ਨਿੱਜੀ ਪੱਤਰ ਪ੍ਰੇਰਕ
ਲੁਧਿਆਣਾ, 25 ਅਪਰੈਲ
ਥਾਣਾ ਡਿਵੀਜ਼ਨ ਨੰਬਰ-1 ਦੀ ਪੁਲੀਸ ਨੇ ਇੱਕ ਦੁਕਾਨਦਾਰ ਦੀ ਕੁੱਟਮਾਰ ਕਰਨ ਦੇ ਦੋਸ਼ ਹੇਠ ਦੋ ਜਣਿਆਂ ਖ਼ਿਲਾਫ਼ ਕੇਸ ਦਰਜ ਕਰਕੇ ਇੱਕ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਇਸ ਸਬੰਧੀ ਥਾਣਾ ਇੰਚਾਰਜ ਮਨਿੰਦਰ ਕੌਰ ਨੇ ਦੱਸਿਆ ਕਿ ਨਿਊ ਦੀਪ ਨਗਰ ਵਾਸੀ ਸ਼ਿਵਮ ਮਲਹੋਤਰਾ ਦੀ ਦੁਕਾਨ ਅਕਾਲਗੜ੍ਹ ਮਾਰਕੀਟ ਵਿੱਚ ਹੈ। ਉਸ ਨੇ ਆਪਣੀ ਦੁਕਾਨ ਲਈ ਕਰਨਵੀਰ ਸਿੰਘ ਜੋਲੀ (ਸ਼ੈਰੀ) ਪਾਸੋਂ ਰੈਡੀਮੇਡ ਕੱਪੜੇ ਦਾ ਇੱਕ ਬੋਰਾ ਮੰਗਵਾਇਆ ਸੀ। ਮਾਲ ਦੇਰ ਸ਼ਾਮ ਆਇਆ ਸੀ ਜਿਸ ਕਾਰਨ ਉਹ ਮਾਲ ਚੈੱਕ ਨਹੀਂ ਕਰ ਸਕਿਆ। ਅਗਲੇ ਦਿਨ ਸਵੇਰੇ ਉਸ ਨੇ ਜਦੋਂ ਮਾਲ ਚੈੱਕ ਕੀਤਾ ਤਾਂ ਮਾਲ ਘੱਟ ਸੀ। ਜਿਸ ’ਤੇ ਉਸ ਨੇ ਕਰਨਵੀਰ ਨੂੰ ਫੋਨ ਕਰਕੇ ਘੱਟ ਮਾਲ ਨਿਕਲਣ ਬਾਰੇ ਜਾਣਕਾਰੀ ਦਿੱਤੀ। ਇਸ ਤੋਂ ਬਾਅਦ ਉਸ ਨੇ ਗੁੱਸੇ ਵਿੱਚ ਆ ਕੇ ਕੜਵਲ ਨਾਮ ਦੇ ਵਿਅਕਤੀ ਨਾਲ ਦੁਕਾਨ ਅੰਦਰ ਆ ਕੇ ਉਸ ਨੂੰ ਪਿਸਤੌਲ ਦਿਖਾਈ ਅਤੇ ਕੁੱਟਮਾਰ ਕੀਤੀ। ਉਹ ਜਾਨੋਂ ਮਾਰਨ ਦੀਆਂ ਧਮਕੀਆਂ ਦਿੰਦੇ ਹੋਏ ਭੱਜ ਗਏ। ਪੁਲੀਸ ਵੱਲੋਂ ਸੀਸੀਟੀਵੀ ਕੈਮਰੇ ਦੀ ਫੁਟੇਜ ਚੈੱਕ ਕਰਨ ਤੋਂ ਬਾਅਦ ਕੇਸ ਦਰਜ ਕਰਕੇ ਕਰਨਵੀਰ ਸਿੰਘ ਜੋਲੀ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ। ਥਾਣੇਦਾਰ ਸੁਲ਼ਖਣ ਸਿੰਘ ਨੇ ਦੱਸਿਆ ਹੈ ਕਿ ਪੁਲੀਸ ਵੱਲੋਂ ਮੁਲਜ਼ਮ ਨੂੰ ਅਦਾਲਤ ਵਿੱਚ ਪੇਸ਼ ਕਰਕੇ ਰਿਮਾਂਡ ਦੌਰਾਨ ਪਿਸਤੌਲ ਬਾਰੇ ਹੋਰ ਪੁੱਛ-ਗਿੱਛ ਕੀਤੀ ਜਾਵੇਗੀ ਕਿ ਪਿਸਤੌਲ ਦਾ ਲਾਇਸੈਂਸ ਜਾ ਇਹ ਨਾਜਾਇਜ਼ ਹੈ।