ਮਨਧੀਰ ਸਿੰਘ ਦਿਓਲ
ਨਵੀਂ ਦਿੱਲੀ, 15 ਸਤੰਬਰ
ਦਿੱਲੀ ਦੇ ਉਪ ਮੁੱਖ ਮੰਤਰੀ ਮਨੀਸ਼ ਸਿਸੋਦੀਆ ਨੇ ਕਿਹਾ ਕਿ ਦਿੱਲੀ ਸਰਕਾਰ ਨੇ ਕੋਵਿਡ -19 ਕਾਰਨ ਪਿਛਲੇ ਸਾਲ 41 ਫ਼ੀਸਦੀ ਘੱਟ ਮਾਲੀਆ ਕਮਾਇਆ। ਉਨ੍ਹਾਂ ਕਿਹਾ ਕਿ ਚਾਲੂ ਵਿੱਤੀ ਸਾਲ ਵਿੱਚ ਪੈਦਾ ਹੋਈ ਆਮਦਨ 23 ਫ਼ੀਸਦੀ ਘੱਟ ਹੈ। ਸਿਸੋਦੀਆ ਨੇ ਕਿਹਾ ਕਿ ਨਵੀਂ ਆਬਕਾਰੀ ਨੀਤੀ ਤਹਿਤ ਦਿੱਲੀ ਅਗਲੇ 12 ਮਹੀਨਿਆਂ ਵਿੱਚ 3,000 ਕਰੋੜ ਰੁਪਏ ਦੀ ਵਾਧੂ ਆਮਦਨੀ ਕਮਾਏਗੀ। ਇਸ ਦੇ ਨਾਲ ਹੀ ਉਸ ਨੂੰ ਸ਼ਹਿਰ ਦੇ 32 ਜ਼ੋਨਾਂ ਵਿੱਚ ਸ਼ਰਾਬ ਦੇ ਸਟੋਰਾਂ ਦੀ ਬੋਲੀ ਤੋਂ ਲਗਪਗ 10,000 ਕਰੋੜ ਰੁਪਏ ਦੀ ਕਮਾਈ ਹੋਣ ਦੀ ਉਮੀਦ ਹੈ। ਉਨ੍ਹਾਂ ਅੱਗੇ ਕਿਹਾ ਕਿ ਕਰੋਨਾ ਕਾਰਨ ਆਰਥਿਕ ਗਤੀਵਿਧੀਆਂ ਦੇ ਬੰਦ ਹੋਣ ਤੇ ਕੇਂਦਰ ਸਰਕਾਰ ਵੱਲੋਂ ਕੇਂਦਰੀ ਟੈਕਸਾਂ ਵਿੱਚ ਕਮੀ ਕਰਨ ਕਾਰਨ ਦਿੱਲੀ ਦੀ ਮਾਲੀਆ ਪ੍ਰਾਪਤੀ ਵਿੱਚ ਭਾਰੀ ਕਮੀ ਆਈ ਹੈ। ਇਸ ਦੇ ਨਾਲ ਹੀ ਕੇਂਦਰ ਸਰਕਾਰ ਵੱਲੋਂ ਜੀਐੱਸਟੀ ਮੁਆਵਜ਼ਾ ਦੇਣਾ ਬੰਦ ਕਰਨ ਲਈ ਦਿੱਲੀ ਸਰਕਾਰ ਦੀ ਆਮਦਨੀ ਅਗਲੇ ਸਾਲ ਤੋਂ 8000 ਕਰੋੜ ਰੁਪਏ ਘੱਟ ਜਾਵੇਗੀ। ਦਿੱਲੀ ਨੂੰ ਕੇਂਦਰੀ ਟੈਕਸਾਂ ਵਿੱਚ ਸਿਰਫ 325 ਕਰੋੜ ਰੁਪਏ ਮਿਲਦੇ ਹਨ ਜਦੋਂ ਕਿ ਕੇਂਦਰੀ ਟੈਕਸਾਂ ਵਿੱਚ ਦਿੱਲੀ ਸਰਕਾਰ ਦਾ ਹਿੱਸਾ 1 ਲੱਖ 40 ਹਜ਼ਾਰ ਕਰੋੜ ਰੁਪਏ ਹੈ। ਉਨ੍ਹਾਂ ਕਿਹਾ ਕਿ ਦਿੱਲੀ ਸਰਕਾਰ ਨੂੰ ਪਿਛਲੇ 20 ਸਾਲਾਂ ਤੋਂ ਕੇਂਦਰ ਸਰਕਾਰ ਤੋਂ ਕੇਂਦਰੀ ਟੈਕਸਾਂ ਵਿੱਚੋਂ ਸਿਰਫ 325 ਕਰੋੜ ਰੁਪਏ ਮਿਲੇ ਹਨ। ਜਦੋਂ ਕਿ ਦਿੱਲੀ ਕੇਂਦਰੀ ਟੈਕਸਾਂ ਵਿੱਚ 1 ਕਰੋੜ 40 ਲੱਖ ਰੁਪਏ ਦਾ ਯੋਗਦਾਨ ਪਾਉਂਦੀ ਹੈ। ਉਨ੍ਹਾਂ ਕਿਹਾ ਕਿ ਇਸ ਵੇਲੇ ਦਿੱਲੀ ਸਰਕਾਰ ਦਾ ਜੀਐਸਟੀ 23 ਫ਼ੀਸਦ ਵੈਟ 25 ਫ਼ੀਸਦ, ਆਬਕਾਰੀ 30 ਫ਼ੀਸਦ, ਸਟੈਂਪ 16 ਫ਼ੀਸਦ ਅਤੇ ਮੋਟਰ ਵਹੀਕਲ ਟੈਕਸ 19 ਫ਼ੀਸਦ ਘਟਿਆ ਹੈ। ਮਨੀਸ਼ ਸਿਸੋਦੀਆ ਨੇ ਕਿਹਾ ਕਿ ਹੁਣ ਤੱਕ ਸ਼ਰਾਬ ਦੀ ਦੁਕਾਨ ਦੀ ਲਾਇਸੈਂਸ ਫੀਸ 8-10 ਲੱਖ ਰੁਪਏ ਤੇ ਆਬਕਾਰੀ ਡਿਊਟੀ 300 ਫ਼ੀਸਦ ਸੀ। ਦਿੱਲੀ ਸਰਕਾਰ ਨੇ ਪ੍ਰਤੀ ਦੁਕਾਨ ਲਾਇਸੈਂਸ ਫੀਸ 6-7 ਕਰੋੜ ਰੁਪਏ ਵਧਾ ਦਿੱਤੀ ਤੇ ਬੋਲੀ 10 ਫ਼ੀਸਦ ਹੋਰ ਵਧਾ ਦਿੱਤੀ। ਉਨ੍ਹਾਂ ਕਿਹਾ ਕਿ ਇਨ੍ਹਾਂ ਤਬਦੀਲੀਆਂ ਤੋਂ ਬਾਅਦ ਸਰਕਾਰ ਦਾ ਮੁਲਾਂਕਣ ਸੀ ਕਿ ਇਸ ਨਾਲ ਲਗਪਗ 2500 ਕਰੋੜ ਦੀ ਆਮਦਨ ਵਧੇਗੀ। ਸਰਕਾਰ ਨਵੰਬਰ 2021 ਤੋਂ ਹਰ ਸਾਲ ਲਗਪਗ 3500 ਕਰੋੜ ਰੁਪਏ ਦੀ ਆਮਦਨ ਪ੍ਰਾਪਤ ਕਰੇਗੀ।