ਹਰਜੀਤ ਸਿੰਘ
ਜ਼ੀਰਕਪੁਰ, 28 ਜੁਲਾਈ
ਸ਼ਹਿਰ ਵਿੱਚ ਕੱਲ੍ਹ ਤੋਂ ਪੈ ਰਹੇ ਮੀਂਹ ਨੇ ਨਗਰ ਕੌਂਸਲ ਦੇ ਨਿਕਾਸੀ ਪ੍ਰਬੰਧਾਂ ਦੇ ਦਾਅਵਿਆਂ ਦੀ ਪੋਲ ਖੋਲ੍ਹ ਕੇ ਰੱਖ ਦਿੱਤੀ ਹੈ। ਸ਼ਹਿਰ ਵਿੱਚ ਥਾਂ ਥਾਂ ਪਾਣੀ ਭਰ ਗਿਆ। ਬਲਟਾਣਾ ਖੇਤਰ ਵਿੱਚ ਹਾਈਲੈਂਡ ਸੁਸਾਇਟੀ ਦੀ ਕੰਧ ਡਿੱਗ ਗਈ। ਇਸ ਦੌਰਾਨ ਸਭ ਤੋਂ ਮਾੜੀ ਹਾਲਤ ਢਕੋਲੀ ਖੇਤਰ ਵਿੱਚ ਪੈਦਾ ਹੋਈ। ਇਥੇ ਪੰਚਕੂਲਾ ਖੇਤਰ ਦਾ ਪਾਣੀ ਭਰ ਗਿਆ। ਸੜਕਾਂ ਨੇ ਛੱਪੜ ਦਾ ਰੂਪ ਧਾਰ ਲਿਆ ਹੈ।
ਗਾਜ਼ੀਪੁਰ ਖੇਤਰ ਵਿੱਚ ਦਰਜਨਾਂ ਸੁਸਾਇਟੀਆਂ ਦੇ ਰਾਹ ’ਤੇ ਪਾਣੀ ਭਰਨ ਕਰਨ ਲੋਕਾਂ ਦਾ ਮੁੱਖ ਸੜਕ ਨਾਲ ਸੰਪਰਕ ਟੁੱਟ ਗਿਆ। ਸ਼ਹਿਰ ਵਿੱਚੋਂ ਲੰਘ ਰਹੀ ਚੰਡੀਗੜ੍ਹ ਅੰਬਾਲਾ ਕੌਮੀ ਸ਼ਾਹਰਾਹ, ਜ਼ੀਰਕਪੁਰ ਪਟਿਆਲਾ ਰੋਡ ਅਤੇ ਪੰਚਕੂਲਾ ਰੋਡ ’ਤੇ ਪਾਣੀ ਭਰਨ ਕਾਰਨ ਜਾਮ ਲੱਗ ਗਿਆ। ਇਥੋਂ ਦੀ ਸਪੈਂਗਲ ਕੰਡੋਜ ਸੁਸਾਇਟੀ ਵਿੱਚ ਐਨੀ ਮਾੜੀ ਹਾਲਤ ਸੀ ਕਿ ਲੋਕਾਂ ਨੂੰ ਪਾਣੀ ਦਾ ਦਾਖਲਾ ਰੋਕਣ ਲਈ ਲੋਕਾਂ ਨੂੰ ਰੇਤ ਦੀ ਬੋਰੀਆਂ ਭਰ ਕੇ ਗੇਟ ਅੱਗੇ ਰੱਖਣੀਆਂ ਪਈਆਂ। ਸ਼ਹਿਰ ਵਿੱਚ ਸਥਿਤੀ ਖ਼ਰਾਬ ਹੁੰਦੀ ਵੇਖ ਹਲਕਾ ਇੰਚਾਰਜ ਦੀਪਇੰਦਰ ਸਿੰਘ ਢਿੱਲੋਂ ਨੇ ਨਗਰ ਕੌਂਸਲ ਦੀ ਟੀਮ ਨਾਲ ਦੌਰਾ ਕਰ ਕੇ ਅਧਿਕਾਰੀਆਂ ਨੂੰ ਛੇਤੀ ਪਾਣੀ ਕੱਢਣ ਦੀ ਹਦਾਇਤ ਕੀਤੀ। ਇਸ ਮੌਕੇ ਨਗਰ ਕੌਂਸਲ ਦੇ ਐਮਈ ਮੁਕੇਸ਼ ਰਾਏ ਨੇ ਕਿਹਾ ਕਿ ਕੌਂਸਲ ਦੀ ਟੀਮ ਲੰਘੀ ਰਾਤ ਤੋਂ ਹੀ ਪਾਣੀ ਦੀ ਨਿਕਾਸੀ ਦੇ ਪ੍ਰਬੰਧਾਂ ਦਾ ਜਾਇਜ਼ਾ ਲੈ ਰਹੀ ਸੀ। ਜਿਥੇ ਜਿਥੇ ਪਾਣੀ ਭਰਿਆ ਉਨ੍ਹਾਂ ਨੇ ਤੁਰੰਤ ਨਿਕਾਸੀ ਦੇ ਪ੍ਰਬੰਧ ਕੀਤੇ। ਗਾਜ਼ੀਪੁਰ ਖੇਤਰ ਵਿੱਚ ਪਾਈਪ ਨੂੰ ਤੋੜ ਕੇ ਪਾਣੀ ਦਾ ਨਿਕਾਸ ਕਰਵਾਇਆ ਗਿਆ।
ਡੇਰਾਬਸੀ (ਨਿੱਜੀ ਪੱਤਰ ਪ੍ਰੇਰਕ): ਭਰਵੇਂ ਮੀਂਹ ਕਾਰਨ ਸ਼ਹਿਰ ਵਿਚ ਥਾਂ-ਥਾਂ ਪਾਣੀ ਭਰ ਗਿਆ ਹੈ। ਸਭ ਤੋਂ ਮਾੜੀ ਹਾਲਤ ਸ਼ਹਿਰ ਦੇ ਮੇਨ ਬਾਜ਼ਾਰ ਦੀ ਹੈ ਜਿੱਥੇ ਪਾਣੀ ਦੁਕਾਨਾਂ ਵਿੱਚ ਵੜ ਗਿਆ। ਨਗਰ ਕੌਂਸਲ ਦੇ ਪ੍ਰਧਾਨ ਰਣਜੀਤ ਸਿੰਘ ਰੈਡੀ ਨੇ ਕਿਹਾ ਕਿ ਛੇਤੀ ਸਮੱਸਿਆ ਦਾ ਹੱਲ ਕਰ ਦਿੱਤਾ ਜਾਵੇਗਾ।