ਨਵੀਂ ਦਿੱਲੀ, 23 ਅਪਰੈਲ
ਆਬਕਾਰੀ ਨੀਤੀ ਨਾਲ ਜੁੜੇ ਮਨੀ ਲਾਂਡਰਿੰਗ ਕੇਸ ਵਿਚ ਤਿਹਾੜ ਜੇਲ੍ਹ ’ਚ ਨਿਆਂਇਕ ਹਿਰਾਸਤ ਤਹਿਤ ਬੰਦ ਦਿੱਲੀ ਦੇ ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਨੂੰ ਉਨ੍ਹਾਂ ਦੀ ਸ਼ੂਗਰ ਦਾ ਪੱਧਰ ਵਧਣ ਮਗਰੋਂ ਇਨਸੁਲਿਨ ਦੀ ‘ਹਲਕੀ ਡੋਜ਼’ ਦਿੱਤੀ ਗਈ ਹੈ। ਉਧਰ ‘ਆਪ’ ਨੇ ਕਿਹਾ ਕਿ ਇਹ ਸਭ ਭਗਵਾਨ ਰਾਮ ਦੇ ਆਸ਼ੀਰਵਾਦ ਕਰਕੇ ਸੰਭਵ ਹੋਇਆ ਹੈ ਕਿਉਂਕਿ ਅੱਜ ਹਨੂਮਾਨ ਜੈਅੰਤੀ ਹੈ।
ਤਿਹਾੜ ਜੇਲ੍ਹ ਦੇ ਅਧਿਕਾਰੀਆਂ ਮੁਤਾਬਕ ਕੇਜਰੀਵਾਲ ਨੂੰ ਸੋਮਵਾਰ ਸ਼ਾਮ ਨੂੰ ਏਮਜ਼ ਦੇ ਡਾਕਟਰਾਂ ਦੀ ਸਲਾਹ ’ਤੇ ਇਨਸੁਲਿਨ ਦੀ ਹਲਕੀ ਡੋਜ਼ ਦੇ ਦੋ ਯੂਨਿਟ ਦਿੱਤੇ ਗਏ ਸਨ। ਅਧਿਕਾਰੀ ਨੇ ਕਿਹਾ ਕਿ ਮੁੱਖ ਮੰਤਰੀ ਦਾ ਬਲੱਡ ਸ਼ੂਗਰ ਲੈਵਲ ਰਾਤ ਸੱਤ ਵਜੇ ਦੇ ਕਰੀਬ 217 ਸੀ, ਜਿਸ ਮਗਰੋਂ ਤਿਹਾੜ ਜੇਲ੍ਹ ਵਿਚ ਕੇਜਰੀਵਾਲ ਦੀ ਦੇਖਭਾਲ ਕਰ ਰਹੇ ਡਾਕਟਰਾਂ ਨੇ ਉਨ੍ਹਾਂ ਨੂੰ ਇਨਸੁਲਿਨ ਦੀ ਖੁਰਾਕ ਦੇਣ ਦਾ ਫੈਸਲਾ ਕੀਤਾ ਸੀ। ਏਮਸ ਦੇ ਮਾਹਿਰਾਂ ਨੇ 20 ਅਪਰੈਲ ਨੂੰ ਮੁੱਖ ਮੰਤਰੀ ਨਾਲ ਕੀਤੀ ਵੀਡੀਓ ਕਾਨਫਰੰਸਿੰਗ ਦੌਰਾਨ ਤਿਹਾੜ ਜੇਲ੍ਹ ਦੇ ਡਾਕਟਰਾਂ ਨੂੰ ਸਲਾਹ ਦਿੱਤੀ ਸੀ ਸ਼ੂਗਰ ਦਾ ਲੈਵਲ ਇਕ ਪੱਧਰ ਤੋਂ ਵਧਣ ਉੱਤੇ ਕੇਜਰੀਵਾਲ ਨੂੰ ਇਨਸੁਲਿਨ ਦਿੱਤੀ ਜਾ ਸਕਦੀ ਹੈ।
ਉਧਰ ਦਿੱਲੀ ਦੇ ਕੈਬਨਿਟ ਮੰਤਰੀ ਸੌਰਭ ਭਾਰਦਵਾਜ ਨੇ ਆਪਣੇ ਹਲਕੇ ਵਿਚ ਹਨੂਮਾਨ ਜੈਅੰਤੀ ਦੇ ਜਸ਼ਨਾਂ ਲਈ ਰੱਖੇ ਸਮਾਗਮ ’ਚ ਸ਼ਿਰਕਤ ਕੀਤੀ। ਇਸ ਦੌਰਾਨ ਭਗਵਾਨ ਹਨੂਮਾਨ ਦੀ ਪੁਸ਼ਾਕ ਵਿਚ ਸਜੇ ਸ਼ਖ਼ਸ ਨੇ ਇਨਸੁਲਿਨ ਦੀਆਂ ਛੋਟੀਆਂ ਸ਼ੀਸ਼ੀਆਂ ਫੜੀਆਂ ਸਨ ਜਦੋਂਕਿ ਭਾਰਦਵਾਜ ਨੇ ਗੁਰਜ ਫੜੀ ਹੋਈ ਸੀ। ਦੋਵੇਂ ਇਕ ਵਾਹਨ ਦੀ ਛੱਤ ’ਤੇ ਸਵਾਰ ਸਨ। ਗੁਰਜ ਉੱਤੇ ਇਨਸੁਲਿਨ ਦੀਆਂ ਸ਼ੀਸ਼ੀਆਂ ਫਸਾਈਆਂ ਹੋਈਆਂ ਸਨ। ਭਾਰਦਵਾਜ ਨੇ ਪੀਟੀਆਈ ਵੀਡੀਓਜ਼ ਨੂੰ ਦੱਸਿਆ, ‘‘ਹਨੂਮਾਨ ਜੀ ਨੇ ਆਪਣੇ ਭਗਤ ਅਰਵਿੰਦ ਕੇਜਰੀਵਾਲ ਨੂੰ ਇਨਸੁਲਿਨ ਦਿੱਤੀ ਹੈ। ਕੋਰਟ ਨੇ ਹੁਕਮ ਪਾਸ ਕੀਤੇ, ਪਰ ਜੇਲ੍ਹ ਨੇ ਨਾਂਹ ਕਰ ਦਿੱਤੀ ਪਰ ਹਨੂਮਾਨ ਜੀ ਕਰਕੇ ਕੇਜਰੀਵਾਲ ਨੂੰ ਇਨਸੁਲਿਨ ਮਿਲੀ। ਅਸੀਂ ਉਨ੍ਹਾਂ ਦੀ ਚੰਗੀ ਸਿਹਤ, ਲੰਮੀ ਉਮਰ ਤੇ ਜੇਲ੍ਹ ਵਿਚੋਂ ਜਲਦੀ ਰਿਹਾਈ ਦੀ ਪ੍ਰਾਰਥਨਾ ਕਰਦੇ ਹਾਂ।’’ ਉਧਰ ਰਾਜ ਸਭਾ ਮੈਂਬਰ ਸੰਜੈ ਸਿੰਘ ਨੇ ਕਿਹਾ ਕਿ ਭਗਵਾਨ ਹਨੂਮਾਨ ਦੇ ਅਸ਼ੀਰਵਾਦ ਸਦਕਾ ਮੁੱਖ ਮੰਤਰੀ ਨੂੰ ਤਿਹਾੜ ਜੇਲ੍ਹ ਵਿਚ ਕਰੀਬ 23 ਦਿਨਾਂ ਬਾਅਦ ਇਨਸੁਲਿਨ ਮਿਲਿਆ ਹੈ। ਕੈਬਨਿਟ ਮੰਤਰੀ ਆਤਿਸ਼ੀ ਨੇ ਵੀ ਇਨਸੁਲਿਨ ਦੇਣ ਦਾ ਸਵਾਗਤ ਕੀਤਾ ਹੈ। -ਪੀਟੀਆਈ