ਪੱਤਰ ਪ੍ਰੇਰਕ
ਲਹਿਰਾਗਾਗਾ, 6 ਅਗਸਤ
ਬਲਾਕ ਲਹਿਰਾਗਾਗਾ ਦੇ ਨੇੜਲੇ ਪਿੰਡ ਆਲਮਪੁਰ ’ਚ ਸ਼ਹੀਦ ਮਨਦੀਪ ਸਿੰਘ ਦੀ ਯਾਦ ’ਚ ਬਣੇ ਸਰਕਾਰੀ ਪ੍ਰਾਇਮਰੀ ਸਕੂਲ ਦੀ ਹਾਲਤ ਬੜੀ ਮਾੜੀ ਬਣੀ ਹੋਈ ਹੈ। ਸਕੂਲ ’ਚ 150 ਬੱਚੇ ਪੜ੍ਹਨ ਆਉਂਦੇ ਹਨ ਜਦੋਂ ਕਿ ਨਹਿਰ ਕੰਢੇ ਬਣੇ ਇਸ ਸਕੂਲ ’ਚ 300 ਤੋਂ ਵਧ ਬਾਂਦਰਾਂ ਕਾਰਨ ਅਧਿਆਪਕਾਂ, ਮਿੱਡ ਡੇਅ ਮੀਲ ਵਰਕਰਾਂ, ਵਿਦਿਆਰਥੀਆਂ ਅਤੇ ਮਾਪਿਆਂ ’ਚ ਦਹਿਸ਼ਤ ਦਾ ਮਾਹੌਲ ਹੈ। ਇਹ ਬਾਂਦਰ ਲੋਕਾਂ ਨੂੰ ਵੱਢ ਦਿੰਦੇ ਹਨ, ਟਿਫਨ ਚੁੱਕ ਕੇ ਭੱਜ ਜਾਂਦੇ ਹਨ, ਖਾਣਾ ਜਾਂ ਹੋਰ ਸਾਮਾਨ ਜਬਰੀ ਖੋਹ ਕੇ ਖਾ ਜਾਂਦੇ ਹਨ ਪਰ ਪ੍ਰਸ਼ਾਸਨ ਬੱਚਿਆਂ ਸਮੇਤ ਸਟਾਫ਼ ਤੇ ਮਾਪਿਆਂ ਦੀ ਸੁਰੱਖਿਆ ਕਰਨ ’ਚ ਨਾਕਾਮ ਸਾਬਤ ਹੋਇਆ ਹੈ। ਬੱਚਿਆਂ ਦੇ ਮਾਪੇ ਰੋਜ਼ਾਨਾ ਸੋਟੀਆਂ ਚੁੱਕ ਕੇ ਬੱਚਿਆਂ ਨੂੰ ਸਕੂਲ ਛੱਡਣ ਅਤੇ ਲਿਜਾਣ ਲਈ ਮਜਬੂਰ ਹਨ। ਬਾਂਦਰ ਹੁਣ ਤਕ ਪਿੰਡ ਵਾਸੀਆਂ ਤੋਂ ਲੈ ਕੇ 6 ਵਿਦਿਆਰਥੀਆਂ, 2 ਅਧਿਆਪਕਾਂ, ਦੋ ਮਿਡ ਡੇਅ ਮੀਲ ਵਰਕਰ ਤੇ ਅੱਧੀ ਦਰਜਨ ਮਾਪਿਆਂ ਨੂੰ ਜ਼ਖਮੀ ਕਰ ਚੁੱਕੇ ਹਨ। ਇਥੋਂ ਤਕ ਕਿ ਬੱਚਿਆਂ ਨੂੰ ਜਮਾਤਾਂ ਤੋਂ ਬਾਹਰ ਪਾਣੀ ਪੀਣ ਲਈ ਅਤੇ ਪਖਾਨਾ ਜਾਣ ਲਈ ਅਧਿਆਪਕਾਂ ਨੂੰ ਸੋਟੀਆਂ ਨਾਲ ਲੈਸ ਹੋ ਬਾਹਰ ਖੜ੍ਹਨਾ ਪੈਂਦਾ ਹੈ। ਇਹ ਬਾਂਦਰ ਪਿੰਡ ਵਾਸੀਆਂ ਦੇ ਘਰਾਂ ਵਿੱਚ ਵੀ ਵੜ ਜਾਂਦੇ ਹਨ ਅਤੇ ਸਾਮਾਨ ਇਧਰ-ਉਧਰ ਸੁੱਟ ਦਿੰਦੇ ਹਨ। ਲੋਕਾਂ ਨੇ ਲਹਿਰਾਗਾਗਾ ਦੇ ਐਸ.ਡੀ.ਐਮ ਕੋਲ ਆਪਣੀ ਆਵਾਜ਼ ਬੁਲੰਦ ਕੀਤੀ ਤਾਂ ਉਨ੍ਹਾਂ ਕਿਹਾ ਕਿ ਛੇਤੀ ਹੀ ਜੰਗਲਾਤ ਵਿਭਾਗ ਦੇ ਅਧਿਕਾਰੀਆਂ ਨਾਲ ਗੱਲ ਕਰਕੇ ਇਸ ਮਸਲੇ ਦਾ ਹੱਲ ਕਰਵਾਇਆ ਜਾਵੇਗਾ। ਮੁੱਖ ਅਧਿਆਪਕਾ ਗੀਤਾ ਦਾ ਕਹਿਣਾ ਹੈ ਕਿ ਬਾਂਦਰ ਇੰਨੇ ਜ਼ਿਆਦਾ ਹਨ ਕਿ ਕਿਸੇ ਵੇਲੇ ਵੀ ਇਨ੍ਹਾਂ ਦੇ ਹਮਲੇ ਦਾ ਖਤਰਾ ਬਣਿਆ ਰਹਿੰਦਾ ਹੈ।