ਪਿਸ਼ਾਵਰ: ਪਾਕਿਸਤਾਨ ਦੇ ਗੜਬੜ ਵਾਲੇ ਸੂਬੇ ਖੈਬਰ ਪਖ਼ਤੂਨਖ਼ਵਾ ਵਿੱਚ ਤਹਿਰੀਕ-ਏ-ਤਾਲਿਬਾਨ ਪਾਕਿਸਤਾਨ (ਟੀਟੀਪੀ) ਨਾਲ ਸਬੰਧਤ ਅਤਿਵਾਦੀਆਂ ਵੱਲੋਂ ਬੱਸ ਨੂੰ ਅੱਗ ਲਾ ਦਿੱਤੀ ਗਈ ਅਤੇ ਯਾਤਰੀਆਂ ਨੂੰ ਤਸੀਹੇ ਦਿੱਤੇ ਗਏ। ਇਹ ਘਟਨਾ ਸ਼ਨਿੱਚਰਵਾਰ ਨੂੰ ਉਸ ਸਮੇਂ ਵਾਪਰੀ ਜਦੋਂ ਅਤਿਵਾਦੀਆਂ ਨੇ ਦਰਾਜ਼ਿੰਦਾ ਤੋਂ ਡੇਰਾ ਇਸਮਾਈਲ ਖਾਨ ਜਾ ਰਹੀ ਬੱਸ ਨੂੰ ਦਰਬਾਨ ਤਹਿਸੀਲ ਵਿੱਚ ਰੋਕ ਲਿਆ ਅਤੇ ਯਾਤਰੀਆਂ ਨੂੰ ਜਬਰੀ ਉਤਾਰਿਆ । ਇੱਕ ਸੀਨੀਅਰ ਪੁਲੀਸ ਅਧਿਕਾਰੀ ਨੇ ਕਿਹਾ, ‘‘ਘਟਨਾ ਦੌਰਾਨ ਟੀਟੀਪੀ ਅਤਿਵਾਦੀਆਂ ਨੇ ਯਾਤਰੀਆਂ ਨੂੰ ਉਤਾਰਨ ਮਗਰੋਂ ਬੱਸ ਨੂੰ ਅੱਗ ਲਾ ਦਿੱਤੀ। ਉਨ੍ਹਾਂ ਪਹਿਲਾਂ ਸਾਰੇ ਯਾਤਰੀਆਂ ਨੂੰ ਤਸੀਹੇ ਦਿੱਤੇ ਅਤੇ ਫਿਰ ਸਰਕਾਰ ਦਾ ਸਮਰਥਨ ਕਰਨ ਲਈ ਧਮਕੀ ਦਿੱਤੀ।’’ ਅਤਿਵਾਦੀ ਜਾਂਦੇ ਹੋਏ ਬੱਸ ਨੂੰ ਅੱਗ ਲਾ ਗਏ। ਘਟਨਾ ਸਥਾਨ ’ਤੇ ਭਾਰੀ ਪੁਲੀਸ ਬਲ ਤਾਇਨਾਤ ਕੀਤਾ ਗਿਆ ਹੈ। -ਪੀਟੀਆਈ