਸਾਨਾਂ ਨੂੰ ਅਪੀਲ ਕੀਤੀ ਕਿ ਇਸ ਵਾਰ ਮੀਂਹ ਵੱਧ ਪੈਣ ਕਾਰਨ ਝੋਨੇ ਵਿੱਚ ਨਮੀ ਦੀ ਮਾਤਰਾ ਵੱਧ ਹੋਵੇਗੀ, ਇਸ ਲਈ ਕਿਸਾਨ ਸਿਰਫ਼ ਸੁੱਕਾ ਝੋਨਾ ਲੈ ਕੇ ਹੀ ਮੰਡੀ ਵਿੱਚ ਆਉਣ ਤਾਂ ਜੋ ਉਨ੍ਹਾਂ ਨੂੰ ਝੋਨਾ ਵੇਚਣ ਵਿੱਚ ਕੋਈ ਮੁਸ਼ਕਲ ਨਾ ਆਵੇ।

ਇਸ ਮੌਕੇ ਮੰਡੀ ਸੁਪਰਵਾਈਜ਼ਰ ਗੁਰਮੀਤ ਸਿੰਘ ਧਾਲੀਵਾਲ, ਆੜ੍ਹਤੀ ਯੂਨੀਅਨ ਦੇ ਜ਼ਿਲ੍ਹਾ ਪ੍ਰਧਾਨ ਪੁਨੀਤ ਜੈਨ, ਸਚਿਨ ਜੈਨ, ਰੂਬਲ ਗੁਲਾਟੀ, ਬਿੱਟੂ ਪਾਸੀ, ਧਰਮਪਾਲ ਪਿੰਕੀ, ਵਿੱਕੀ ਸਿੰਗਲਾ, ਅਰਵਿੰਦ ਟੋਨੀ, ਪਿੰਕਾ ਜੈਨ, ਅੰਮਿਤ ਜੈਨ, ਸੋਨੂੰ ਜੈਨ ਸਮੇਤ ਆਪ ਦੇ ਬਲਾਕ ਪ੍ਰਧਾਨ ਲੱਕੀ ਸੰਧੂ ਅਤੇ ਟਰੱਕ ਯੂਨੀਅਨ ਦੇ ਪ੍ਰਧਾਨ ਕੁਲਵਿੰਦਰ ਸਿੰਘ ਜੰਗਪੁਰਾ ਹਾਜ਼ਰ ਸਨ।