ਪੱਤਰ ਪ੍ਰੇਰਕ
ਨਵੀਂ ਦਿੱਲੀ, 15 ਜੁਲਾਈ
ਦਿੱਲੀ ਦੇ ਉਪ ਮੁੱਖ ਮੰਤਰੀ ਮਨੀਸ਼ ਸਿਸੋਦੀਆ ਵੱਲੋਂ ਦਿੱਲੀ ਸਿੱਖਿਆ ਬੋਰਡ ਕਮੇਟੀ ਤੇ ਦਿੱਲੀ ਪਾਠਕ੍ਰਮ ਸੁਧਾਰ ਕਮੇਟੀ ਦੀ ਮੀਟਿੰਗ ਸੱਦੀ ਗਈ। ਦਿੱਲੀ ਸਕੱਤਰੇਤ ਵਿੱਚ ਹੋਈ ਇਸ ਬੈਠਕ ਦੌਰਾਨ ਸ੍ਰੀ ਸਿਸੋਦੀਆ ਨੇ ਦੋ ਕਮੇਟੀਆਂ ਦੇ ਗਠਨ ਦਾ ਐਲਾਨ ਕੀਤਾ। ਇਹ ਕਮੇਟੀਆਂ ਦਿੱਲੀ ਸਿੱਖਿਆ ਬੋਰਡ ਦੇ ਗਠਨ ਅਤੇ ਪਾਠਕ੍ਰਮ ਸੁਧਾਰਾਂ ਲਈ ਯੋਜਨਾਵਾਂ ਤੇ ਫਰੇਮਵਰਕ ਤਿਆਰ ਕਰਨਗੀਆਂ। ਚੇਤੇ ਰਹੇ ਕਿ ਸਾਲਾਨਾ ਬਜਟ 2020-21 ਵਿੱਚ ਦਿੱਲੀ ਸਰਕਾਰ ਨੇ ਪਾਠਕ੍ਰਮ ਸੁਧਾਰ ਤੇ ਇੱਕ ਨਵਾਂ ਸਿੱਖਿਆ ਬੋਰਡ ਦੀ ਯੋਜਨਾ ਦਾ ਐਲਾਨ ਕੀਤਾ ਸੀ। ਮੀਟਿੰਗ ’ਚ ਸ੍ਰੀ ਸਿਸੋਦੀਆ ਨੇ ਬਾਰ੍ਹਵੀਂ ਜਮਾਤ ਦੀਆਂ ਬੋਰਡਾਂ ਦੀਆਂ ਪ੍ਰੀਖਿਆਵਾਂ ਵਿੱਚ ਦਿੱਲੀ ਦੇ ਸਰਕਾਰੀ ਸਕੂਲਾਂ ਦੀ ਪ੍ਰਭਾਵਸ਼ਾਲੀ ਕਾਰਗੁਜ਼ਾਰੀ ਬਾਰੇ ਵਿਚਾਰ ਵਟਾਂਦਰੇ ਕੀਤੇ। ਉਨ੍ਹਾਂ ਕਿਹਾ ਕਿ ਟੀਮ ਸਿੱਖਿਆ ਨੂੰ ਹੁਣ ਇਸ ਤੋਂ ਅੱਗੇ ਜਾਣ ਬਾਰੇ ਸੋਚਣਾ ਪਏਗਾ। ਉਨ੍ਹਾਂ ਕਿਹਾ ਕਿ ਇਹ ਮਿਸਾਲੀ ਪ੍ਰਦਰਸ਼ਨ ਪਿਛਲੇ ਪੰਜ ਸਾਲਾਂ ਵਿੱਚ ਕੀਤੇ ਕੰਮ ਦਾ ਨਤੀਜਾ ਹੈ। ਉਨ੍ਹਾਂ ਕਿਹਾ ਕਿ 98 ਫ਼ੀਸਦ ਨਤੀਜਾ ਕਾਫ਼ੀ ਨਹੀਂ ਹੈ ਪਰ ਸਾਨੂੰ ਸਿੱਖਿਆ ਨੂੰ ਅਗਲੇ ਪੱਧਰ ਤੱਕ ਲਿਜਾਣ ਲਈ ਮਿਲ ਕੇ ਕੰਮ ਕਰਨਾ ਪਏਗਾ। ਇਸ ਦੌਰਾਨ ਉਨ੍ਹਾਂ ਕਿਹਾ ਕਿ ਅਗਲੇ ਪੰਜ ਸਾਲਾਂ ਲਈ ਸਾਡਾ ਟੀਚਾ ਦਿੱਲੀ ਦੀ ਸਿੱਖਿਆ ਪ੍ਰਣਾਲੀ ਨੂੰ ਬਦਲਣਾ ਹੈ ਤੇ ਇਹ ਦੋਵੇਂ ਕਮੇਟੀਆਂ ਸਾਨੂੰ ਦੱਸਣਗੀਆਂ ਕਿ ਇਹ ਕਿਵੇਂ ਸੰਭਵ ਹੈ। ਦਿੱਲੀ ਸਟੇਟ ਬੋਰਡ ਆਫ਼ ਐਜੂਕੇਸ਼ਨ ਦਾ ਡਿਜ਼ਾਈਨ ਕਰਨ ਵਾਲੀ ਕਮੇਟੀ ਦੁਨੀਆ ਭਰ ’ਚ ਸਿੱਖਿਆ ਦੇ ਮੁਲਾਂਕਣ ਦੀਆਂ ਚੰਗੀਆਂ ਉਦਾਹਰਣਾਂ ਦਾ ਅਧਿਐਨ ਕਰੇਗੀ। ਇਸ ਤੋਂ ਇਲਾਵਾ ਮੌਜੂਦਾ ਮੁਲਾਂਕਣ ਪ੍ਰਣਾਲੀ ਨੂੰ ਬਿਹਤਰ ਬਣਾਉਣ ਲਈ ਵਿਦਿਆਰਥੀਆਂ ਦੇ ਅਨੁਕੂਲ ਯੋਜਨਾਬੰਦੀ ਲਈ ਇੱਕ ਰੋਡਮੈਪ ਤਿਆਰ ਕਰੇਗਾ। ਇਸ ਕਮੇਟੀ ਦੇ ਮੈਂਬਰਾਂ ਵਿੱਚ ਪ੍ਰੋ. ਅੰਕੁਰ ਸਰੀਨ (ਆਈਆਈਐਮ ਅਹਿਮਦਾਬਾਦ ਦੇ ਫੈਕਲਟੀ ਮੈਂਬਰ), ਡਾ. ਵਿਲੀਮਾ ਵਧਾਵਾ (ਏਐਸਈਆਰ ਸੈਂਟਰ ਦੇ ਡਾਇਰੈਕਟਰ) ਅਤੇ ਅਸ਼ੋਕ ਪਾਂਡੇ (ਆਹਲਕਨ ਗਰੁੱਪ ਆਫ਼ ਸਕੂਲਜ਼ ਦੇ ਡਾਇਰੈਕਟਰ) ਸ਼ਾਮਲ ਹੋਣਗੇ।