ਪੱਤਰ ਪ੍ਰੇਰਕ
ਅੰਮ੍ਰਿਤਸਰ, 3 ਜੁਲਾਈ
ਰੰਗ ਮੰਚ ਵਲੋਂ ਥੀਏਟਰ ਫੈਸਟੀਵਲ ਦੇ ਦੂਜੇ ਦਿਨ ਡਾ. ਸੁਰਜੀਤ ਪਾਤਰ ਦਾ ਲਿਖਿਆ ਅਤੇ ਕੇਵਲ ਧਾਲੀਵਾਲ ਵਲੋਂ ਨਿਰਦੇਸ਼ਿਤ ਪੰਜਾਬੀ ਨਾਟਕ ‘ਇਹ ਬਾਤ ਨਿਰੀ ਏਨੀ ਹੀ ਨਹੀਂ’ ਇਥੇ ਵਿਰਸਾ ਵਿਹਾਰ ਕੇਂਦਰ ਵਿਚ ਖੇਡਿਆ ਗਿਆ।
ਇਹ ਨਾਟਕ ਭਾਰਤ ਵਿਚ ਇਕ ਸਾਲ ਤੋਂ ਵੀ ਵੱਧ ਸਮੇਂ ਤਕ ਚੱਲੇ ਕਿਸਾਨੀ ਸੰਘਰਸ਼ ਦੀ ਦਾਸਤਾਨ ਨੂੰ ਬਿਆਨ ਕਰਦਾ ਹੈ। ਕਿਸਾਨਾਂ ਦੇ ਧੁੱਪ, ਮੀਂਹ ਅਤੇ ਠੰਢ ਦੇ ਦਿਨਾਂ ਨੂੰ ਆਪਣੇ ਤਨ ’ਤੇ ਹੰਢਾਉਣ ਤੇ ਮਜ਼ਬੂਤ ਇਰਾਦਿਆਂ ਨਾਲ ਸੰਘਰਸ਼ ਕਰਨ ਨੂੰ ਨਾਟਕ ਰਾਹੀਂ ਬਾਖ਼ੂਬੀ ਪੇਸ਼ ਕੀਤਾ ਗਿਆ। ਇਸ ਮੌਕੇ ਸੁਰਜੀਤ ਪਾਤਰ ਦੀਆਂ ਕਿਸਾਨੀ ਸੰਘਰਸ਼ ਬਾਰੇ ਲਿਖੀਆਂ ਕਵਿਤਾਵਾਂ ਨੂੰ ਰੰਗਕਰਮੀ ਗੁਰਤੇਜ ਮਾਨ, ਸਾਜਨ ਕੋਹਿਨੂਰ, ਰਾਜਿੰਦਰ ਬੁਲਟ ਅਤੇ ਗੁਰਦਿੱਤਪਾਲ ਸਿੰਘ ਨੇ ਪੇਸ਼ ਕੀਤਾ। ਹਰਿੰਦਰ ਸੋਹਲ ਦੇ ਸੰਗੀਤ ਅਤੇ ਹਰਪ੍ਰੀਤ ਸਿੰਘ ਦੀਆਂ ਸਲਾਇਡਾਂ ਨੇ ਨਾਟਕ ਨੂੰ ਨਵੀਂ ਰੰਗਤ ਦਿੱਤੀ। ਇਸ ਮੌਕੇ ਪਦਮਸ੍ਰੀ ਡਾ. ਸੁਰਜੀਤ ਪਾਤਰ, ਡਾ. ਨਿਰਮਲ ਜੌੜਾ ਤੇ ਡਾ. ਅਮਰਜੀਤ ਗਰੇਵਾਲ ਨਾਟਕ ਵੇਖਣ ਪੁੱਜੇ।