ਚਰਨਜੀਤ ਭੁੱਲਰ
ਚੰਡੀਗੜ੍ਹ, 9 ਅਗਸਤ
ਪਾਰਲੀਮੈਂਟ ਦੇ ਮੌਨਸੂਨ ਸੈਸ਼ਨ ਵਿੱਚ ਐਤਕੀਂ ‘ਆਪ’ ਦੇ ਨਵੇਂ ਸੰਸਦ ਮੈਂਬਰਾਂ ਨੇ ਸੁਆਲਾਂ ਦੀ ਝੜੀ ਲਾਈ ਰੱਖੀ ਜਦੋਂਕਿ ਭਾਜਪਾ ਸੰਸਦ ਮੈਂਬਰ ਸੰਨੀ ਦਿਓਲ ਅਤੇ ਅਕਾਲੀ ਸੰਸਦ ਮੈਂਬਰ ਸੁਖਬੀਰ ਸਿੰਘ ਬਾਦਲ ਦੀ ਸਭ ਤੋਂ ਘੱਟ ਹਾਜ਼ਰੀ ਰਹੀ ਹੈ| ‘ਆਪ’ ਦੇ ਨਵੇਂ ਸੱਤ ਸੰਸਦ ਮੈਂਬਰਾਂ ਨੇ ਰਾਜ ਸਭਾ ਵਿੱਚ ਕੁੱਲ 138 ਸੁਆਲ ਪੁੱਛੇ ਹਨ, ਜਿਨ੍ਹਾਂ ਵਿੱਚੋਂ ਸੰਸਦ ਮੈਂਬਰ ਅਸ਼ੋਕ ਮਿੱਤਲ ਨੇ ਸਭ ਤੋਂ ਵੱਧ 43 ਸੁਆਲ ਪੁੱਛੇ ਤੇ ਰਾਘਵ ਚੱਢਾ ਨੇ 42 ਸੁਆਲ ਪੁੱਛੇ ਹਨ।
ਵੇਰਵਿਆਂ ਅਨੁਸਾਰ ਰਾਜ ਸਭਾ ਵਿੱਚ ਕੁੱਲ 18 ਬੈਠਕਾਂ ਹੋਈਆਂ। ਇਨ੍ਹਾਂ ਦੌਰਾਨ ਰਾਜ ਸਭਾ ਮੈਂਬਰ ਸੰਤ ਬਲਬੀਰ ਸਿੰਘ ਸੀਚੇਵਾਲ, ਵਿਕਰਮਜੀਤ ਸਿੰਘ ਸਾਹਨੀ, ਸੰਜੀਵ ਅਰੋੜਾ ਅਤੇ ਰਾਘਵ ਚੱਢਾ ਦੀ ਹਾਜ਼ਰੀ 14-14 ਦਿਨ ਦੀ ਰਹੀ ਹੈ ਜਦੋਂਕਿ ‘ਆਪ’ ਦੇ ਸੰਸਦ ਮੈਂਬਰਾਂ ਵਿੱਚੋਂ ਸਭ ਤੋਂ ਘੱਟ ਹਾਜ਼ਰੀ ਸੰਦੀਪ ਪਾਠਕ ਦੀ ਸੱਤ ਬੈਠਕਾਂ ਦੀ ਰਹੀ ਹੈ| ਸੰਸਦ ਮੈਂਬਰ ਹਰਭਜਨ ਸਿੰਘ ਦੀ ਅੱਠ ਬੈਠਕਾਂ ਵਿੱਚ ਹਾਜ਼ਰੀ ਰਹੀ ਹੈ|
ਲੋਕ ਸਭਾ ਵਿੱਚ ਕਾਂਗਰਸੀ ਸੰਸਦ ਮੈਂਬਰਾਂ ’ਚੋਂ ਸਭ ਤੋਂ ਵੱਧ ਹਾਜ਼ਰੀ ਮੁਨੀਸ਼ ਤਿਵਾੜੀ, ਸੰਤੋਖ ਚੌਧਰੀ, ਜਸਬੀਰ ਸਿੰਘ ਗਿੱਲ ਦੀ ਰਹੀ ਹੈ ਜੋ 15-15 ਬੈਠਕਾਂ ਵਿੱਚ ਹਾਜ਼ਰ ਰਹੇ ਹਨ| ਮੁਹੰਮਦ ਸਦੀਕ ਸਿਰਫ਼ ਨੌਂ ਬੈਠਕਾਂ ਵਿਚ ਹੀ ਹਾਜ਼ਰੀ ਭਰ ਸਕੇ ਹਨ ਜਦਕਿ ਸੰਸਦ ਮੈਂਬਰ ਅਮਰ ਸਿੰਘ ਦੀ ਹਾਜ਼ਰੀ ਨੌਂ ਦਿਨਾਂ ਦੀ ਰਹੀ ਹੈ| ਸ਼੍ਰੋਮਣੀ ਅਕਾਲੀ ਦਲ ਦੇ ਸੰਸਦ ਮੈਂਬਰ ਸੁਖਬੀਰ ਸਿੰਘ ਬਾਦਲ ਦੀ ਹਾਜ਼ਰੀ ਰਜਿਸਟਰ ਮੁਤਾਬਕ ਸਿਰਫ਼ ਦੋ ਬੈਠਕਾਂ ਵਿਚ ਹੀ ਰਹੀ ਹੈ। ਉਨ੍ਹਾਂ ਦੀ ਹੁਣ ਤੱਕ ਦੀ ਸੰਸਦ ਵਿੱਚ ਕੁੱਲ ਹਾਜ਼ਰੀ (ਸਾਰੇ ਸੈਸ਼ਨਾਂ) ਦੀ 21 ਫ਼ੀਸਦੀ ਹੀ ਰਹੀ ਹੈ| ਬਾਦਲ ਦੀ ਕਾਰਗੁਜ਼ਾਰੀ ਸੰਸਦ ਵਿਚ ਸੰਨੀ ਦਿਓਲ ਨਾਲੋਂ ਬਿਹਤਰ ਰਹੀ ਹੈ|
ਭਾਜਪਾ ਸੰਸਦ ਮੈਂਬਰ ਸਨੀ ਦਿਓਲ ਐਤਕੀਂ ਮੌਨਸੂਨ ਸੈਸ਼ਨ ’ਚੋਂ ਗ਼ੈਰਹਾਜ਼ਰ ਰਹੇ ਹਨ। ਉਨ੍ਹਾਂ ਦੀ ਸਾਰੇ ਸੈਸ਼ਨਾਂ ਦੀ ਹੁਣ ਤੱਕ ਦੀ ਹਾਜ਼ਰੀ ਵੀ 23 ਫ਼ੀਸਦੀ ਹੀ ਬਣਦੀ ਹੈ| ਅਕਾਲੀ ਸੰਸਦ ਮੈਂਬਰ ਸੁਖਬੀਰ ਸਿੰਘ ਬਾਦਲ ਨੇ ਐਤਕੀਂ ਕੋਈ ਸੁਆਲ ਨਹੀਂ ਪੁੱਛਿਆ ਹੈ| ਦੂਜੇ ਪਾਸੇ, ਹਰਸਿਮਰਤ ਕੌਰ ਬਾਦਲ ਦੀ ਹਾਜ਼ਰੀ 14 ਬੈਠਕਾਂ ਦੀ ਰਹੀ ਹੈ ਅਤੇ ਉਨ੍ਹਾਂ ਨੇ ਅੱਠ ਸੁਆਲ ਵੀ ਪੁੱਛੇ ਹਨ|
ਸੰਗਰੂਰ ਤੋਂ ਸੰਸਦ ਮੈਂਬਰ ਸਿਮਰਨਜੀਤ ਸਿੰਘ ਮਾਨ ਦੀ ਹਾਜ਼ਰੀ 14 ਬੈਠਕਾਂ ਦੀ ਰਹੀ ਹੈ ਜਦੋਂਕਿ ਉਹ ਸੁਆਲ ਪੁੱਛਣ ਵਿਚ ਪਛੜ ਗਏ ਹਨ| ਇਸੇ ਤਰ੍ਹਾਂ ਪਟਿਆਲਾ ਤੋਂ ਸੰਸਦ ਮੈਂਬਰ ਪ੍ਰਨੀਤ ਕੌਰ ਦੀ ਹਾਜ਼ਰੀ ਵੀ 14 ਬੈਠਕਾਂ ਦੀ ਰਹੀ ਹੈ| ‘ਆਪ’ ਦੇ ਸੰਸਦ ਮੈਂਬਰਾਂ ਨੇ ਸੁਆਲ ਪੁੱਛਣ ਵਿਚ ਝੰਡੀ ਲੈ ਲਈ ਹੈ| ਸੰਜੀਵ ਅਰੋੜਾ ਨੇ 25 ਸੁਆਲ ਪੁੱਛੇ ਹਨ ਜਿਨ੍ਹਾਂ ’ਚੋਂ ਜ਼ਿਆਦਾ ਸੁਆਲ ਖੇਤੀ, ਸਨਅਤ ਅਤੇ ਫੂਡ ਪ੍ਰਾਸੈਸਿੰਗ ਨਾਲ ਸਬੰਧਿਤ ਸਨ| ਰਾਘਵ ਚੱਢਾ ਨੇ ਨਰਮਾ, ਏਅਰਪੋਰਟ, ਰੇਲਵੇ, ਨਸ਼ਿਆਂ, ਖ਼ੁਦਕੁਸ਼ੀਆਂ ਅਤੇ ਬਿਜਲੀ ਬਾਰੇ ਸੁਆਲ ਪੁੱਛੇ ਹਨ| ‘ਆਪ’ ਸੰਸਦ ਮੈਂਬਰ ਹਰਭਜਨ ਸਿੰਘ ਨੇ ਖੇਡਾਂ ਬਾਰੇ, ਧਰਤੀ ਹੇਠਲੇ ਪਾਣੀ ਅਤੇ ਐੱਮਐੱਸਪੀ ਬਾਰੇ ਸੁਆਲ ਪੁੱਛੇ ਹਨ|
ਕਾਂਗਰਸੀ ਐਮ.ਪੀ ਮੁਨੀਸ਼ ਤਿਵਾੜੀ ਨੇ ਸੈਸ਼ਨ ਦੌਰਾਨ ਸਿੱਖਿਆ ਅਤੇ ਵਪਾਰ ਆਦਿ ਨਾਲ ਸਬੰਧਿਤ ਪੰਜ ਸੁਆਲ ਪੁੱਛੇ ਜਦੋਂਕਿ ਰਵਨੀਤ ਬਿੱਟੂ ਨੇ 26 ਸੁਆਲ ਪੁੱਛੇ ਹਨ| ਦੱਸਣਯੋਗ ਹੈ ਕਿ ਮੌਨਸੂਨ ਸੈਸ਼ਨ 18 ਜੁਲਾਈ ਨੂੰ ਸ਼ੁਰੂ ਹੋਇਆ ਸੀ ਅਤੇ 12 ਅਗਸਤ ਨੂੰ ਸਮਾਪਤ ਹੋਣਾ ਸੀ ਪਰ 8 ਅਗਸਤ ਨੂੰ ਹੀ ਖ਼ਤਮ ਹੋ ਗਿਆ ਹੈ।
ਇਸ ਤੋਂ ਇਲਾਵਾ ਚੰਡੀਗੜ੍ਹ ਤੋਂ ਸੰਸਦ ਮੈਂਬਰ ਕਿਰਨ ਖੇਰ ਦੀ ਹਾਜ਼ਰੀ ਵੀ ਸਿਰਫ਼ 10 ਬੈਠਕਾਂ ਦੀ ਰਹੀ ਹੈ ਜਦੋਂਕਿ ਹੇਮਾ ਮਾਲਿਨੀ ਦੀ ਹਾਜ਼ਰੀ ਸਿਰਫ਼ ਸੱਤ ਬੈਠਕਾਂ ਦੀ ਰਹੀ ਹੈ| ਗੁਰਦਾਸਪੁਰ ਤੋਂ ਸੰਸਦ ਮੈਂਬਰ ਸਨੀ ਦਿਓਲ ਤਾਂ ਆਪਣੇ ਹਲਕੇ ਗੁਰਦਾਸਪੁਰ ਤੋਂ ਵੀ ਕਾਫ਼ੀ ਅਰਸੇ ਤੋਂ ਗਾਇਬ ਹਨ|
ਸੀਚੇਵਾਲ ਨੂੰ ਮਿਲੀ ਸ਼ਲਾਘਾ
‘ਆਪ’ ਸੰਸਦ ਮੈਂਬਰ ਸੰਤ ਬਲਵੀਰ ਸਿੰਘ ਸੀਚੇਵਾਲ ਨੇ ਰਾਜ ਸਭਾ ਵਿੱਚ ਵੀ ਸ਼ਲਾਘਾ ਖੱਟੀ ਹੈ| ਉਨ੍ਹਾਂ ਨੇ ਸੈਸ਼ਨ ਦੌਰਾਨ ਲਿਖਤੀ ਸਮੱਗਰੀ ਪੰਜਾਬੀ ਭਾਸ਼ਾ ਵਿੱਚ ਮੁਹੱਈਆ ਕਰਾਏ ਜਾਣ ਦੀ ਮੰਗ ਵੀ ਉੱਠਾਈ| ਸੀਚੇਵਾਲ ਦੀ ਹਾਜ਼ਰੀ ਵੀ 14 ਬੈਠਕਾਂ ਦੀ ਰਹੀ ਹੈ| ਉਨ੍ਹਾਂ ਨੇ ਸੰਸਦ ਵਿੱਚ ਪਾਣੀਆਂ ਦਾ ਮੁੱਦਾ ਉਠਾਇਆ ਹੈ|