ਟੋਕੀਓ, 4 ਅਗਸਤ
ਨੀਦਰਲੈਂਡ ਦੀ ਮਹਿਲਾ ਹਾਕੀ ਟੀਮ ਨੇ 2016 ਦੀ ਰੀਓ ਓਲੰਪਿਕਸ ਦੀ ਚੈਂਪੀਅਨਸ਼ਿਪ ਟੀਮ ਬ੍ਰਿਟੇਨ ਨੂੰ 5-1 ਨਾਲ ਹਰਾ ਕੇ ਟੋਕੀਓ ਓਲੰਪਿਕ ਦੇ ਫਾਈਨਲ ਵਿੱਚ ਥਾਂ ਬਣਾ ਲਈ ਹੈ। ਨੀਦਰਲੈਂਡ ਦੀ ਟੀਮ ਨੇ ਗੇਮ ਦੇ ਪਹਿਲੇ ਹਾਫ ਵਿੱਚ ਹੀ ਚੜ੍ਹਤ ਬਣਾ ਲਈ ਸੀ ਜਦੋਂ ਟੀਮ ਦੀ ਖਿਡਾਰਨ ਲਾਰੀਏਨ ਲੌਰਿੰਕ ਨੇ ਵਿਰੋਧੀ ਟੀਮ ਬ੍ਰਿਟੇਨ ਨੂੰ ਝਕਾਨੀ ਦਿੰਦਿਆਂ ਆਪਣੀ ਟੀਮ ਦੀ 21 ਵਰ੍ਹਿਆਂ ਦੀ ਖਿਡਾਰਨ ਫੈਲਿਸ ਐਬਰਟ ਨੂੰ ਪਾਸ ਦਿੱਤਾ ਜਿਸ ਨੇ ਸਿੱਧਾ ਗੋਲ ਕਰ ਦਿੱਤਾ ਤੇ ਗੇਂਦ ਬ੍ਰਿਟਿਸ਼ ਗੋਲਕੀਪਰ ਮੈਡੇਲਿਨ ਹਿੰਚ ਦੀਆਂ ਲੱਤਾਂ ਵਿੱਚੋਂ ਲੰਘਦੀ ਹੋਈ ਗੋਲਪੋਸਟ ਵਿੱਚ ਦਾਖਲ ਹੋ ਗਈ। ਜ਼ਿਕਰਯੋਗ ਹੈ ਕਿ ਨੀਦਰਲੈਂਡ ਦੀ ਮਹਿਲਾ ਹਾਕੀ ਟੀਮ ਓਲੰਪਿਕ ਖੇਡਾਂ ਵਿੱਚ ਪੰਜਵੀ ਵਾਰ ਹਾਕੀ ਫਾਈਨਲ ਵਿੱਚ ਦਾਖਲ ਹੋਈ ਹੈ। ਟੀਮ ਨੇ 2016 ਦੀ ਰੀਓ ਓਲੰਪਿਕ ਖੇਡਾਂ ਵਿੱਚ ਚਾਂਦੀ ਦਾ ਤਗਮਾ ਜਿੱਤਿਆ ਸੀ। -ਪੀਟੀਆਈ