ਦੋ ਗੰਭੀਰ ਜ਼ਖ਼ਮੀਆਂ ਨੂੰ ਮੈਡੀਕਲ ਕਾਲਜ ਫਰੀਦਕੋਟ ਭੇਜਿਆ
ਗੁਰਸੇਵਕ ਸਿੰਘ ਪ੍ਰੀਤ
ਸ੍ਰੀ ਮੁਕਤਸਰ ਸਾਹਿਬ, 15 ਅਕਤੂਬਰ
ਪਿੰਡ ਭੁੱਲਰ ਵਿੱਚ ਖਸਤਾ ਮਕਾਨ ਵਿੱਚ ਰਹਿ ਰਹੇ ਇਕ ਮਜ਼ਦੂਰ ਪਰਿਵਾਰ ਦੇ 7 ਜੀਆਂ ਵਿੱਚੋਂ 5 ਜੀਅ ਕਮਰੇ ਦੀ ਛੱਤ ਡਿੱਗਣ ਕਾਰਨ ਹੇਠਾਂ ਆ ਕੇ ਜ਼ਖ਼ਮੀ ਹੋ ਗਏ। ਜ਼ਖ਼ਮੀ ਹਾਲਤ ਵਿੱਚ ਪਰਿਵਾਰ ਦੇ ਮੁਖੀ ਬਲਵਿੰਦਰ ਸਿੰਘ ਉਰਫ ਬਿੱਲਾ (40) ਪੁੱਤਰ ਜਸਮੇਲ ਸਿੰਘ, ਉਸਦੀ ਪਤਨੀ ਅਰਸ਼ਦੀਪ ਕੌਰ (35), ਲੜਕੀ ਖੁਸ਼ਿਵੰਦਰ ਕੌਰ (11), ਲੜਕੀ ਸਹਿਜਨੂਰ ਕੌਰ (8) ਅਤੇ ਲੜਕਾ ਗੁਰਦਿੱਤ ਸਿੰਘ (4) ਨੂੰ ਮੁਕਤਸਰ ਦੇ ਸਰਕਾਰੀ ਹਸਪਾਤਲ ਵਿੱਚ ਲਿਆਂਦਾ ਗਿਆ ਜਿੱਥੋਂ ਅਰਸ਼ਦੀਪ ਕੌਰ ਅਤੇ ਖੁਸ਼ਿਵੰਦਰ ਕੌਰ ਨੂੰ ਗੰਭੀਰ ਹਾਲਤ ਦੇ ਚੱਲਦਿਆਂ ਗੁਰੂ ਗੋਬਿੰਦ ਸਿੰਘ ਮੈਡੀਕਲ ਕਾਲਜ ਫਰੀਦਕੋਟ ਵਿਖੇ ਰੈਫਰ ਕਰ ਦਿੱਤਾ ਗਿਆ ਜਦੋਂਕਿ ਬਾਕੀ ਜਖ਼ਮੀ ਮੁਕਤਸਰ ਵਿੱਚ ਹੀ ਜ਼ੇਰੇ ਇਲਾਜ ਹਨ। ਪੀੜਤ ਪਰਿਵਾਰ ਦੇ ਰੇਸ਼ਮ ਸਿੰਘ ਨੇ ਦੱਸਿਆ ਕਿ ਡਾਟ ਵਾਲੇ ਮਕਾਨ ਦੀ ਹਾਲਤ ਬੇਹੱਦ ਖਸਤਾ ਸੀ ਅਤੇ ਪਰਿਵਾਰ ਇਸੇ ਕਮਰੇ ਅੰਦਰ ਹੀ ਸੌਂਦਾ ਸੀ। ਉਸਨੇ ਦੱਸਿਆ ਕਿ 16 ਅਕਤੁੂਬਰ ਦੀ ਰਾਤ ਨੂੰ ਕਰੀਬ 12 ਵਜੇ ਅਚਾਨਕ ਹੀ ਕਮਰੇ ਦੀ ਛੱਤ ਡਿੱਗ ਪਈ ਜਿਸ ਕਾਰਨ ਅੰਦਰ ਪਏ ਸੁੱਤੇ ਪਏ ਪਰਿਵਾਰ ਦੇ ਸੱਤ ਜਾਣਿਆਂ ਵਿੱਚੋਂ ਪੰਜ ਜਾਣੇ ਜ਼ਖ਼ਮੀ ਹੋ ਗਏ। ਜ਼ਖ਼ਮੀਆਂ ਵਿੱਚ ਤਿੰਨ ਬੱਚੇ ਅਤੇ ਖੁਦ ਪਤੀ-ਪਤਨੀ ਸ਼ਾਮਲ ਹਨ। ਜਦੋਂਕਿ 6 ਸਾਲਾ ਲੜਕੀ ਗੁਰਸ਼ਰਨ ਕੌਰ ਉਰਫ ਸ਼ਰਨ ਅਤੇ ਡੇਢ ਸਾਲ ਦੀ ਲੜਕੀ ਮਨਜੀਤ ਕੌਰ ਉਰਫ਼ ਮੀਤ ਦਾ ਬਚਾਅ ਹੋ ਗਿਆ। ਪੀੜਤ ਪਰਿਵਾਰ ਨੇ ਕਿਹਾ ਕਿ ਅਜੇ ਤੱਕ ਪ੍ਰਸ਼ਾਸਨ ਦਾ ਕੋਈ ਵੀ ਅਧਿਕਾਰ ਉਨ੍ਹਾਂ ਦੀ ਸਾਰ ਲੈਣ ਲਈ ਨਹੀਂ ਪੁੱਜਾ।
ਓਧਰ, ਸੀਪੀਐੱਮ ਤਹਿਸੀਲ ਮੁਕਤਸਰ ਦੇ ਸਕੱਤਰ ਕਾਮਰੇਡ ਤਰਸੇਮ ਲਾਲ, ਐਡਵੋਕੇਟ ਦਵਿੰਦਰ ਸਿੰਘ ਕੋਟਲੀ ਜ਼ਿਲ੍ਹਾ ਇੰਚਾਰਜ਼ ‘ਸੀਟੂ’ ਅਤੇ ਕਾਮਰੇਡ ਖਰੈਤੀ ਲਾਲ ਨੇ ਜ਼ਿਲ੍ਹਾ ਪ੍ਰਸ਼ਾਸਨ ਤੋਂ ਮੰਗ ਕੀਤੀ ਕਿ ਜ਼ਖ਼ਮੀਆਂ ਦਾ ਇਲਾਜ ਸਰਕਾਰੀ ਖਰਚੇ ’ਤੇ ਕਰਵਾਇਆ ਜਾਵੇ ਅਤੇ ਕਮਰੇ ਦੀ ਉਸਾਰੀ ਲਈ ਆਰਥਿਕ ਮੱਦਦ ਕੀਤੀ ਜਾਵੇ।
ਕੈਪਸ਼ਨ : ਪਿੰਡ ਭੁੱਲਰ ਵਿੱਚ ਮਕਾਨ ਦੀ ਡਿੱਗੀ ਛੱਤ ਵਿੱਚ ਪਿਆ ਨੁਕਸਾਨਿਆ ਹੋਇਆ ਸਾਮਾਨ।