ਜੰਮੂ, 19 ਅਕਤੂਬਰ
ਇੱਥੇ ਪਹਾੜੀ ਇਲਾਕਿਆਂ ਵਿੱਚ ਭਾਰੀ ਬਰਫ਼ਬਾਰੀ ਕਾਰਨ ਮੁਗਲ ਰੋਡ ’ਤੇ ਆਵਾਜਾਈ ਮੁਅੱਤਲ ਕਰਨ ਕਰਕੇ ਫਸੇ ਲਗਪਗ 70 ਯਾਤਰੀਆਂ ਨੂੰ ਬਚਾਅ ਲਿਆ ਗਿਆ ਅਤੇ ਸੜਕ ਤੋਂ ਬਰਫ਼ ਹਟਾ ਦਿੱਤੀ ਗਈ ਹੈ। ਅਧਿਕਾਰੀਆਂ ਨੇ ਅੱਜ ਇਹ ਜਾਣਕਾਰੀ ਦਿੱਤੀ। ਹਾਲਾਂਕਿ ਜੰਮੂ ਦੇ ਪੁਣਛ ਅਤੇ ਦੱਖਣੀ ਕਸ਼ਮੀਰ ਜ਼ਿਲ੍ਹੇ ਦੇ ਸ਼ੋਪੀਆਂ ਨੂੰ ਜੋੜਨ ਵਾਲੀ ਸੜਕ ’ਤੇ ਤਿਲਕਣ ਹੋਣ ਕਾਰਨ ਆਵਾਜਾਈ ਬਹਾਲ ਨਹੀਂ ਕੀਤੀ ਗਈ। ਉਨ੍ਹਾਂ ਦੱਸਿਆ ਕਿ ਮੰਗਲਵਾਰ ਸ਼ਾਮ ਨੂੰ ਪਹਾੜੀ ਇਲਾਕਿਆਂ ਵਿੱਚ ਭਾਰੀ ਬਰਫ਼ਬਾਰੀ ਕਾਰਨ ਦਰਜਨਾਂ ਵਾਹਨ ਪੁਣਛ ਦੇ ਪੀਰ ਕੀ ਗਲੀ ਅਤੇ ਪੋਸ਼ਾਨਾ ਵਿਚਾਲੇ ਫਸ ਗਏ ਸਨ। ਅਧਿਕਾਰੀਆਂ ਮੁਤਾਬਕ ਪੁਲੀਸ ਅਤੇ ਫੌਜ ਵੱਲੋਂ ਸਾਂਝਾ ਬਚਾਅ ਅਪਰੇਸ਼ਨ ਸਵੇਰੇ 9 ਵਜੇ ਸ਼ੁਰੂ ਕੀਤਾ ਗਿਆ ਜੋ ਆਖਰੀ ਰਿਪੋਰਟਾਂ ਮਿਲਣ ਤੱਕ ਜਾਰੀ ਸੀ। ਡੀਐੱਸਪੀ (ਟਰੈਫਿਕ) ਆਫਤਾਬ ਸ਼ਾਹ ਨੇ ਕਿਹਾ, ‘‘ਪੰਦਰਾਂ ਹਲਕੇ ਵਾਹਨਾਂ ਸਣੇ 28 ਵਾਹਨਾਂ ਵਿੱਚੋਂ ਲੱਗਪਗ 70 ਯਾਤਰੀਆਂ ਨੂੰ ਬਚਾਅ ਲਿਆ ਗਿਆ ਅਤੇ ਉਨ੍ਹਾਂ ਨੂੰ ਸੁਰੱਖਿਅਤ ਥਾਵਾਂ ’ਤੇ ਪਹੁੰਚਾਇਆ ਗਿਆ ਹੈ।’’ ਉਨ੍ਹਾਂ ਦੱਸਿਆ ਕਿ ਹਾਈਵੇਅ ਤੋਂ ਬਰਫ਼ ਹਟਾ ਦਿੱਤੀ ਗਈ ਹੈ। -ਪੀਟੀਆਈ