ਜੋਗਿੰਦਰ ਸਿੰਘ ਓਬਰਾਏ
ਦੋਰਾਹਾ, 13 ਜੁਲਾਈ
ਲੰਘੀ ਦੇਰ ਰਾਤ ਆਈ ਤੇਜ਼ ਹਨੇਰੀ ਕਾਰਨ ਦੋਰਾਹਾ-ਪਾਇਲ ਰੋਡ ’ਤੇ ਵੱਡੇ ਦਰੱਖਤ ਡਿੱਗਣ ਅਤੇ ਬਿਜਲੀ ਟਰਾਂਸਫਾਰਮਰਾਂ ਸਮੇਤ ਬਿਜਲੀ ਦੇ ਖੰਭੇ ਡਿੱਗਣ ਨਾਲ ਇਹ ਮਾਰਗ ਬਿਲਕੁਲ ਬੰਦ ਹੋ ਗਿਆ। ਦਰੱਖਤ ਡਿੱਗਣ ਨਾਲ ਜਿੱਥੇ ਜੰਗਲਾਤ ਵਿਭਾਗ ਦਾ ਮਾਲੀ ਨੁਕਸਾਨ ਹੋਇਆ ਉਥੇ ਹੀ ਬਿਜਲੀ ਵਿਭਾਗ ਦੇ ਦੋ ਟਰਾਂਸਫਾਰਮਰ ਵੀ ਨੁਕਸਾਨੇ ਗਏ। ਇਸ ਤੋਂ ਇਲਾਵਾ ਤੇਜ਼ ਹਵਾਵਾਂ ਕਾਰਨ ਬਿਜਲੀ ਦੇ ਕਰੀਬ 25 ਖੰਭੇ ਵੀ ਟੁੱਟ ਗਏ, ਜਿਸ ਕਾਰਨ ਪਿੰਡਾਂ ਦੀ 24 ਘੰਟੇ ਸਪਲਾਈ ਪ੍ਰਭਾਵਿਤ ਹੋ ਗਈ ਅਤੇ ਕਿਸਾਨਾਂ ਦੀਆਂ ਮੋਟਰਾਂ ਦੀ ਸਪਲਾਈ ਬੰਦ ਹੋ ਜਾਣ ਕਾਰਨ ਕਿਸਾਨ ਵੀ ਚਿੰਤਾ ਦੇ ਆਲਮ ਵਿਚ ਹਨ। ਪਾਇਲ ਪੁਲੀਸ ਨੇ ਮੌਕੇ ਦੀ ਨਜ਼ਾਕਤ ਮੁਤਾਬਿਕ ਦੋਰਾਹਾ ਪਾਇਲ ਮਾਰਗ ਬੰਦ ਕਰਵਾ ਦਿੱਤਾ ਤਾਂ ਜੋ ਕਿਸੇ ਮੰਦਭਾਗੀ ਘਟਨਾ ਤੋਂ ਬਚਿਆ ਜਾ ਸਕੇ। ਵਣ ਵਿਭਾਗ ਦੇ ਕਰਮਚਾਰੀ ਸੁਰਿੰਦਰ ਸਿੰਘ ਨੇ ਕਿਹਾ ਕਿ ਸਾਗਵਾਨ ਦੇ ਪੰਜ ਅਤੇ ਸੱਤ ਕੁ ਦਰਖਤ ਕਜੇਲੀਆਂ ਪਲਾਂਟ ਦੇ ਟੁੱਟੇ ਹਨ ਬਾਕੀ ਤਾਂ ਭਾਰੀ ਦਰਖਤਾਂ ਦੇ ਟਾਹਣੇ ਟੁੱਟੇ ਹਨ। ਸਵੇਰ ਤੱਕ ਰਸਤਾ ਸਾਫ ਕਰ ਦਿੱਤਾ ਜਾਵੇਗਾ।