ਬੀਰਬਲ ਰਿਸ਼ੀ
ਸ਼ੇਰਪੁਰ, 24 ਸਤੰਬਰ
ਕਸਬੇ ਦੇ ਨਾਲ ਲੱਗਦੇ ਪਿੰਡਾਂ ਵਿੱਚ ਅੱਜ ਸਵੇਰ ਤੋਂ ਪੈ ਰਹੇ ਮੀਂਹ ਕਾਰਨ ਕਿਸਾਨ ਦਾ ਡੰਗਰਾਂ ਵਾਲਾ ਕਮਰਾ ਢਹਿ-ਢੇਰੀ ਹੋ ਗਿਆ। ਮਲਬੇ ਹੇਠ ਦੱਬਣ ਕਾਰਨ ਸੂਣ ਵਾਲੀ ਮੱਝ ਦੀ ਮੌਤ ਹੋ ਗਈ ਜਦੋਂ ਕਿ ਚਾਰ ਪਸ਼ੂ ਜਖ਼ਮੀ ਹੋ ਗਏ। ਨਾਇਬ ਤਹਿਸੀਲਦਾਰ ਭੁਪਿੰਦਰ ਸਿੰਘ ਨੇ ਸ਼ੇਰਪੁਰ ਦੇ ਪਟਵਾਰੀ ਤੋਂ ਮਾਮਲੇ ਦੀ ਰਿਪੋਰਟ ਮੰਗ ਲਈ ਹੈ।
ਮੌਕੇ ’ਤੇ ਜਾਇਜ਼ਾ ਲੈਣ ਗਏ ਪਟਵਾਰੀ ਮੱਖਣ ਲਾਲ ਨੇ ਦੱਸਿਆ ਕਿ ਸ਼ੇਰਪੁਰ ਤੋਂ ਅਲਾਲ ਸੜਕ ਤੋਂ ਥੋੜ੍ਹਾ ਹਟ ਕੇ ਕਿਸਾਨ ਨਾਜ਼ਰ ਸਿੰਘ ਦਾ ਘਰ ਹੈ ਜਿਸ ਦਾ ਅੱਗੇ ਡੰਗਰਾਂ ਵਾਲਾ ਕਮਰਾ ਤੇਜ਼ ਮੀਂਹ ਕਾਰਨ ਡਿੱਗ ਪਿਆ। ਮਲਬੇ ਹੇਠ ਆ ਕੇ ਮਰੀ ਮੱਝ ਸੂਣ ਵਾਲੀ ਸੀ ਜਿਸ ਦੀ ਕੀਮਤ 1 ਲੱਖ ਰੁਪਏ ਦੱਸੀ ਜਾ ਰਹੀ ਹੈ ਜਦੋਂ ਕਿ ਇੱਕ ਗਾਂ, ਇੱਕ ਕੱਟੀ ਤੇ ਦੋ ਝੋਟੀਆਂ ਗੰਭੀਰ ਰੂਪ ਵਿੱਚ ਜ਼ਖਮੀ ਹੋ ਗਈਆਂ।
ਮੀਂਹ ਕਾਰਨ ਛੱਤ ਡਿੱਗੀ; ਪਰਿਵਾਰ ਦਾ ਬਚਾਅ
ਪਾਤੜਾਂ (ਗੁਰਨਾਮ ਸਿੰਘ ਚੌਹਾਨ): ਪਿੰਡ ਗੁਲਜ਼ਾਰਪੁਰਾ (ਠਰੂਆ) ਵਿੱਚ ਪਿਛਲੇ ਤਿੰਨ ਦਿਨਾਂ ਤੋਂ ਹੋ ਰਹੀ ਬਰਸਾਤ ਕਾਰਨ ਇਕ ਵਿਅਕਤੀ ਦੇ ਮਕਾਨ ਦੀ ਛੱਤ ਡਿੱਗ ਗਈ ਜਿਸ ਕਾਰਨ ਘਰੇਲੂ ਸਾਮਾਨ ਨੁਕਸਾਨਿਆ ਗਿਆ। ਕ੍ਰਿਸ਼ਨ ਰਾਮ ਤੇ ਉਸ ਦੀ ਪਤਨੀ ਪੋਹਲੀ ਦੇਵੀ ਨੇ ਦੱਸਿਆ ਕਿ ਬਰਸਾਤ ਕਾਰਨ ਰਾਤ ਨੂੰ ਪੂਰਾ ਪਰਿਵਾਰ ਘਰ ਦੇ ਅੰਦਰ ਸੁੱਤਾ ਪਿਆ ਸੀ ਕਿ ਅਚਾਨਕ ਸਵੇਰੇ 3-4 ਵਜੇ ਮਕਾਨ ਦੀ ਬਾਲਿਆਂਵਾਲੀ ਛੱਤ ਵਿੱਚੋਂ ਕੜ-ਕੜਾਹਟ ਦੀ ਆਵਾਜ਼ ਆਈ। ਇਸ ’ਤੇ ਕ੍ਰਿਸ਼ਨ ਰਾਮ ਆਪਣੇ ਪਰਿਵਾਰ ਨੂੰ ਜਗਾ ਕੇ ਬਾਹਰ ਲੈ ਆਇਆ ਤੇ ਮਕਾਨ ਦੀ ਛੱਤ ਡਿੱਗ ਗਈ। ਮਲਬੇ ਹੇਠ ਦੱਬਣ ਕਾਰਨ ਘਰੇਲੂ ਸਾਮਾਨ ਨੁਕਸਾਨਿਆ ਗਿਆ। ਕ੍ਰਿਸ਼ਨ ਰਾਮ ਨੇ ਦੱਸਿਆ ਕਿ ਕਈ ਵਾਰ ਮਕਾਨ ਦੀ ਮੁਰੰਮਤ ਕਰਨ ਲਈ ਸਰਕਾਰ ਨੂੰ ਕਈ ਵਾਰ ਅਪੀਲ ਕੀਤੀ ਹੈ ਪਰ ਕੋਈ ਸੁਣਵਾਈ ਨਹੀਂ ਹੋਈ। ਉਨ੍ਹਾਂ ਸਰਕਾਰ ਤੋਂ ਮੰਗ ਕੀਤੀ ਕਿ ਉਨ੍ਹਾਂ ਦੀ ਮਾਲੀ ਸਹਾਇਤਾ ਕੀਤੀ ਜਾਵੇ ਜਿਸ ਨਾਲ ਮਕਾਨ ਦੀ ਮੁਰੰਮਤ ਹੋ ਸਕੇ।