ਜੋਧਪੁਰ, 12 ਅਗਸਤ
ਜੋਧਪੁਰ ਜ਼ਿਲ੍ਹੇ ਦੇ ਇੱਕ ਪਿੰਡ ’ਚ ਪਾਕਿਸਤਾਨ ਤੋਂ ਆਏ ਹਿੰਦੂ ਪਰਵਾਸੀਆਂ ਦੇ ਇੱਕ ਪਰਿਵਾਰ ਦੇ 11 ਮੈਂਬਰਾਂ ਵੱਲੋਂ ਕਥਿਤ ਤੌਰ ’ਤੇ ਖੁਦਕੁਸ਼ੀ ਕਰਨ ਤੋਂ ਬਾਅਦ ਇੱਕ ਮ੍ਰਿਤਕਾ ਦੇ ਮੋਬਾਈਲ ’ਚੋਂ ਵੀਡੀਓ ਮਿਲੀ ਹੈ। ਇਸ ’ਚ ਉਹ ਪਰਿਵਾਰ ਦੇ ਮੈਂਬਰਾਂ ’ਤੇ ਹੋਰ ਰਹੇ ਤਸ਼ੱਦਦ ਦਾ ਜ਼ਿਕਰ ਕਰੀ ਹੈ ਅਤੇ ਦੱਸ ਰਹੀ ਹੈ ਕਿ ਕਿਸ ਤਰ੍ਹਾਂ ਉਨ੍ਹਾਂ ਲੋਕਾਂ ਨੂੰ ਰਿਸ਼ਤੇਦਾਰ ਤੇ ਇੱਕ ਗਰੋਹ ਪ੍ਰੇਸ਼ਾਨ ਕਰ ਰਿਹਾ ਸੀ।
ਪੁਲੀਸ ਨੇ ਦੱਸਿਆ ਕਿ ਇਹ ਵੀਡੀਓ ਕਰੀਬ ਡੇਢ ਘੰਟੇ ਦੀ ਹੈ ਅਤੇ ਪੀੜਤਾਂ ’ਚੋਂ ਇੱਕ ਲਕਸ਼ਮੀ ਦੇ ਮੋਬਾਈਲ ਫੋਨ ’ਚ ਸੀ। ਇਸ ਵੀਡੀਓ ’ਚ ਲਕਸ਼ਮੀ ਕਹਿ ਰਹੀ ਹੈ ਕਿ ਇਹ ਪਰਿਵਾਰ ਧਾਰਮਿਕ ਤਸ਼ੱਦਦ ਦੇ ਡਰੋਂ 2015 ’ਚ ਪਾਕਿਸਤਾਨ ਤੋਂ ਇੱਥੇ ਆਇਆ ਸੀ ਤੇ ਇੱਥੇ ਆ ਕੇ ਉਨ੍ਹਾਂ ਦੇ ਆਪਣੇ ਰਿਸ਼ਤੇਦਾਰਾਂ ਦੇ ਇੱਕ ਗਰੋਹ ਨਾਲ ਵਿਵਾਦ ਹੋ ਗਿਆ ਜੋ ਕਥਿਤ ਤੌਰ ’ਤੇ ਉਨ੍ਹਾਂ ’ਤੇ ਕੰਟਰੋਲ ਕਰਨ ਦੀ ਕੋਸ਼ਿਸ਼ ਕਰ ਰਹੇ ਸੀ। ਉਸ ਨੇ ਦੱਸਿਆ ਕਿ ਉਹ ਧਾਂਦਲੀ ਦੇ ਕਹਿਣ ’ਤੇ ਇੱਥੇ ਆਏ ਸਨ। ਧਾਂਦਲੀ ਉਸ ਦੇ ਭਰਾ ਕੇਵਲ ਰਾਮ ਦੀ ਪਤਨੀ ਸੀ ਜੋ ਹੁਣ ਉਸ ਤੋਂ ਵੱਖ ਰਹਿੰਦੀ ਹੈ। ਇਸ ਘਟਨਾ ’ਚ ਸਿਰਫ਼ ਕੇਵਲ ਰਾਮ ਹੀ ਜਿਊਂਦਾ ਬਚਿਆ ਹੈ। ਲਕਸ਼ਮੀ ਨੇ ਕਿਹਾ, ‘ਧਾਂਦਲੀ ਦਾ ਪੇਕਾ ਘਰ ਪਹਿਲਾਂ ਹੀ ਜੋਧਪੁਰ ’ਚ ਸੀ ਤੇ ਇੱਥੇ ਆ ਕੇ ਉਹ ਆਪਣੇ ਮਾਪਿਆਂ ਕੋਲ ਚਲੀ ਗਈ ਅਤੇ ਆਪਣੇ ਪਰਿਵਾਰ ਤੇ ਹੋਰਨਾਂ ਨਾਲ ਮਿਲ ਕੇ ਉਨ੍ਹਾਂ ਨੂੰ ਪ੍ਰੇਸ਼ਾਨ ਕਰਨਾ ਸ਼ੁਰੂ ਕਰ ਦਿੱਤਾ।’ ਲਕਸ਼ਮੀ ਅਨੁਸਾਰ ਇੱਥੇ ਇੱਕ ਗਰੋਹ ਵੀ ਉਨ੍ਹਾਂ ਨੂੰ ਪ੍ਰੇਸ਼ਾਨ ਕਰਦਾ ਰਹਿੰਦਾ ਸੀ। ਜੋਧਪੁਰ ਦੇ ਐੱਸਪੀ ਰਾਹੁਲ ਬਾਰਹਟ ਨੇ ਕਿਹਾ ਕਿ ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ। -ਪੀਟੀਆਈ