ਨਵੀਂ ਦਿੱਲੀ: ਸੀਬੀਡੀਟੀ ਨੇ ਅੱਜ ਦਾਅਵਾ ਕੀਤਾ ਹੈ ਕਿ ਮੁੰਬਈ, ਨੋਇਡਾ ਅਤੇ ਹੋਰ ਥਾਵਾਂ ’ਤੇ ਵੱਖ-ਵੱਖ ਕਾਰੋਬਾਰੀ ਅਦਾਰਿਆਂ ’ਤੇ ਮਾਰੇ ਗਏ ਛਾਪੇ ਮਗਰੋਂ ਆਮਦਨ ਕਰ ਵਿਭਾਗ ਨੂੰ ‘ਵੱਡੀ ਗਿਣਤੀ’ ਛੁਪਾਏ ਗਏ ਵਿਦੇਸ਼ੀ ਬੈਂਕ ਖਾਤਿਆਂ ਅਤੇ ਸੰਪਤੀਆਂ ਦਾ ਪਤਾ ਚੱਲਿਆ ਹੈ। ਸੀਬੀਡੀਟੀ ਨੇ ਕਿਹਾ ਕਿ 30 ਸਤੰਬਰ ਨੂੰ ਕੇਬਲ ਬਣਾਉਣ, ਰਿਅਲ ਅਸਟੇਟ, ਕੱਪੜਾ, ਪ੍ਰਿੰਟਿੰਗ ਮਸ਼ੀਨਰੀ, ਹੋਟਲਜ਼, ਲੌਜਿਸਟਿਕਸ ਆਦਿ ਵੱਖ-ਵੱਖ ਕਾਰੋਬਾਰਾਂ ਨਾਲ ਜੁੜੇ ਗਰੁੱਪਾਂ ਅਤੇ ਲੋਕਾਂ ਦੇ ਮੁੰਬਈ, ਪੁਣੇ, ਨੋਇਡਾ ਅਤੇ ਬੰਗਲੌਰ ਵਿੱਚ ਸਥਿਤ 37 ਟਿਕਾਣਿਆਂ ਦੀ ਤਲਾਸ਼ੀ ਲਈ ਗਈ ਸੀ। ਕਈ ਇਤਰਾਜ਼ਯੋਗ ਦਸਤਾਵੇਜ਼, ਵਹੀ-ਖਾਤੇ, ਡਾਇਰੀਆਂ, ਈ-ਮੇਲਜ਼ ਅਤੇ ਹੋਰ ਡਿਜੀਟਲ ਸਬੂਤ ਮਿਲੇ ਹਨ, ਜੋ ਵੱਡੀ ਗਿਣਤੀ ਵਿੱਚ ਵਿਦੇਸ਼ੀ ਬੈਂਕ ਖਾਤਿਆਂ ਅਤੇ ਅਚੱਲ ਜਾਇਦਾਦਾਂ ਦੀ ਮਾਲਕੀ ਵੱਲ ਇਸ਼ਾਰਾ ਕਰਦੇ ਹਨ। ਸੀਬੀਡੀਟੀ ਨੇ ਕਿਹਾ, ‘‘ਇਨ੍ਹਾਂ ਗਰੁੱਪਾਂ, ਵਿਅਕਤੀਆਂ ਨੇ ਦੁਬਈ ਸਥਿਤ ਇੱਕ ਵਿੱਤੀ ਸੇਵਾ ਮੁਹੱਈਆ ਕਰਵਾਉਣ ਵਾਲੀ ਕੰਪਨੀ ਦੀਆਂ ਸੇਵਾਵਾਂ ਵਿਦੇਸ਼ੀ ਕੰਪਨੀਆਂ ਅਤੇ ਟਰੱਸਟਾਂ ਦਾ ਇੱਕ ਸ਼ੱਕੀ ਅਤੇ ਗੁੰਝਲਦਾਰ ਜਾਲ ਬੁਣਨ ਲਈ ਕੀਤੀ ਹੈ, ਜੋ ਮੌਰੀਸ਼ਸ, ਯੂਏਈ, ਬ੍ਰਿਟਿਸ਼ ਵਰਜਨ ਆਇਲੈਂਡਜ਼, ਜਬਿਰਾਲਟਰ ਆਦਿ ਵਰਗੀਆਂ ਥਾਵਾਂ ’ਤੇ ਆਪਣੀ ਬੇਸ਼ੁਮਾਰ ਦੌਲਤ ਰੱਖਣ ਲਈ ਹਨ।’’ -ਪੀਟੀਆਈ