ਪੱਤਰ ਪ੍ਰੇਰਕ
ਯਮੁਨਾਨਗਰ, 15 ਸਤੰਬਰ
ਇਥੋਂ ਦੀ ਅਮਰਪੁਰੀ ਕਲੋਨੀ ਵਿੱਚ ਛੇ ਸਾਲਾ ਬੱਚੀ ਨਾਲ ਜਬਰ-ਜਨਾਹ ਕਰਨ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਜਾਣਕਾਰੀ ਮੁਤਾਬਕ ਆਪਣੀ ਬੇਟੀ ਨੂੰ ਘਰ ਵਿੱਚ ਨਾ ਵੇਖ ਕੇ ਜਦੋਂ ਉਸ ਦੀ ਮਾਂ ਨੇ ਭਾਲ ਸ਼ੁਰੂ ਕੀਤੀ ਤਾਂ ਗੁਆਂਢ ਵਿੱਚ ਰਹਿ ਰਹੇ 22 ਸਾਲਾ ਨੌਜਵਾਨ ਦੇ ਘਰੋਂ ਲੜਕੀ ਮਿਲੀ। ਲੜਕੇ ਨੇ ਕਥਿਤ ਤੌਰ ’ਤੇ ਬੱਚੀ ਨੂੰ ਚਿਪਸ ਦਾ ਪੈਕੇਟ ਦੇਣ ਦੇ ਬਹਾਨੇ ਬੁਲਾਇਆ ਅਤੇ ਬੱਚੀ ਨਾਲ ਜਬਰ-ਜਨਾਹ ਕੀਤਾ। ਬੱਚੀ ਦੀ ਮਾਂ ਨੇ ਕਿਹਾ ਕਿ ਜਦੋਂ ਉਸ ਨੇ ਲੜਕੇ ਦੇ ਘਰ ਦੇ ਬਾਹਰ ਦੇ ਦਰਵਾਜ਼ੇ ਵਿੱਚੋਂ ਵੇਖਿਆ ਤਾਂ ਮਾਸੂਮ ਬੱਚੀ ਦੇ ਸਰੀਰ ’ਤੇ ਕੱਪੜੇ ਨਹੀਂ ਸਨ। ਉਸ ਦੇ ਹੱਥਾਂ ਵਿੱਚ ਚਿਪਸ ਦਾ ਪੈਕੇਟ ਸੀ। ਉਧਰ ਰੋਹ ਵਿੱਚ ਆਏ ਲੋਕਾਂ ਨੇ ਮੁਲਜ਼ਮ ਨੂੰ ਪੁਲੀਸ ਦੇ ਹਵਾਲੇ ਕਰ ਦਿੱਤਾ। ਜਾਂਚ ਅਧਿਕਾਰੀ ਭੁਪਿੰਦਰ ਨੇ ਦੱਸਿਆ ਕਿ ਬੱਚੀ ਦੀ ਮਾਂ ਦੇ ਬਿਆਨਾਂ ਦੇ ਆਧਾਰ ’ਤੇ ਮੁਲਜ਼ਮ ਖ਼ਿਲਾਫ਼ ਕੇਸ ਦਰਜ ਕਰ ਲਿਆ ਹੈ।