ਜਤਿੰਦਰ ਚੀਮਾ
ਕਰੋਨਾ ਮਹਾਮਾਰੀ ਦੇ ਚੱਲਦਿਆਂ ਟਰੂਡੋ ਸਰਕਾਰ ਵੱਲੋਂ ਆਰਥਿਕਤਾ ਨੂੰ ਆਪਣੇ ਪੈਰਾਂ ’ਤੇ ਖੜ੍ਹੇ ਰੱਖਣ ਲਈ ਕੀਤੇ ਯਤਨਾਂ ਨੂੰ ਬਹੁਗਿਣਤੀ ਕੈਨੇਡਾ ਵਾਸੀਆਂ ਨੇ ਸਰਾਹਿਆ ਹੈ। ਚਾਹੇ ਇਸ ਗਿਣਤੀ ਵਿਚ ਅਪਰੈਲ ਮਹੀਨੇ ਦੇ ਮੁਕਾਬਲੇ 2 ਪ੍ਰਤੀਸ਼ਤ ਦੀ ਕਮੀ ਵੀ ਵੇਖੀ ਗਈ ਹੈ, ਪਰ ਫਿਰ ਵੀ 50 ਪ੍ਰਤੀਸ਼ਤ ਤੋਂ ਵੱਧ ਕੈਨੇਡਾ ਵਾਸੀਆਂ ਨੇ ਇਸ ਦੇ ਹੱਕ ਵਿਚ ਗਵਾਹੀ ਭਰੀ ਹੈ। ਇਸ ਦਾ ਫਾਇਦਾ ਲੈਣ ਲਈ ਐਤਵਾਰ ਨੂੰ ਜਸਟਿਨ ਟਰੂਡੋ ਨੇ ਫੈਡਰਲ ਚੋਣਾਂ ਕਰਾਉਣ ਦਾ ਐਲਾਨ ਕਰ ਦਿੱਤਾ ਹੈ।
ਚਾਹੇ ਲਬਿਰਲ ਪਾਰਟੀ ਦੇ ਨੀਤੀਕਾਰਾਂ ਦਾ ਇਹ ਮੰਨਣਾ ਹੈ ਕਿ ਇਕੱਲੀ ਕਰੋਨਾ ਮਹਾਮਾਰੀ ਦੌਰਾਨ ਕੀਤੇ ਕੰਮਾਂ ਨੂੰ ਆਧਾਰ ਬਣਾ ਕੇ ਚੋਣਾਂ ਦਾ ਬਿਗਲ ਵਜਾਉਣਾ ਕੋਈ ਸਮਝਦਾਰੀ ਵਾਲਾ ਫ਼ੈਸਲਾ ਨਹੀਂ, ਪਰ ਦੂਸਰੇ ਪਾਸੇ ਬਹੁਗਿਣਤੀ ਕੈਨੇਡਾ ਵਾਸੀਆਂ ਵੱਲੋਂ ਲਬਿਰਲ ਸਰਕਾਰ ਵੱਲੋਂ ਕੀਤੇ ਜਾ ਰਹੇ ਯਤਨਾਂ ਦੀ ਹੋ ਰਹੀ ਸ਼ਲਾਘਾ ਨੂੰ ਵੀ ਅੱਖੋਂ ਪਰੋਖੇ ਨਹੀਂ ਕੀਤਾ ਜਾ ਸਕਦਾ। ਜੇਕਰ ਲਬਿਰਲ ਚੋਣਾਂ ਨੂੰ ਕੁਝ ਸਮੇਂ ਲਈ ਟਾਲਿਆ ਜਾਂਦਾ ਤਾਂ ਹੋ ਸਕਦਾ ਹੈ ਕਿ ਇਸ ਗਿਣਤੀ ਵਿਚ ਕਮੀ ਵੀ ਆ ਜਾਵੇ ਜਿਵੇਂ ਕਿ ਅਪਰੈਲ ਦੇ ਮੁਕਾਬਲੇ ਮਈ ਤੇ ਜੂਨ ਵਿਚ 2 ਫੀਸਦੀ ਦੀ ਕਮੀ ਦਰਜ ਕੀਤੀ ਗਈ ਹੈ।
ਇਸੇ ਦੌਰਾਨ ਇਕ ਹੋਰ ਸਰਵੇਖਣ ਵਿਚ 38% ਕੈਨੇਡੀਅਨਾਂ ਨੇ ਚੋਣਾਂ ਦਾ ਸਖ਼ਤ ਵਿਰੋਧ ਕੀਤਾ ਹੈ ਤੇ ਕੇਵਲ 26% ਲੋਕਾਂ ਨੇ ਹੀ ਚੋਣਾਂ ਕਰਾਉਣ ਦੇ ਫ਼ੈਸਲੇ ਦੀ ਹਮਾਇਤ ਕੀਤੀ ਹੈ। ਇਨ੍ਹਾਂ ਸਰਵੇਖਣਾਂ ਵਿਚ ਬਹੁਗਿਣਤੀ ਕੈਨੇਡਾ ਵਾਸੀਆਂ ਨੇ ਚੋਣਾਂ ਦੇ ਮੁਕਾਬਲੇ ਆਰਥਿਕਤਾ ਨੂੰ ਭਵਿੱਖ ਵਿਚ ਪੈਰਾਂ ’ਤੇ ਲਿਆਉਣ ਨੂੰ ਤਰਜੀਹ ਦਿੱਤੀ। ਉਨ੍ਹਾਂ ਨੇ ਦੂਸਰੇ ਨੰਬਰ ’ਤੇ ਵਾਤਾਵਰਣ ਅਤੇ ਤੀਜੇ ਨੰਬਰ ’ਤੇ ਕਰੋਨਾ ਮਹਾਮਾਰੀ ਨੂੰ ਰੱਖਿਆ ਹੈ।
ਰਾਜਨੀਤਕ ਮਾਹਿਰਾਂ ਦਾ ਇਹ ਮੰਨਣਾ ਹੈ ਕਿ ਅਗਲੇ ਮਹੀਨੇ ਹੋਣ ਵਾਲੀਆਂ ਚੋਣਾਂ ’ਤੇ ਲਬਿਰਲਜ਼ ਦੀ ਸਰਕਾਰ ਬਣਾਉਣ ਦੀਆਂ ਉਮੀਦਾਂ ’ਤੇ ਜੇਕਰ ਕੋਈ ਪਾਣੀ ਫੇਰ ਸਕਦਾ ਹੈ ਤਾਂ ਉਹ ਹੈ ਐੱਨ.ਡੀ.ਪੀ. ਦਾ ਜਗਮੀਤ ਸਿੰਘ। ਵੱਖੋ-ਵੱਖਰੀਆਂ ਏਜੰਸੀਆਂ ਵੱਲੋਂ ਕੀਤੇ ਗਏ ਸਰਵੇਖਣਾਂ ਵਿਚ ਲੋਕਾਂ ਨੇ ਟਰੂਡੋ ਦੇ ਬਦਲ ਵਜੋਂ ਓ. ਟੂਲ ਦੇ ਮੁਕਾਬਲੇ ਐੱਨ.ਡੀ.ਪੀ. ਦੇ ਮੁਖੀ ਜਗਮੀਤ ਸਿੰਘ ਨੂੰ ਬਿਹਤਰ ਪ੍ਰਧਾਨ ਮੰਤਰੀ ਦੇ ਤੌਰ ’ਤੇ ਸਰਾਹਿਆ ਹੈ। ਇਨ੍ਹਾਂ ਸਰਵੇਖਣਾਂ ਅਨੁਸਾਰ ਜਿੱਥੇ ਜਗਮੀਤ ਸਿੰਘ ਦੀ ਹਰਮਨਪਿਆਰਤਾ ਵਧ ਰਹੀ ਹੈ, ਉੱਥੇ ਕੰਜ਼ਰਵੇਟਿਵ ਦੇ ਮੁਖੀ ਓ. ਟੂਲ ਦੀ ਸਾਖ਼ ਨੂੰ ਦਿਨ ਬ ਦਿਨ ਧੱਕਾ ਲੱਗ ਰਿਹਾ ਹੈ। ਅਜਿਹੇ ਵਿਚ ਰਾਜਨੀਤਕ ਆਲੋਚਕਾਂ ਦਾ ਇਹ ਮੰਨਣਾ ਹੈ ਕਿ ਜਗਮੀਤ ਸਿੰਘ ਦੀ ਵਧ ਰਹੀ ਹਰਮਨਪਿਆਰਤਾ ਨੇ ਲਬਿਰਲਾਂ ਨੂੰ ਵੀ ਡੂੰਘੀ ਚਿੰਤਾ ਵਿਚ ਪਾ ਦਿੱਤਾ ਹੈ। ਤਾਜ਼ਾ ਸਰਵੇਖਣਾਂ ਵਿਚ ਐੱਨ.ਡੀ.ਪੀ. ਨੂੰ 20 ਪ੍ਰਤੀਸ਼ਤ ਕੈਨੇਡੀਅਨ ਵੋਟਰਾਂ ਨੇ ਵੋਟ ਪਾਉਣ ਦੀ ਹਾਮੀ ਭਰੀ ਹੈ ਜਦੋਂ ਕਿ ਓ. ਟੂਲ ਦੀ ਅਗਵਾਈ ਵਾਲੀ ਕੰਜ਼ਰਵੇਟਿਵ ਪਾਰਟੀ ਦੀ ਹਰਮਨਪਿਆਰਤਾ 29 ਪ੍ਰਤੀਸ਼ਤ ਤੋਂ ਘਟ ਕੇ 20 ਪ੍ਰਤੀਸ਼ਤ ’ਤੇ ਆ ਗਈ ਹੈ। ਇੱਥੇ ਇਹ ਵਿਚਾਰਨਯੋਗ ਹੈ ਕਿ ਓ. ਟੂਲ ਦੇ ਮੁਖੀ ਬਣਨ ਤੋਂ ਬਾਅਦ ਕਿਸੇ ਵੀ ਸਰਵੇਖਣ ਵਿਚ ਕੰਜ਼ਰਵੇਟਿਵ ਪਾਰਟੀ ਹਰਮਨਪਿਆਰਤਾ ਦਾ 30 ਪ੍ਰਤੀਸ਼ਤ ਦਾ ਅੰਕੜਾ ਪਾਰ ਨਹੀਂ ਕਰ ਸਕੀ।
ਹਾਲ ਹੀ ਵਿਚ ਪ੍ਰਧਾਨ ਮੰਤਰੀ ਟਰੂਡੋ ਵੱਲੋਂ ਅਲਬਰਟਾ ਅਤੇ ਬੀਸੀ ਦੇ ਤੂਫ਼ਾਨੀ ਦੌਰਿਆਂ ਦੌਰਾਨ ਕਈ ਵਿਕਾਸ ਪ੍ਰਾਜੈਕਟਾਂ ਲਈ ਫੈਡਰਲ ਸਰਕਾਰ ਵੱਲੋਂ ਫੰਡਿਗ ਦਾ ਐਲਾਨ ਕੀਤਾ ਗਿਆ। ਇਨ੍ਹਾਂ ਵਿਚ ਖ਼ਾਸ ਕਰਕੇ ਟਰੂਡੋ ਵੱਲੋਂ ਕੈਲਗਰੀ ਸ਼ਹਿਰ ਵਿਚ ਲੋਕਲ ਟਰੇਨ ਦੇ ਪ੍ਰਾਜੈਕਟ ਨੂੰ ਹਰੀ ਝੰਡੀ ਦੇਣਾ ਮੁੱਖ ਸੀ। ਟਰੂਡੋ ਵੱਲੋਂ ਅਲਬਰਟਾ ਵਿਚ ਦਿਖਾਈ ਜਾ ਰਹੀ ਰੁਚੀ ਦਾ ਮੁੱਖ ਕਾਰਨ ਅਲਬਰਟਾ ਵਿਚ ਲਬਿਰਲਜ਼ ਦੀ ਵਧ ਰਹੀ ਹਰਮਨਪਿਆਰਤਾ ਤੇ ਅਲਬਰਟਾ ਪ੍ਰੀਮੀਅਰ ਜਸਟਿਨ ਕੈਨੀ ਦੀ ਹੋ ਰਹੀ ਆਲੋਚਨਾ ਵੀ ਮੁੱਖ ਕਾਰਨ ਹੈ। ਲਬਿਰਲਜ਼ ਦਾ ਇਹ ਮੰਨਣਾ ਹੈ ਕਿ ਕੈਨੀ ਦੀ ਘਟ ਰਹੀ ਹਰਮਨਪਿਆਰਤਾ ਕਾਰਨ ਲਬਿਰਲਜ਼ ਦੀਆਂ ਵੋਟਾਂ ਵਿਚ ਪਿਛਲੀਆਂ ਚੋਣਾਂ ਦੇ ਮੁਕਾਬਲੇ ਵਾਧਾ ਹੋਵੇਗਾ ਤੇ ਲਬਿਰਲਜ਼ ਨੂੰ ਪੱਕਾ ਭਰੋਸਾ ਹੈ ਕਿ ਉਹ ਇਸ ਵਾਰ ਤਿੰਨ ਤੋਂ ਚਾਰ ਪਾਰਲੀਮੈਂਟ ਸੀਟਾਂ ਅਲਬਰਟਾ ਵਿਚੋਂ ਜਿੱਤ ਲੈਣਗੇ।
ਦੂਸਰੇ ਪਾਸੇ ਬੀਸੀ ਵਿਚ ਲਬਿਰਲਜ਼ ਤੇ ਐੱਨ.ਡੀ.ਪੀ. ਦਾ ਸਖ਼ਤ ਮੁਕਾਬਲਾ ਦੇਖਣ ਨੂੰ ਮਿਲਣ ਦੀ ਸੰਭਾਵਨਾ ਹੈ। ਲਬਿਰਲਜ਼ ਵੱਲੋਂ ਵੈਨਕੁਵਰ ਦੇ ਲੋਅਰਮੈਨ ਲੈਂਡ ’ਤੇ ਜ਼ਿਆਦਾ ਜ਼ੋਰ ਦਿੱਤਾ ਜਾ ਰਿਹਾ ਹੈ ਜਿੱਥੇ ਪਿਛਲੀਆਂ ਚੋਣਾਂ ਵਿਚ ਲਬਿਰਲਜ਼ ਕਾਫ਼ੀ ਘੱਟ ਵੋਟਾਂ ’ਤੇ ਕਈ ਸੀਟਾਂ ਤੋਂ ਐੱਨ.ਡੀ.ਪੀ. ਤੋਂ ਮਾਰ ਖਾ ਗਈ ਸੀ। ਪਰ ਪਿਛਲੇ ਸਾਲ ਐੱਨ.ਡੀ.ਪੀ. ਦੀ ਸੂਬਾ ਸਰਕਾਰ ਵੱਲੋਂ ਸਮੇਂ ਤੋਂ ਪਹਿਲਾਂ ਕਰਾਈਆਂ ਚੋਣਾਂ ਵਿਚ ਮਿਲੀ ਬਹੁਸੰਮਤੀ ਐੱਨ.ਡੀ.ਪੀ. ਦੀ ਫੈਡਰਲ ਪਾਰਟੀ ਦੀਆਂ ਸੰਭਾਵਨਾਵਾਂ ਨੂੰ ਵੀ ਹੁਲਾਰਾ ਦੇ ਸਕਦੀ ਹੈ। ਰਾਜਨੀਤਕ ਮਾਹਿਰਾਂ ਦਾ ਇਹ ਮੰਨਣਾ ਹੈ ਕਿ ਬੀਸੀ ਵਿਚ ਐੱਨ.ਡੀ.ਪੀ. ਨੂੰ ਪਛਾੜਨਾ ਲਬਿਰਲਜ਼ ਲਈ ਬੜਾ ਔਖਾ ਸਾਬਤ ਹੋਵੇਗਾ।
ਅਜਿਹੇ ਵਿਚ ਜੇਕਰ ਵੱਖ-ਵੱਖ ਸਰਵੇਖਣਾਂ ’ਤੇ ਝਾਤ ਮਾਰੀਏ ਤਾਂ ਹਰ ਸਰਵੇਖਣ ਵਿਚ ਜਗਮੀਤ ਸਿੰਘ ਦੀ ਹਰਮਨਪਿਆਰਤਾ ਕੈਨੇਡਾ ਵਾਸੀਆਂ ਵਿਚ ਵਧ ਰਹੀ ਹੈ। ਜੇਕਰ ਜਗਮੀਤ ਦੀ ਇਹ ਵਧ ਰਹੀ ਹਰਮਨਪਿਆਰਤਾ ਚੋਣਾਂ ਦੌਰਾਨ ਵੋਟਾਂ ਦੇ ਰੂਪ ਵਿਚ ਬਦਲਦੀ ਹੈ ਤਾਂ ਐੱਨ.ਡੀ.ਪੀ. ਲਬਿਰਲਜ਼ ਦੇ ਸੁਪਨਿਆਂ ’ਤੇ ਪਾਣੀ ਫੇਰ ਸਕਦੀ ਹੈ ਤੇ ਉਨ੍ਹਾਂ ਦੀਆਂ ਬਹੁਸੰਮਤੀ ਵਾਲੀ ਸਰਕਾਰ ਬਣਾਉਣ ਦੀਆਂ ਸਕੀਮਾਂ ਧਰੀਆਂ ਧਰਾਈਆਂ ਰਹਿ ਜਾਣਗੀਆਂ। ਆਉਣ ਵਾਲੇ ਸਮੇਂ ਵਿਚ ਵੇਖਣਾ ਹੋਵੇਗਾ ਕਿ ਜਗਮੀਤ ਸਿੰਘ ਜੇਕਰ ਆਪਣੀ ਹਰਮਨਪਿਆਰਤਾ ਵਿਚ ਇਸੇ ਤਰ੍ਹਾਂ ਵਾਧਾ ਕਰਦਾ ਗਿਆ ਤਾਂ ਉਹ ਲਬਿਰਲਜ਼ ਲਈ ਇਕ ਵੱਡੀ ਚੁਣੌਤੀ ਬਣ ਸਕਦਾ ਹੈ।
ਸੰਪਰਕ: 403-629-3577