ਹੁਸ਼ਿਆਰ ਸਿੰਘ ਰਾਣੂ
ਮਾਲੇਰਕੋਟਲਾ, 19 ਜਨਵਰੀ
ਤਿੰਨ ਖੇਤੀ ਕਾਨੂੰਨਾਂ ਖ਼ਿਲਾਫ਼ ਕਿਸਾਨ ਜਥੇਬੰਦੀਆਂ ’ਤੇ ਆਧਾਰਿਤ ਬਣੇ ਸੰਯੁਕਤ ਕਿਸਾਨ ਮੋਰਚੇ ਦੀ ਅਗਵਾਈ ’ਚ ਦਿੱਲੀ ਦੀਆਂ ਬਰੂਹਾਂ ’ਤੇ ਸੰਘਰਸ਼ ਕਰ ਰਹੇ ਕਿਸਾਨਾਂ ਨਾਲ ਦਿੱਲੀ ਮੋਰਚੇ ’ਤੇ 26 ਨਵੰਬਰ ਤੋਂ ਪਿੰਡ ਲਸੋਈ ਦਾ ਨੌਜਵਾਨ ਸਪੋਰਟਸ ਕਲੱਬ ਡਟਿਆ ਹੋਇਆ ਹੈ। ਕਲੱਬ ਦੇ ਪ੍ਰਧਾਨ ਦਲਬੀਰ ਸਿੰਘ ਕਾਕਾ, ਸਾਬਕਾ ਸਰਪੰਚ ਗੁਰਚਰਨ ਸਿੰਘ ਪੱਪੀ ਅਤੇ ਸਾਬਕਾ ਚੇਅਰਮੈਨ ਸੁਖਵਿੰਦਰ ਸਿੰਘ ਨੇ ਦੱਸਿਆ ਕਿ ਕਲੱਬ ਦੇ ਅਹੁਦੇਦਾਰਾਂ ਅਤੇ ਮੈਂਬਰਾਂ ਵੱਲੋਂ ਸਿੰਘੂ ਸਰਹੱਦ ’ਤੇ ਜਿਥੇ ਬਦਲ ਬਦਲ ਕੇ ਸ਼ਮੂਲੀਅਤ ਕੀਤੀ ਜਾ ਰਹੀ ਹੈ। ਮੋਰਚੇ ਲਈ ਪਿੰਡ ’ਚੋਂ ਰਸਦ ਇਕੱਠੀਆਂ ਕਰਕੇ ਦਿੱਲੀ ਪਹੁੰਚਾਉਣ ਤੇ ਹੋਰ ਸੇਵਾਂ ’ਚ ਬਾਬਾ ਅਵਤਾਰ ਸਿੰਘ ਲਸੋਈ, ਜਸਪਾਲ ਸਿੰਘ ਪਾਲੀ, ਹਰਵੇਲ ਸਿੰਘ ਲਾਡੀ ,ਹਰਦੀਪ ਸਿੰਘ ਟਿਵਾਣਾ, ਸੁਰਿੰਦਰ ਸਿੰਘ ਡੁੱਗੀ, ਐਡਵੋਕੇਟ ਰਣਜੀਤ ਸਿੰਘ ਟਿਵਾਣਾ ਆਦਿ ਬਾਖ਼ੂਬੀ ਸੇਵਾਵਾਂ ਨਿਭਾ ਰਹੇ ਹਨ। ਉਧਰ, ਅੱਜ ਪਿੰਡ ਭੂਦਨ ਤੋਂ ਕਿਸਾਨਾਂ ਦਾ 12ਵਾਂ ਜਥਾ ਭਾਰਤੀ ਕਿਸਾਨ ਯੂਨੀਅਨ ਏਕਤਾ (ਉਗਰਾਹਾਂ) ਦੀ ਅਗਵਾਈ ਹੇਠ ਰਸਦ ਲੈ ਕੇ ਦਿੱਲੀ ਲਈ ਰਵਾਨਾ ਹੋਇਆ।