ਫ਼ਰਜ਼ੀ ਐੱਨਓਸੀ: ਵਿਜੀਲੈਂਸ ਵਿਭਾਗ ਵੱਲੋਂ ਰਿਕਾਰਡ ਤਲਬ

ਸੰਤੋਖ ਗਿੱਲ

ਰਾਏਕੋਟ, 4 ਫਰਵਰੀ

ਸੂਬੇ ਵਿਚ ਫ਼ਰਜ਼ੀ ‘ਐੱਨਓਸੀ’ (ਕੋਈ ਇਤਰਾਜ਼ ਨਹੀਂ ਸਰਟੀਫਿਕੇਟ) ਸਹਾਰੇ ਇਮਾਰਤਾਂ, ਪਲਾਟਾਂ ਅਤੇ ਦੁਕਾਨਾਂ ਦੀਆਂ ਧੜਾ-ਧੜ ਕਰਵਾਈਆਂ ਗਈਆਂ ਰਜਿਸਟਰੀਆਂ ਦੇ ਮਾਮਲੇ ਵਿਚ ਮੁੱਖ ਮੰਤਰੀ ਭਗਵੰਤ ਮਾਨ ਵੱਲੋਂ ਚੌਕਸੀ (ਵਿਜੀਲੈਂਸ) ਵਿਭਾਗ ਨੂੰ ਮਿਲੀ ਹਰੀ ਝੰਡੀ ਬਾਅਦ ਸ਼ੁਰੂ ਹੋਈ ਜਾਂਚ ਪੜਤਾਲ ਨੂੰ ਅੱਗੇ ਤੋਰਦਿਆਂ ਲੁਧਿਆਣਾ ਰੇਂਜ ਦੇ ਐੱਸਐੱਸਪੀ ਰਵਿੰਦਰਪਾਲ ਸਿੰਘ ਸੰਧੂ ਵੱਲੋਂ ਨਗਰ ਕੌਂਸਲ ਰਾਏਕੋਟ ਅਤੇ ਸਬ-ਰਜਿਸਟਰਾਰ ਰਾਏਕੋਟ ਕੋਲੋਂ ਸਬੰਧਿਤ ਰਿਕਾਰਡ ਤਲਬ ਕੀਤਾ ਗਿਆ ਹੈ।

ਐੱਸਐੱਸਪੀ ਸੰਧੂ ਨੇ ਕਿਹਾ ਕਿ ਜ਼ਾਬਤਾ ਫ਼ੌਜਦਾਰੀ ਅਧੀਨ ਨੋਟਿਸ ਜਾਰੀ ਕਰ ਕੇ ਨਗਰ ਕੌਂਸਲ ਰਾਏਕੋਟ ਤੋਂ ਫ਼ਰਜ਼ੀ ਐੱਨਓਸੀ ਬਾਰੇ ਰਿਕਾਰਡ ਤਲਬ ਕੀਤਾ ਹੈ, ਜਦਕਿ ਫ਼ਰਜ਼ੀ ਐੱਨਓਸੀ ਦੀ ਵਰਤੋਂ ਕਰ ਕੇ ਹੋਈਆਂ ਰਜਿਸਟਰੀਆਂ ਬਾਰੇ ਰਿਕਾਰਡ ਸਬ-ਰਜਿਸਟਰਾਰ ਨੂੰ ਪੇਸ਼ ਕਰਨ ਲਈ ਕਿਹਾ ਗਿਆ ਹੈ। ਇਸ ਨੋਟਿਸ ਮਗਰੋਂ ਦੋਵਾਂ ਨਗਰ ਕੌਂਸਲ ਅਤੇ ਸਬ-ਰਜਿਸਟਰਾਰ ਦੇ ਦਫ਼ਤਰਾਂ ਵਿਚ ਹੱਲ-ਚੱਲ ਮੱਚ ਗਈ ਹੈ। ਐਸਐਸਪੀ ਸੰਧੂ ਅਨੁਸਾਰ ਸਬ-ਰਜਿਸਟਰਾਰ ਰਾਏਕੋਟ ਵੱਲੋਂ ਵਸੀਕਾ ਨੰਬਰ 1669 ਮਿਤੀ 11 ਨਵੰਬਰ 2022 ਨਾਲ ਨੱਥੀ ਕੀਤੀ ਗਈ ਐੱਨਓਸੀ ਦੇ ਫ਼ਰਜ਼ੀ ਹੋਣ ਦੀ ਪੁਸ਼ਟੀ ਪਹਿਲਾਂ ਹੀ ਨਗਰ ਕੌਂਸਲ ਰਾਏਕੋਟ ਵੱਲੋਂ ਕੀਤੀ ਜਾ ਚੁੱਕੀ ਹੈ ਅਤੇ ਚੌਕਸੀ ਵਿਭਾਗ ਕੋਲ ਮੌਜੂਦ ਹੋਰ ਸਬੂਤਾਂ ਦੀ ਪੁਸ਼ਟੀ ਲਈ ਮੁੱਢਲੇ ਦੌਰ ਵਿਚ ਉਹ ਹੀ ਰਿਕਾਰਡ ਮੰਗਿਆ ਗਿਆ ਹੈ। ਇਸ ਤਾਜ਼ਾ ਘਟਨਾਕ੍ਰਮ ਨੇ ਇੱਕ ਵਾਰ ਫਿਰ ਚੌਕਸੀ ਵਿਭਾਗ ਅਤੇ ਸਿਵਲ ਪ੍ਰਸ਼ਾਸਨਿਕ ਅਧਿਕਾਰੀਆਂ ਦਰਮਿਆਨ ਟਕਰਾਅ ਦੀ ਸਥਿਤੀ ਪੈਦਾ ਕਰ ਦਿੱਤੀ ਹੈ।

ਨਗਰ ਕੌਂਸਲ ਰਾਏਕੋਟ ਦੇ ਕਾਰਜਸਾਧਕ ਅਫ਼ਸਰ ਚਰਨਜੀਤ ਸਿੰਘ ਨੇ ਚੌਕਸੀ ਵਿਭਾਗ ਵੱਲੋਂ ਰਿਕਾਰਡ ਤਲਬ ਕੀਤੇ ਜਾਣ ਸਬੰਧੀ ਨੋਟਿਸ ਮਿਲਣ ਦੀ ਪੁਸ਼ਟੀ ਕਰਦਿਆਂ ਕਿਹਾ ਕਿ 8 ਫਰਵਰੀ ਨੂੰ ਸਬੰਧਿਤ ਰਿਕਾਰਡ ਅਤੇ ਹੋਰ ਜ਼ਰੂਰੀ ਦਸਤਾਵੇਜ਼ ਪੇਸ਼ ਕਰ ਦਿੱਤੇ ਜਾਣਗੇ। ਉਧਰ ਰਾਏਕੋਟ ਦੇ ਐੱਸਡੀਐੱਮ ਗੁਰਬੀਰ ਸਿੰਘ ਕੋਹਲੀ ਵੀ ਆਪਣੇ ਤੌਰ ’ਤੇ ਮਾਮਲੇ ਦੀ ਜਾਂਚ ਕਰ ਰਹੇ ਹਨ ਅਤੇ ਆਪਣੀ ਰਿਪੋਰਟ ਡੀਸੀ ਲੁਧਿਆਣਾ ਤੇ ਸਬੰਧਿਤ ਵਿਭਾਗਾਂ ਨੂੰ ਭੇਜ ਰਹੇ ਹਨ। ਜ਼ਿਕਰਯੋਗ ਹੈ ਕਿ ‘ਪੰਜਾਬੀ ਟ੍ਰਿਬਿਊਨ’ ਵੱਲੋਂ ਸੂਬੇ ਵਿੱਚ ਭੂ-ਮਾਫ਼ੀਆ ਅਤੇ ਦਲਾਲਾਂ ਵੱਲੋਂ ਮਾਲ ਵਿਭਾਗ ਦੇ ਅਧਿਕਾਰੀਆਂ ਨਾਲ ਮਿਲੀਭੁਗਤ ਕਰ ਕੇ ਫ਼ਰਜ਼ੀ ਐੱਨਓਸੀ ਸਹਾਰੇ ਰਜਿਸਟਰੀਆਂ ਕਰਾਉਣ ਦੇ ਮਾਮਲੇ ਦਾ ਖ਼ੁਲਾਸਾ ਕੀਤਾ ਗਿਆ ਸੀ।