ਚਰਨਜੀਤ ਭੁੱਲਰ
ਚੰਡੀਗੜ੍ਹ, 28 ਜੂਨ
ਮੁੱਖ ਅੰਸ਼
- ‘ਆਪ’ ਅਤੇ ਕਾਂਗਰਸ ਨੇ ਹੱਥ ਮਿਲਾਏ, ਭਾਜਪਾ ਵੱਲੋਂ ਵਿਰੋਧ
ਪੰਜਾਬ ਵਿਧਾਨ ਸਭਾ ਦੇ ਸਿਫ਼ਰ ਕਾਲ ਦੌਰਾਨ ਅੱਜ ਕੇਂਦਰ ਸਰਕਾਰ ਦੀ ਅਗਨੀਪਥ ਯੋਜਨਾ ਖ਼ਿਲਾਫ਼ ਗੂੰਜ ਪਈ। ਸੱਤਾਧਾਰੀ ਅਤੇ ਵਿਰੋਧੀ ਧਿਰ ਅਗਨੀਪਥ ਖ਼ਿਲਾਫ਼ ਡਟੀਆਂ, ਜਦੋਂ ਕਿ ਭਾਜਪਾ ਵਿਧਾਇਕ ਨੇ ਇਸ ਯੋਜਨਾ ਦੀ ਹਮਾਇਤ ਕੀਤੀ। ਵਿਰੋੋਧੀ ਧਿਰ ਦੇ ਨੇਤਾ ਪ੍ਰਤਾਪ ਸਿੰਘ ਬਾਜਵਾ ਨੇ ਅਗਨੀਪਥ ਖ਼ਿਲਾਫ਼ ਇੱਕ ਸਾਂਝਾ ਮਤਾ ਲਿਆਉਣ ਦੀ ਮੰਗ ਕੀਤੀ ਕਿਉਂਕਿ ਇਹ ਯੋਜਨਾ ਪੁਰਾਣੇ ਫੌਜੀ ਰਜਮੈਂਟ ਢਾਂਚੇ ਨੂੰ ਢਾਹ ਲਾਉਣ ਵਾਲੀ ਹੈ। ਉਨ੍ਹਾਂ ਕਿਹਾ ਕਿ ਅੰਗਰੇਜ਼ਾਂ ਵੇਲੇ ਵੀ ਪੰਜਾਬ ਵਿੱਚੋਂ 20 ਫੀਸਦੀ ਭਰਤੀ ਹੁੰਦੀ ਸੀ, ਜੋ ਹੁਣ ਘਟ ਕੇ 7.8 ਫੀਸਦੀ ’ਤੇ ਆ ਗਈ ਹੈ। ਮੁੱਖ ਮੰਤਰੀ ਭਗਵੰਤ ਮਾਨ ਨੇ ਇਸ ਮੁੱਦੇ ’ਤੇ ਸਹਿਮਤੀ ਜ਼ਾਹਿਰ ਕਰਦਿਆਂ ਐਲਾਨ ਕੀਤਾ ਕਿ ਇਸ ਬਾਰੇ ਵਿਧਾਨ ਸਭਾ ਵਿੱਚ ਮਤਾ ਲਿਆਂਦਾ ਜਾਵੇਗਾ। ਉਨ੍ਹਾਂ ਕਿਹਾ ਕਿ ਇਹ ਭਾਵੁਕ ਮੁੱਦਾ ਹੈ, ਜੋ ਨੌਜਵਾਨਾਂ ਖ਼ਿਲਾਫ਼ ਭੁਗਤਦਾ ਹੈ। ਮਾਨ ਨੇ ਕਿਹਾ ਕਿ ਕੇਂਦਰ ਹਮੇਸ਼ਾ ਕੋਈ ਨਾ ਕੋਈ ਮੁੱਦਾ ਖੜ੍ਹਾ ਕਰਦਾ ਹੈ ਅਤੇ ਮਗਰੋਂ ਆਖਦਾ ਹੈ ਕਿ ‘ਤੁਹਾਨੂੰ ਸਮਝ ਨਹੀਂ ਆਈ।’ ਭਾਵੇਂ ਜੀਐੱਸਟੀ ਹੋਵੇ, ਨੋਟਬੰਦੀ ਅਤੇ ਬੇਸ਼ੱਕ ਖੇਤੀ ਕਾਨੂੰਨ ਹੋਣ।
ਜਦੋਂ ਅਗਨੀਪਥ ਖ਼ਿਲਾਫ਼ ਕਾਂਗਰਸ ਅਤੇ ‘ਆਪ’ ਨੇ ਹੱਥ ਮਿਲਾਏ ਤਾਂ ਭਾਜਪਾ ਵਿਧਾਇਕ ਅਸ਼ਵਨੀ ਕੁਮਾਰ ਨੇ ਇਤਰਾਜ਼ ਕੀਤਾ ਤੇ ਅਗਨੀਪਥ ਦੇ ਫਾਇਦੇ ਗਿਣਾਏ। ਉਨ੍ਹਾਂ ਕਿਹਾ ਕਿ ਜੇਕਰ ਇਹ ਸਕੀਮ ਚੱਲ ਗਈ ਤਾਂ ਫਿਰ 2029 ਦੀ ਚੋਣ ਵੀ ਵਿਰੋਧੀਆਂ ਹੱਥੋਂ ਜਾਵੇਗੀ। ਜੁਆਬੀ ਹਮਲੇ ਵਿੱਚ ਪ੍ਰਤਾਪ ਸਿੰਘ ਬਾਜਵਾ ਨੇ ਕਿਹਾ ਕਿ ਅਗਨੀਪਥ ਅਸਲ ਵਿੱਚ ਇੱਕ ਸੋਚੀ-ਸਮਝੀ ਸਾਜਿਸ਼ ਹੈ। ਉਨ੍ਹਾਂ ਕਿਹਾ ਕਿ ਜਦੋਂ ਚਾਰ ਵਰ੍ਹਿਆਂ ਮਗਰੋਂ ਅਗਨੀਵੀਰ ਰਿਟਾਇਰ ਹੋਣਗੇ ਤਾਂ ਉਨ੍ਹਾਂ ਨੂੰ ਗਲਤ ਅਨਸਰ ਆਪਣੇ ਮੁਫਾਦਾਂ ਲਈ ਵਰਤ ਸਕਦੇ ਹਨ।
‘ਆਪ’ ਵਿਧਾਇਕ ਜਸਵਿੰਦਰ ਸਿੰਘ ਰਾਮਦਾਸ ਨੇ ਸਰਹੱਦੀ ਕਿਸਾਨਾਂ ਨੂੰ ਕੰਡਿਆਲੀ ਤਾਰ ਤੋਂ ਪਾਰ ਖੇਤੀਬਾੜੀ ਵਿੱਚ ਆਉਂਦੀਆਂ ਮੁਸ਼ਕਲਾਂ ਬਾਰੇ ਆਵਾਜ਼ ਉਠਾਈ। ਉਨ੍ਹਾਂ ਕਿਹਾ ਕਿ ਖੰਨਾ ਤੋਂ ਵਿਧਾਇਕ ਤਰੁਨਪ੍ਰੀਤ ਸਿੰਘ ਨੇ ਭਗਤ ਪੂਰਨ ਸਿੰਘ ਦੇ ਨਾਮ ’ਤੇ ਸ਼ਹਿਰ ਵਿੱਚ ਹਸਪਤਾਲ ਬਣਾਉਣ ਤੇ ਮੰਡੀ ਨੂੰ ਆਧੁਨਿਕ ਬਣਾਉਣ ਦੀ ਗੱਲ ਰੱਖੀ।
ਕਾਂਗਰਸੀ ਵਿਧਾਇਕ ਵਿਕਰਮਜੀਤ ਸਿੰਘ ਚੌਧਰੀ ਨੇ ਫਿਲੌਰ ਹਲਕੇ ਨੂੰ ਮਿਲੀਆਂ ਦੋ ਅੱਗ ਬੁਝਾਊ ਗੱਡੀਆਂ ਦਾ ਮਸਲਾ ਉਠਾਇਆ। ਵਿਧਾਇਕ ਅਮੋਲਕ ਸਿੰਘ ਜੈਤੋ ਨੇ ਸਬ ਡਿਵੀਜ਼ਨ ਵਿੱਚ ਹਸਪਤਾਲ ਦੀ ਮੰਗ ਰੱਖੀ, ਜਦੋਂ ਕਿ ਡਾ. ਸੁਖਵਿੰਦਰ ਸੁੱਖੀ ਅਤੇ ਬਾਵਾ ਹੈਨਰੀ ਨੇ ਪੁਲੀਸ ਭਰਤੀ ਦਾ ਮਸਲਾ ਚੁੱਕਿਆ। ਭਾਜਪਾ ਵਿਧਾਇਕ ਅਸ਼ਵਨੀ ਕੁਮਾਰ ਨੇ ਕਿਹਾ ਕਿ ਨਾਜਾਇਜ਼ ਕਬਜ਼ੇ ਹਟਾਉਣਾ ਚੰਗਾ ਕਦਮ ਹੈ ਪਰ ਸਰਕਾਰ ਭੂਮੀਹੀਣ ਲੋਕਾਂ ਦੇ ਹਿੱਤਾਂ ਬਾਰੇ ਵੀ ਸੋਚੇੇ। ਵਿਧਾਇਕ ਮਨਜੀਤ ਬਿਲਾਸਪੁਰ ਨੇ ਕਾਂਗਰਸ ਸਰਕਾਰ ਸਮੇਂ ਵਿਰੋਧੀ ਵਿਧਾਇਕਾਂ ਨਾਲ ਹੁੰਦੇ ਵਿਤਕਰੇ ਦੀ ਗੱਲ ਰੱਖੀ। ਵਿਧਾਇਕਾ ਅਰੁਣਾ ਚੌੌਧਰੀ ਨੇ ਸਿਆਸੀ ਬਦਲਾਖੋਰੀ ਹੋਣ ਦਾ ਮੁੱਦਾ ਉਠਾਇਆ, ਜਦੋਂ ਕਿ ਵਿਧਾਇਕ ਸੁਖਜਿੰਦਰ ਸਿੰਘ ਰੰਧਾਵਾ ਨੇ ਵੇਰਕਾ ਦੀ ਮਜ਼ਬੂਤੀ ਦਾ ਮਸਲਾ ਰੱਖਿਆ।
ਮੂਸੇਵਾਲਾ ਦਾ ਗੀਤ ਹਟਾਉਣ ਦਾ ਵਿਰੋਧ
ਕਾਂਗਰਸੀ ਵਿਧਾਇਕ ਸੁਖਪਾਲ ਸਿੰਘ ਖਹਿਰਾ ਨੇ ਅੱਜ ਸਿਫ਼ਰ ਕਾਲ ਵਿੱਚ ਮਰਹੂਮ ਗਾਇਕ ਸਿੱਧੂ ਮੂਸੇਵਾਲਾ ਦਾ ਗੀਤ ‘ਐੱਸਵਾਈਐੱਲ’ ਯੂ-ਟਿਊਬ ਤੋਂ ਹਟਾਏ ਜਾਣ ਖ਼ਿਲਾਫ਼ ਆਵਾਜ਼ ਉਠਾਈ। ਉਨ੍ਹਾਂ ‘ਟਰੈਕਟਰ ਟੂ ਟਵਿੱਟਰ’ ਖਾਤੇ ਨੂੰ ਬੰਦ ਕੀਤੇ ਜਾਣ ਦੀ ਗੱਲ ਵੀ ਰੱਖੀ। ਉਨ੍ਹਾਂ ਮੰਗ ਕੀਤੀ ਕਿ ਇਸ ਖ਼ਿਲਾਫ਼ ਵੀ ਮਤਾ ਲਿਆਂਦਾ ਜਾਵੇ। ਮੁੱਖ ਮੰਤਰੀ ਭਗਵੰਤ ਮਾਨ ਨੇ ਜੁਆਬ ਵਿੱਚ ਕਿਹਾ ਕਿ ਉਹ ਹਰ ਉਸ ਕਦਮ ਦੇ ਖ਼ਿਲਾਫ਼ ਹਨ, ਜਿਸ ਨਾਲ ਜ਼ੁਬਾਨਬੰਦੀ ਹੁੰਦੀ ਹੋਵੇ।
ਪ੍ਰੋਟੋਕੋਲ ਕਮੇਟੀ ’ਤੇ ਹਾਕਮ ਧਿਰ ਅਸਹਿਮਤ
ਵਿਰੋਧੀ ਧਿਰ ਦੇ ਨੇਤਾ ਪ੍ਰਤਾਪ ਬਾਜਵਾ ਵੱਲੋਂ ਨੌਕਰਸ਼ਾਹੀ ਦੀ ਜੁਆਬਦੇਹੀ ਬਣਾਉਣ ਲਈ ਪ੍ਰੋਟੋਕੋਲ ਕਮੇਟੀ ਬਣਾਉਣ ਦਾ ਸੁਝਾਅ ਦਿੱਤਾ, ਜਿਸ ਨੂੰ ਹਾਕਮ ਧਿਰ ਤਰਫ਼ੋਂ ਸਮਰਥਨ ਨਾ ਮਿਲ ਸਕਿਆ। ਬਾਜਵਾ ਨੇ ਕਿਹਾ ਕਿ ਅਫ਼ਸਰਸ਼ਾਹੀ ਕਿਸੇ ਵਿਧਾਇਕ ਦਾ ਫੋਨ ਨਹੀਂ ਚੁੱਕਦੀ ਅਤੇ ਚਿੱਠੀਆਂ ਦਾ ਜੁਆਬ ਤੱਕ ਨਹੀਂ ਦਿੰਦੀ। ਪੰਚਾਇਤ ਮੰਤਰੀ ਕੁਲਦੀਪ ਧਾਲੀਵਾਲ ਨੇ ਕਿਹਾ ਕਿ ਹਾਕਮ ਧਿਰ ਦੇ ਵਿਧਾਇਕਾਂ ਨੂੰ ਅਜਿਹੀ ਕੋਈ ਦਿੱਕਤ ਨਹੀਂ ਹੈ।
ਬੁੱਢੇ ਨਾਲੇ ’ਤੇ ਕਮੇਟੀ ਬਣਾਉਣ ਦੇ ਇੱਛੁਕ ਨੇ ਸਪੀਕਰ
ਸਦਨ ਵਿੱਚ ਪਾਣੀਆਂ ਦੇ ਮਾਮਲੇ ’ਤੇ ਵੀ ਚਰਚਾ ਹੋਈ। ਸਪੀਕਰ ਕੁਲਤਾਰ ਸਿੰਘ ਸੰਧਵਾਂ ਨੇ ਬੁੱਢਾ ਨਾਲੇ ਦੇ ਮਾਮਲੇ ’ਤੇ ਵਿਧਾਨ ਸਭਾ ਦੀ ਕਮੇਟੀ ਦਾ ਗਠਨ ਕਰਨ ਦੀ ਇੱਛਾ ਜ਼ਾਹਿਰ ਕੀਤੀ, ਜਿਸ ਵਾਸਤੇ ਸਦਨ ਨੇ ਸਹਿਮਤੀ ਦਿੱਤੀ। ਵਿਧਾਇਕ ਕੁਲਵੰਤ ਸਿੱਧੂ ਨੇ ਪਾਣੀਆਂ ਦੇ ਬਚਾਅ ਲਈ ਸਾਰੇ ਵਿਧਾਇਕਾਂ ਤੋਂ ਸਹਿਮਤੀ ਲਈ ਹੱਥ ਖੜ੍ਹੇ ਕਰਵਾਏ, ਜਦਕਿ ਮੁਕਤਸਰ ਦੇ ਵਿਧਾਇਕ ਜਗਦੀਪ ਸਿੰਘ ਕਾਕਾ ਨੇ ਕਿਹਾ ਕਿ ਦਰਿਆਵਾਂ ਦਾ ਜ਼ਹਿਰੀਲਾ ਪਾਣੀ ਜਲ ਘਰਾਂ ਨੂੰ ਸਪਲਾਈ ਹੋ ਰਿਹਾ ਹੈ, ਜੋ ਬਿਮਾਰੀਆਂ ਦਾ ਕਾਰਨ ਬਣਦਾ ਹੈ। ਨਕੋਦਰ ਤੋਂ ਵਿਧਾਇਕਾ ਇੰਦਰਜੀਤ ਕੌਰ ਮਾਨ ਨੇ ਕਿਹਾ ਕਿ ਬੋਤਲਬੰਦ ਪਾਣੀ ਲਈ ਧਰਤੀ ਵਾਲਾ ਪਾਣੀ ਕੱਢਿਆ ਜਾ ਰਿਹਾ ਹੈ।
ਜਾਖੜ ਨੇ ਬਾਗਬਾਨਾਂ ਦਾ ਮੁੱਦਾ ਚੁੱਕਿਆ
ਕਾਂਗਰਸੀ ਵਿਧਾਇਕ ਸੰਦੀਪ ਜਾਖੜ ਨੇ ਤਿੰਨ ਵਰ੍ਹਿਆਂ ਤੋਂ ਅਬੋਹਰ ਇਲਾਕੇ ਵਿੱਚ ਕਿੰਨੂਆਂ ਦੇ ਹੋ ਰਹੇ ਖ਼ਰਾਬੇ ਦਾ ਮੁੱਦਾ ਚੁੱਕਿਆ ਅਤੇ ਇਸ ਬਾਰੇ ਪ੍ਰਤੀ ਏਕੜ ਇੱਕ ਲੱਖ ਰੁਪਏ ਦਾ ਮੁਆਵਜ਼ਾ ਮੰਗਿਆ। ਉਨ੍ਹਾਂ ਕਿਹਾ ਕਿ ਪਹਿਲਾਂ ਕੋਵਿਡ, ਫਿਰ ਕੋਹਰਾ ਅਤੇ ਹੁਣ ਤਾਪਮਾਨ ਨੇ ਬਾਗਬਾਨੀ ਦਾ ਨੁਕਸਾਨ ਕੀਤਾ ਹੈ। ਬਾਗਵਾਨ ਹੁਣ ਬਾਗ ਪੁੱਟਣ ਲਈ ਮਜਬੂਰ ਹੋ ਗਏ ਹਨ। ਉਨ੍ਹਾਂ ਕਿਹਾ ਕਿ ਸਰਹਿੰਦ ਨਹਿਰ ਦਾ ਪਾੜ ਭਰਨ ਨੂੰ 22 ਦਿਨ ਲੱਗ ਗਏ। ਜਾਖੜ ਨੇ ਮੁੱਖ ਮੰਤਰੀ ਤੇ ਵਿੱਤ ਮੰਤਰੀ ਨੂੰ ਟੇਲਾਂ ’ਤੇ ਆਉਣ ਦਾ ਸੱਦਾ ਦਿੱਤਾ।