ਨਿੱਜੀ ਪੱਤਰ ਪ੍ਰੇਰਕ
ਮੋਗਾ, 1 ਦਸੰਬਰ
ਇਥੇ ਸ਼ਹਿਰ ਅੰਦਰ ਲੁਧਿਆਣਾ ਕੌਮੀ ਮਾਰਗ ਉੱਤੇ ਟਾਇਰਾਂ ਦਾ ਕਾਰੋਬਾਰ ਕਰਦੇ ਗੁਆਂਢੀ ਦੁਕਾਨਦਾਰਾਂ ਦੀ ਲੜਾਈ ’ਚ ਨੌਕਰ ਦੀ ਮੌਤ ਦੇ ਮਾਮਲੇ ਵਿੱਚ ਨਵਾਂ ਮੋੜ ਆਇਆ ਹੈ। ਮ੍ਰਿਤਕ ਦੇ ਵਾਰਸਾਂ ਨੇ ਦੁਕਾਨ ਮਾਲਕ ਸਾਬਕਾ ਕੌਂਸਲਰ ਖ਼ਿਲਾਫ਼ ਕਾਰਵਾਈ ਦੀ ਮੰਗ ਨੂੰ ਲੈ ਕੇ ਥਾਣਾ ਸਿਟੀ ਅੱਗੇ ਧਰਨਾ ਦਿੱਤਾ ਜੋ ਖ਼ਬਰ ਲਿਖੇ ਜਾਣ ਤੱਕ ਜਾਰੀ ਹੈ।
ਥਾਣਾ ਸਿਟੀ ਦੇ ਮੁਖੀ ਇੰਸਪੈਕਟਰ ਚੰਨਣ ਸਿੰਘ ਨੇ ਉਨ੍ਹਾਂ ਧਰਨਕਾਰੀਆਂ ਨੂੰ ਜਾਂਚ ਦੌਰਾਨ ਇਨਸਾਫ਼ ਦਾ ਭਰੋਸਾ ਦਿੰਦੇ ਦੱਸਿਆ ਕਿ ਇਸ ਮਾਮਲੇ ਵਿੱਚ ਨਿਊ ਕਿਸਾਨ ਟਾਇਰ ਮਾਲਕ ਸਾਬਕਾ ਕੌਂਸਲਰ ਕੁਲਦੀਪ ਸਿੰਘ ਆਹਲੂਵਾਲੀਆ ਦੇ ਬਿਆਨ ਉੱਤੇ ਵਿਜੇ ਗੋਇਲ, ਉਸ ਦੇ ਲੜਕੇ ਮੇਅੰਕ ਗੋਇਲ ਗਲੀ ਨੰਬਰ 9 ਨਿਊ ਟਾਊਨ ਮੋਗਾ, ਕਰਮ ਸਿੰਘ ਪਿੰਡ ਸਲੀਣਾ, ਵਿਸ਼ਾਲ, ਗੌਰੀ ਤੇ 20/25 ਅਣਪਛਾਤੇ ਵਿਅਕਤੀਆਂ ਖ਼ਿਲਾਫ਼ ਹੱਤਿਆ ਦਾ ਕੇਸ ਦਰਜ ਕਰਕੇ ਜਾਂਚ ਸ਼ੁਰੂ ਕੀਤੀ ਗਈ ਹੈ। ਇਥੇ ਥਾਣਾ ਸਿਟੀ ਅੱਗੇ ਮ੍ਰਿਤਕ ਨੌਕਰ ਕੁਲਜੀਤ ਸਿੰਘ ਪਿੰਡ ਤਤਾਰੀਏਵਾਲਾ ਦੇ ਪਰਿਵਾਰ ਲਈ ਇਨਸਾਫ਼ ਲੈਣ ਲਈ ਧਰਨਾ ਦੇਣ ਪੁੱਜੇ ਪਿੰਡ ਤਤਾਰੀਏਵਾਲਾ ਦੇ ਪੰਚ ਜਸਪਾਲ ਸਿੰਘ, ਮੁਖਤਿਆਰ ਸਿੰਘ, ਬਚਿੰਤ ਸਿੰਘ ਤੇ ਹੋਰਾਂ ਨੇ ਕਿਹਾ ਕਿ ਕੁਲਜੀਤ ਸਿੰਘ ਦੀ ਹੱਤਿਆ ਦਿਨ ਵੇਲੇ ਹੋ ਗਈ ਸੀ ਪਰ ਦੁਕਾਨ ਮਾਲਕ ਸਾਬਕਾ ਕੌਂਸਲਰ ਕੁਲਦੀਪ ਸਿੰਘ ਨੇ ਪਰਿਵਾਰ ਨੂੰ ਸ਼ਾਮ ਵੇਲੇ ਜਾਣਕਾਰੀ ਦਿੱਤੀ। ਉਹ ਇਨਸਾਫ਼ ਦੀ ਮੰਗ ਕਰ ਰਹੇ ਹਨ।