ਨਵੀਂ ਦਿੱਲੀ, 30 ਜੁਲਾਈ
ਅਸਾਮ ਪੁਲੀਸ ਨੇ ਮਿਜ਼ੋਰਮ ਦੇ ਇਕੋ-ਇਕ ਰਾਜ ਸਭਾ ਮੈਂਬਰ ਕੇ. ਵਨਲਾਲਵੇਨਾ ਨੂੰ ‘ਧਮਕਾਉਣ ਵਾਲੀ ਬਿਆਨਬਾਜ਼ੀ’ ਕਰਨ ’ਤੇ ਪਹਿਲੀ ਅਗਸਤ ਨੂੰ ਤਲਬ ਕੀਤਾ ਹੈ। ਪੁਲੀਸ ਨੇ ਸੰਸਦ ਮੈਂਬਰ ਦੀ ਦਿੱਲੀ ਸਥਿਤ ਰਿਹਾਇਸ਼ ’ਤੇ ਨੋਟਿਸ ਚਿਪਕਾ ਦਿੱਤਾ ਹੈ। ਪੁਲੀਸ ਨੇ ਕਿਹਾ ਹੈ ਕਿ ਇਸ ਬਿਆਨਬਾਜ਼ੀ ਲਈ ਵਨਲਾਲਵੇਨਾ ਖ਼ਿਲਾਫ਼ ‘ਕਾਨੂੰਨੀ ਕਾਰਵਾਈ’ ਕੀਤੀ ਜਾਵੇਗੀ। ਦੱਸਣਯੋਗ ਹੈ ਕਿ ਸੰਸਦ ਮੈਂਬਰ ਨੇ ਅਸਾਮ-ਮਿਜ਼ੋਰਮ ਵਿਵਾਦ ਬਾਰੇ ਟਿੱਪਣੀਆਂ ਕੀਤੀਆਂ ਸਨ। ਸਰਕਾਰੀ ਸੂਤਰਾਂ ਮੁਤਾਬਕ ਅਸਾਮ ਪੁਲੀਸ ਮਿਜ਼ੋਰਮ ਵਿਚ ਵੀ ਉਨ੍ਹਾਂ ਦੇ ਘਰ ਗਈ ਸੀ, ਪਰ ਉਹ ਉੱਥੇ ਨਹੀਂ ਮਿਲੇ। ਸੀਆਈਡੀ ਦੀ ਇਕ ਟੀਮ ਸੰਸਦ ਮੈਂਬਰ ਨੂੰ ਭਾਲਦੀ ਦਿੱਲੀ ਆਈ ਸੀ ਤੇ ਰਾਜ ਸਭਾ ਮੈਂਬਰ ਦੇ ਘਰ ਉਤੇ ਨੋਟਿਸ ਚਿਪਕਾ ਦਿੱਤਾ। -ਪੀਟੀਆਈ