ਹੁਸ਼ਿਆਰ ਸਿੰਘ ਰਾਣੂ
ਮਾਲੇਰਕੋਟਲਾ, 25 ਨਵੰਬਰ
ਪਿਛਲੇ ਦੋ-ਢਾਈ ਸਾਲਾਂ ਤੋਂ ਟੁੱਟੀ ਮਾਲੇਰਕੋਟਲਾ ਤੋਂ ਸਰੋਦ-ਦੌਦ-ਮਲੌਦ ਆਦਿ ਪਿੰਡਾਂ ਨੂੰ ਜਾਣ ਵਾਲੀ ਸੜਕ ਦੀ ਮੁਰੰਮਤ ਨੂੰ ਲੈ ਕੇ ਸਥਾਨਕ ਸਰੌਦ ਰੋਡ ਵਾਸੀਆਂ ਨੇ ਬਾਅਦ ਦੁਪਹਿਰ ਲੁਧਿਆਣਾ-ਸੰਗਰੂਰ ਮੁੱਖ ਮਾਰਗ ਸਥਿਤ ਸਰੌਦ ਟੀ-ਪੁਆਇੰਟ ‘ਤੇ ਧਰਨਾ ਦੇ ਕੇ ਆਵਾਜਾਈ ਠੱਪ ਕਰ ਦਿੱਤੀ। ਇਸ ਦੌਰਾਨ ਪੰਜਾਬ ਸਰਕਾਰ ਖ਼ਿਲਾਫ਼ ਨਾਅਰੇਬਾਜ਼ੀ ਕੀਤੀ ਗਈ। ਇਸ ਮੌਕੇ ਮੁਹੰਮਦ ਆਸਿਫ਼, ਮੁਹੰਮਦ ਬਿਲਾਲ, ਗਫੂਰ, ਅਤੇ ਮੁਹੰਮਦ ਦਿਲਸ਼ਾਦ ਨੇ ਕਿਹਾ ਕਿ ਕਰੀਬ ਢਾਈ ਸਾਲ ਪਹਿਲਾਂ ਜਦ ਸਥਾਨਕ ਜਰਗ ਚੌਕ ਵਿੱਚ ਪੁਲ ਦੇ ਨਿਰਮਾਣ ਦਾ ਕੰਮ ਚੱਲ ਰਿਹਾ ਸੀ ਤਾਂ ਲੁਧਿਆਣਾ ਜਾਣ-ਆਉਣ ਵਾਲੀ ਟਰੈਫਿਕ ਸਥਾਨਕ ਸਰੌਦ ਟੀ-ਪੁਆਇੰਟ ਤੋਂ ਵਾਇਆ ਮੰਡਿਆਲਾ-ਰਾਣਵਾਂ ਬਦਲਵੇਂ ਰਸਤੇ ਰਾਹੀਂ ਚਾਲੂ ਕੀਤੀ ਗਈ ਸੀ। ਉਸ ਸਮੇਂ ਤੋਂ ਹੀ ਇਹ ਸੜਕ ਟੁੱਟਣੀ ਸ਼ੁਰੂ ਹੋ ਗਈ ਸੀ। ਜ਼ਿਆਦਾ ਆਵਾਜਾਈ ਹੋਣ ਕਾਰਨ ਸੜਕ ‘ਤੇ ਟੋਏ ਪੈਣੇ ਸ਼ੁਰੂ ਹੋ ਗਏ ਸਨ। ਸਥਾਨਕ ਜਰਗ ਚੌਕ ਵਾਲਾ ਪੁਲ ਬਣਨ ਉਪਰੰਤ ਲੁzwnj;ਧਿਆਣਾ-ਸੰਗਰੂਰ ਲਈ ਪੁਲ ਉਪਰ ਦੀ ਸਿੱਧੀ ਆਵਾਜਾਈ ਚਾਲੂ ਕਰ ਦਿੱਤੀ ਗਈ ਪਰ ਟੁੱਟੀ ਸਰੌਦ ਰੋਡ ਦੀ ਕਿਸੇ ਨੇ ਸਾਰ ਨਹੀਂ ਲਈ। ਸੜਕ ‘ਤੇ ਪਏ ਟੋਇਆਂ ਕਾਰਨ ਜਿਥੇ ਹਾਦਸੇ ਵਾਪਰਦੇ ਰਹੇ ਉਥੇ ਟੋਇਆਂ ਵਿੱਚ ਆਲੇ -ਦੁਆਲੇ ਦੇ ਘਰਾਂ, ਸੀਵਰੇਜ ਅਤੇ ਮੀਂਹ ਦਾ ਪਾਣੀ ਵੀ ਖੜ੍ਹਦਾ ਰਿਹਾ ਹੈ। ਇਸ ਖੇਤਰ ਦੇ ਲੋਕਾਂ ਨੂੰ ਅੱਕ ਕੇ ਅੱਜ ਧਰਨਾ ਲਾਉਣਾ ਪਿਆ। ਲੋਕzwnj; ਨਿਰਮਾਣ ਵਿਭਾਗ ਦੇ ਜੇਈ ਬਲਪ੍ਰੀਤ ਸਿੰਘ ਵੱਲੋਂ ਕੱਲ੍ਹ ਤੋਂ ਇਸ ਸੜਕ ਦੀ ਮੁਰੰਮਤ ਦਾ ਕੰਮ ਸ਼ੁਰੂ ਕਰਵਾਉਣ ਦੇ ਭਰੋਸਾ ਦੇਣ ਦੇ ਬਾਵਜੂਦ ਖ਼ਬਰ ਲਿਖੇ ਜਾਣ ਤੱਕ ਧਰਨਾ ਜਾਰੀ ਸੀ।
ਸੜਕ ਦੀ ਮੁਰੰਮਤ ਦਾ ਕੰਮ ਇੱਕ ਦੋ ਦਿਨਾਂ ਵਿੱਚ ਸ਼ੁਰੂ ਹੋ ਰਿਹੈ : ਚੌਧਰੀ ਸਮਸ਼ੂ ਦੀਨ
ਉਧਰ ,ਆਮ ਆਦਮੀ ਪਾਰਟੀ ਦੇ ਆਗੂ ਚੌਧਰੀ ਸਮਸ਼ੂ ਦੀਨ ਨੇ ਕਿਹਾ ਕਿ ਸੜਕ ਦੀ ਮੁਰੰਮਤ ਲਈ ਵਰਕ ਆਰਡਰ ਜਾਰੀ ਹੋ ਚੁੱਕਿਆ ਹੈ। ਸਰੌਦ ਰੋਡ ਦੇ ਆਲੇ-ਦੁਆਲੇ ਮੁਹੱਲਿਆਂ ਵਿੱਚ ਪੀਣ ਵਾਲੇ ਪਾਣੀ ਅਤੇ ਸੀਵਰੇਜ ਦੇ ਪਾਈਪ ਜੋੜੇ ਜਾ ਰਹੇ ਹਨ।ਇੱਕ-ਦੋ ਦਿਨਾਂ ਵਿੱਚ ਸੜਕ ਦੀ ਮੁਰੰਮਤ ਦਾ ਕੰਮ ਸ਼ੁਰੂ ਹੋ ਰਿਹਾ ਹੈ।