ਨਿੱਜੀ ਪੱਤਰ ਪ੍ਰੇਰਕ
ਜਲੰਧਰ, 9 ਜੂਨ
ਪੰਜਾਬ ਸਰਕਾਰ ਨੇ ਝੋਨਾ ਲਗਾਉਣ ਲਈ 10 ਜੂਨ ਦਾ ਦਿਨ ਤੈਅ ਕੀਤਾ ਹੋਇਆ ਹੈ ਪਰ ਦੋਆਬੇ ਦੇ ਕਈ ਪਿੰਡਾਂ ਵਿੱਚ ਕਿਸਾਨਾਂ ਨੇ ਇੱਕ ਦਿਨ ਪਹਿਲਾਂ ਹੀ ਝੋਨਾ ਲਗਾਉਣਾ ਸ਼ੁਰੂ ਕਰ ਦਿੱਤਾ ਹੈ। ਕਰੋਨਾ ਕਰਕੇ ਪਰਵਾਸੀ ਮਜ਼ਦੂਰਾਂ ਵੱਲੋਂ ਆਪਣੇ ਪਿੱਤਰੀ ਸੂਬਿਆਂ ਨੂੰ ਪਰਤਣ ਕਾਰਨ ਲੇਬਰ ਦਾ ਸੰਕਟ ਖੜ੍ਹਾ ਹੋ ਗਿਆ ਹੈ। ਸਾਲ 2020 ਵਿੱਚ ਕਰੋਨਾ ਦੀ ਲਾਗ ਫੈਲਣੀ ਸ਼ੁਰੂ ਹੋਈ ਸੀ। ਕਰੋਨਾ ਕਾਲ ਦੌਰਾਨ ਹੀ ਝੋਨੇ ਦੀ ਦੂਜੀ ਫਸਲ ਲੱਗ ਰਹੀ ਹੈ।
ਕਈ ਵੱਡੇ ਕਿਸਾਨਾਂ ਨੇ ਲੇਬਰ ਦੇ ਸੰਕਟ ਤੋਂ ਨਿਜ਼ਾਤ ਪਾਉਣ ਲਈ ਮਸ਼ੀਨਾਂ ਨਾਲ ਝੋਨਾ ਲਗਵਾਉਣ ਨੂੰ ਤਰਜੀਹ ਦੇਣੀ ਸ਼ੁਰੂ ਕਰ ਦਿੱਤੀ ਹੈ। ਮਜ਼ਦੂਰਾਂ ਦੀਆਂ ਟੋਲੀਆਂ ਪਿੰਡਾਂ ਵਿੱਚ ਨਜ਼ਰ ਵੀ ਆਉਣ ਲੱਗ ਪਈਆਂ ਹਨ ਪਰ ਇਹ ਸਾਰਾ ਕੁਝ ਹੁਣ ਪਹਿਲਾਂ ਵਾਂਗ ਨਹੀਂ ਰਿਹਾ। ਵੱਡੇ ਕਿਸਾਨਾਂ ਨੇ ਆਪੋ-ਆਪਣੀਆਂ ਮੋਟਰਾਂ ’ਤੇ ਲੇਬਰਾਂ ਦੇ ਡੇਰੇ ਲਗਵਾ ਦਿੱਤੇ ਹਨ। ਝੋਨਾ ਲਗਾਉਣ ਵਿੱਚ ਕਾਹਲੀ ਕਰ ਰਹੇ ਕਿਸਾਨਾਂ ਦਾ ਕਹਿਣਾ ਸੀ ਕਿ ਉਨ੍ਹਾਂ ਨੇ ਦਿੱਲੀ ਚੱਲ ਰਹੇ ਮੋਰਚੇ ਵਿੱਚ ਵੀ ਡਟਣਾ ਹੈ।
ਪਿੰਡ ਸੰਧੂ ਚੱਠਾ ਦੇ ਖੇਤਾਂ ਵਿੱਚ ਝੋਨਾ ਲਾ ਰਹੇ ਮਜ਼ਦੂਰਾਂ ਦਾ ਕਹਿਣਾ ਸੀ ਕਿ ਭਾਵੇਂ ਪਿਛਲੇ ਸਾਲ ਉਨ੍ਹਾਂ ਨੇ ਪੰਜ ਹਜ਼ਾਰ ਪ੍ਰਤੀ ਏਕੜ ਦੇ ਹਿਸਾਬ ਨਾਲ ਝੋਨਾ ਲਗਾਇਆ ਸੀ ਪਰ ਇਸ ਬਾਰੇ ਅਜੇ ਰੇਟ ਤੈਅ ਨਹੀਂ ਕੀਤਾ ਕਿਉਂਕਿ ਉਹ ਲੰਘੀ ਰਾਤ ਹੀ ਬਿਹਾਰ ਤੋਂ ਆਏ ਹਨ। ਖੇਤਾਂ ਵਿੱਚ 12 ਮਜ਼ਦੂਰਾਂ ਦੀ ਟੋਲੀ ਝੋਨਾ ਲਗਾ ਰਹੀ ਸੀ। ਜਲੰਧਰ ਜ਼ਿਲ੍ਹੇ ਦੇ ਪਿੰਡ ਚੱਕ ਚੇਲਾ ਦੇ ਸਰਪੰਚ ਜੋਗਾ ਸਿੰਘ ਦਾ ਕਹਿਣਾ ਸੀ ਕਿ ਉਹ 450 ਏਕੜ ਦੇ ਕਰੀਬ ਝੋਨਾ ਲਗਾਉਂਦੇ ਹਨ। ਬਹੁਤਾ ਝੋਨਾ ਤਾਂ ਮਸ਼ੀਨ ਨਾਲ ਲਗਾਇਆ ਜਾਂਦਾ ਹੈ। ਥੋੜ੍ਹਾ ਬਹੁਤਾ ਲੇਬਰ ਕੋਲੋਂ ਵੀ ਲਗਵਾਇਆ ਜਾਂਦਾ ਹੈ।
ਇਸੇ ਤਰ੍ਹਾਂ ਡੱਲਾ ਸਾਹਿਬ ਤੋਂ ਸੁਲਤਾਨਪੁਰ ਜਾਣ ਵਾਲੀ ਸੜਕ ’ਤੇ ਵੀ ਕਈ ਥਾਵਾਂ ’ਤੇ ਝੋਨਾ ਲੱਗਾ ਹੋਇਆ ਸੀ। ਕਿਸਾਨ ਫੁੰਮਣ ਸਿੰਘ ਦਾ ਕਹਿਣਾ ਸੀ ਕਿ ਪਿਛਲੀ ਵਾਰ ਦਾ ਰੇਟ ਤਾਂ 3500 ਤੋਂ 3800 ਰੁਪਏ ਤੱਕ ਸੀ ਇਸ ਵਾਰ ਇਹ ਵੱਧ ਤੋਂ ਵੱਧ 4500 ਰੁਪਏ ਪ੍ਰਤੀ ਏਕੜ ਤੱਕ ਰਹਿਣ ਦੀ ਸੰਭਾਵਨਾ ਹੈ।