ਰਮੇਸ਼ ਭਾਰਦਵਾਜ
ਲਹਿਰਾਗਾਗਾ, 16 ਅਕਤੂਬਰ
ਇਥੇ ਅਨਾਜ ਮੰਡੀ ’ਚ ਸ੍ਰੀ ਰਾਮ ਲੀਲਾ ਵੈਲਫੇਅਰ ਸੁਸਾਇਟੀ ਵੱਲੋਂ ਬੀਤੀ ਰਾਵਣ ਦਹਿਣ ਮਗਰੋਂ ਪੰਜਾਬੀ ਗਾਇਕ ਲਵਲੀ ਨਿਰਮਾਣ ਨੂੰ ਸ੍ਰੀ ਰਾਹੁਲਇੰਦਰ ਸਿੰਘ ਸਿੱਧੂ ਭੁੱਠਲ ਵੱਲੋਂ ਸਨਮਾਨਿਤ ਕਰਨ ਸਮੇਂ ਅਚਾਨਕ ਸਟੇਜ ਡਿੱਗ ਗਈ, ਜਿਸ ਕਰਕੇ ਚਾਰੇ ਪਾਸੇ ਰੌਲਾ ਰੱਪਾ ਪੈ ਗਿਆ। ਇਸ ਹਾਦਸੇ ’ਚ ਕਰੀਬ ਦਰਜਨ ਆਗੂਆਂ ਦੇ ਮਾਮੂਲੀ ਸੱਟਾਂ ਲੱਗੀਆਂ ਅਤੇ ਇੱਕ ਨੂੰ ਸੁਨਾਮ ਦੇ ਨਿੱਜੀ ਹਸਪਤਾਲ ’ਚ ਭੇਜਣਾ ਪਿਆ। ਲੋਕ ਗਾਇਕ ਲਵਲੀ ਨਿਰਮਾਣ ਤੇ ਸਾਥੀਆਂ ਨੂੰ ਸੁਣਨ ਲਈ ਭਾਰੀ ਭੀੜ ਜੁੜ ਗਈ ਸੀ। ਰਾਵਣ ਦਹਿਣ ਮਗਰੋਂ ਗਾਇਕ ਦਾ ਸਨਮਾਨ ਰੱਖਿਆ ਸੀ ਅਤੇ ਮੁੱਖ ਮਹਿਮਾਨ ਰਾਹੁਲਇੰਦਰ ਸਿੱਧੂ ਪ੍ਰਬੰਧਕਾਂ ਨਾਲ ਸਟੇਜ ’ਤੇ ਚੜ੍ਹੇ ਤਾਂ ਸਟੇਜ ਟੁੱਟਣ ਕਰਕੇ ਸਭ ਡਿੱਗ ਗਏ। ਸੁਸਾਇਟੀ ਦੇ ਪ੍ਰਧਾਨ ਕਾਂਗਰਸੀ ਆਗੂ ਅਸ਼ਵਨੀ ਆਸ਼ੂ ਨੇ ਕਿਹਾ ਕਿ ਸਟੇਜ ’ਤੇ ਲਗਾਤਾਰ ਦੋ ਘੰਟੇ ਤੋਂ ਸਮਾਰੋਹ ਚਲ ਰਿਹਾ ਸੀ ਪਰ ਅਚਾਨਕ ਹਾਦਸਾ ਹੋਣ ਪਿੱਛੇ ਕਿਸੇ ਦੀ ਸਾਜ਼ਿਸ਼ ਲੱਗਦੀ ਹੈ ਜਿਸ ਲਈ ਉਹ ਸਾਰੇ ਸਮਾਰੋਹ ਦੀਆਂ ਵੀਡੀਓ ਦੇਖਕੇ ਸ਼ਰਾਰਤੀ ਅਨਸਰਾਂ ਖ਼ਿਲਾਫ਼ ਕਾਰਵਾਈ ਲਈ ਪੁਲੀਸ ਨੂੰ ਕਹਿਣਗੇ।