ਦੁਬਈ, 26 ਅਕਤੂਬਰ
ਇਰਾਨ ਦੇ ਗੈਸ ਸਟੇਸ਼ਨਾਂ ’ਤੇ ਸਾਈਬਰ ਹਮਲੇ ਹੋਣ ਦਾ ਸ਼ੱਕ ਜ਼ਾਹਿਰ ਕੀਤਾ ਗਿਆ ਹੈ ਜਿਸ ਕਾਰਨ ਤਲ ਦੀ ਵਿਕਰੀ ਸਬੰਧੀ ਸਾਰਾ ਸਰਕਾਰੀ ਤੰਤਰ ਅੱਜ ਠੱਪ ਹੋ ਗਿਆ ਤੇ ਵਿਕਰੀ ਰੁਕ ਗਈ। ਤਹਿਰਾਨ ਵਿਚ ਵਾਹਨਾਂ ਦੀਆਂ ਲੰਮੀਆਂ ਕਤਾਰਾਂ ਲੱਗ ਗਈਆਂ। ਤੇਲ ਮੰਤਰਾਲੇ ਦੇ ਅਧਿਕਾਰੀ ਇਸ ਸਮੱਸਿਆ ਬਾਰੇ ਹੰਗਾਮੀ ਮੀਟਿੰਗ ਕਰ ਰਹੇ ਹਨ। ਇਕ ਖ਼ਬਰ ਏਜੰਸੀ ਮੁਤਾਬਕ ਜਿਹੜੇ ਲੋਕ ਸਰਕਾਰ ਵੱਲੋਂ ਜਾਰੀ ਕਾਰਡ ਰਾਹੀਂ ਤੇਲ ਖ਼ਰੀਦਣ ਆਏ ਸਨ ਉਨ੍ਹਾਂ ਨੂੰ ‘ਸਾਈਬਰ ਅਟੈਕ 64411’ ਦੇ ਸੁਨੇਹੇ ਆਏ। ਇਰਾਨੀਆਂ ਨੂੰ ਸਰਕਾਰ ਨੇ ਕਾਰਡ ਜਾਰੀ ਕੀਤੇ ਹਨ ਜਿਸ ’ਤੇ ਸਬਸਿਡੀ ਮਿਲਦੀ ਹੈ। ਹਾਲੇ ਤੱਕ ਕਿਸੇ ਨੇ ਇਸ ‘ਸਾਈਬਰ ਹਮਲੇ’ ਦੀ ਜ਼ਿੰਮੇਵਾਰੀ ਨਹੀਂ ਲਈ ਹੈ। ਜ਼ਿਕਰਯੋਗ ਹੈ ਕਿ ਇਰਾਨ ਦੇ ਤਕਨੀਕੀ ਢਾਂਚਿਆਂ ਉਤੇ ਸਾਈਬਰ ਹਮਲੇ ਆਮ ਗੱਲ ਹਨ। ਮੁਲਕ ਨੇ ਆਪਣਾ ਜ਼ਿਆਦਾਤਰ ਸਰਕਾਰੀ ਤਕਨੀਕੀ ਢਾਂਚਾ ਇੰਟਰਨੈੱਟ ਨਾਲੋਂ ਕੱਟਿਆ ਹੋਇਆ ਹੈ। -ਏਪੀ