ਸਰਬਜੀਤ ਸਾਗਰ
ਦੀਨਾਨਗਰ,12 ਜੁਲਾਈ
ਪਿੰਡ ਅਵਾਂਖਾ ਅਤੇ ਆਸਪਾਸ ਦੇ ਨੌਜਵਾਨਾਂ ਨੂੰ ਖੇਡਾਂ ਨਾਲ ਜੋੜਣ ਦੇ ਮੰਤਵ ਨਾਲ ਕੈਬਨਿਟ ਮੰਤਰੀ ਅਰੁਣਾ ਚੌਧਰੀ ਵੱਲੋਂ ਪਿੰਡ ’ਚ ਖੇਡ ਮੈਦਾਨ ਤੇ ਓਪਨ ਜਿੰਮ ਬਣਾ ਕੇ ਦਿੱਤਾ ਗਿਆ ਹੈ। ਜਿੰਮ ਦਾ ਊਦਘਾਟਨ ਕਰਦਿਆਂ ਊਨ੍ਹਾਂ ਕਿਹਾ ਕਿ ਚੰਗੀ ਸਿਹਤ ਲਈ ਖੇਡਾਂ ਇੱਕ ਵਰਦਾਨ ਵਜੋਂ ਕੰਮ ਕਰਦੀਆਂ ਹਨ ਅਤੇ ਖਿਡਾਰੀ ਦਾ ਸਰੀਰ ਦੂਜਿਆਂ ਦੇ ਮੁਕਾਬਲੇ ਹਮੇਸ਼ਾ ਨਿਰੋਗ ਅਤੇ ਚੁਸਤੀ-ਫੁਰਤੀ ਵਾਲਾ ਹੁੰਦਾ ਹੈ। ਉਨ੍ਹਾਂ ਕਿਹਾ ਕਿ ਅਵਾਂਖਾ ਦੇ ਨੌਜਵਾਨ ਲੰਮੇ ਸਮੇਂ ਤੋਂ ਖੇਡ ਮੈਦਾਨ ਦੀ ਮੰਗ ਕਰਦੇ ਸਨ। ਜਿਸਨੂੰ ਪਿੰਡ ਦੀ ਸਰਪੰਚ ਗੀਤਾ ਠਾਕੁਰ ਅਤੇ ਜ਼ੋਨ ਇੰਚਾਰਜ ਠਾਕੁਰ ਯਸ਼ਪਾਲ ਦੀਆਂ ਕੋਸ਼ਿਸ਼ਾਂ ਸਦਕਾ ਪੂਰਾ ਕਰ ਦਿੱਤਾ ਗਿਆ ਹੈ। ਉਨ੍ਹਾਂ ਕਿਹਾ ਕਿ ਇਸ ’ਚ ਸਾਬਕਾ ਮੈਂਬਰ ਪਾਰਲੀਮੈਂਟ ਸੁਨੀਲ ਜਾਖੜ ਦਾ ਅਹਿਮ ਯੋਗਦਾਨ ਹੈ। ਇਸ ਮੌਕੇ ਪਿੰਡ ਦੇ ਹੋਣਹਾਰ ਖਿਡਾਰੀਆਂ ਨੂੰ ਮੰਤਰੀ ਵੱਲੋਂ ਸਨਮਾਨਿਤ ਕੀਤਾ ਗਿਆ। ਖਿਡਾਰੀਆਂ ਕ੍ਰਿਕੇਟ ਦੀਆਂ ਕਿੱਟਾਂ ਵੀ ਭੇਟ ਕੀਤੀਆਂ ਗਈਆਂ। ਇਸ ਮੌਕੇ ਪਿੰਡ ਦੀ ਸਰਪੰਚ ਗੀਤਾ ਠਾਕੁਰ, ਠਾਕੁਰ ਯਸ਼ਪਾਲ ਅਤੇ ਐਡਵੋਕੇਟ ਨਰੇਸ਼ ਠਾਕੁਰ ਵੱਲੋਂ ਮੰਤਰੀ ਅਰੁਣਾ ਚੌਧਰੀ ਅਤੇ ਵਿਸ਼ੇਸ਼ ਮਹਿਮਾਨ ਅਸ਼ੋਕ ਚੌਧਰੀ ਦਾ ਸਨਮਾਨ ਵੀ ਕੀਤਾ ਗਿਆ। ਇਸ ਮੌਕੇ ਮੀਡੀਆ ਇੰਚਾਰਜ ਦੀਪਕ ਭੱਲਾ, ਮਾਰਕੀਟ ਕਮੇਟੀ ਚੇਅਰਮੈਨ ਮਨਜੀਤ ਸਿੰਘ ਮੰਜ, ਬੀਡੀਪੀਓ ਸੁਖਜੀਤ ਸਿੰਘ, ਵਰਿੰਦਰ ਨੌਸ਼ਹਿਰਾ, ਦਲਬੀਰ ਸਿੰਘ ਰਾਣਾ, ਪੰਚ ਸੁਰੇਸ਼ ਕੁਮਾਰ ਅਤੇ ਪੰਚ ਦੇਸ ਰਾਜ ਹਾਜ਼ਰ ਸਨ।