ਖੇਤਰੀ ਪ੍ਰਤੀਨਿਧ
ਪਟਿਆਲਾ, 18 ਸਤੰਬਰ
ਇੱਕ ਦਰਜਨ ਵਿਭਾਗਾਂ ਨਾਲ ਸਬੰਧਿਤ ਹਜ਼ਾਰਾਂ ਕੱਚੇ ਮੁਲਾਜ਼ਮਾਂ ’ਤੇ ਆਧਾਰਿਤ ‘ ਠੇਕਾ ਮੁਲਾਜ਼ਮ ਸੰਘਰਸ਼ ਮੋਰਚਾ ਪੰਜਾਬ’ ਦੇ ਬੈਨਰ ਹੇਠਾਂ ਇਥੇ ਠੀਕਰੀ ਵਾਲਾ ਚੌਕ ਵਿੱਚ ਕੱਚੇ ਮੁਲਾਜਮਾ ਦਾ ਪੱਕਾ ਮੋਰਚਾ ਬਾਰ੍ਹਵੇਂ ਦਿਨ ਵੀ ਜਾਰੀ ਰਿਹਾ। ਇਨ੍ਹਾਂ ਮੁਲਾਜ਼ਮਾਂ ਦਾ ਭਾਵੇਂ ਕਿ ਅੱਜ ਕੈਪਟਨ ਅਮਰਿੰਦਰ ਸਿੰਘ ਦੀ ਰਿਹਾਇਸ਼ ਮੋਤੀ ਮਹਿਲ ਤੱਕ ਮਾਰਚ ਕਰਨ ਦਾ ਪ੍ਰੋਗਰਾਮ ਸੀ। ਪਰ ਉਨ੍ਹਾਂ ਵੱਲੋਂ ਮੁੱਖ ਮੰਤਰੀ ਪਦ ਤੋਂ ਅਸਤੀਫ਼ਾ ਦੇਣ ਕਰਕੇ ਮੁਲਾਜਮਾ ਨੇ ਅਜਿਹਾ ਪ੍ਰੋਗਰਾਮ ਰੱਦ ਕਰ ਦਿੱਤਾ। ਉਂਜ ਇਨ੍ਹਾਂ ਮੁਲਾਜਮਾ ਨੇ ਜਿਥੇ ਦੇਰ ਸ਼ਾਮੀ ਸ਼ਹਿਰ ’ਚ ਦੋ ਘੰਟੇ ਜਾਗੋ ਕੱਢਦਿਆਂ, ਪੰਜਾਬ ਸਰਕਾਰ ਦਾ ਚੰਗਾ ਜਲੂਸ ਕੱਢਿਆ, ਉਥੇ ਹੀ ਇੱਕ ਦਿਨ ਪਹਿਲਾਂ ਹੀ ਹੋਈ ਕੈਬਨਿਟ ਮੀਟਿੰਗ ’ਚ ਕੱਚੇ ਮੁਲਾਜਮਾ ਸਬੰਧੀ ਕੋਈ ਠੋਸ ਫੈਸਲਾ ਨਾ ਲੈ ਸਕਣ ਕਰਕੇ ਇਥੇ ਫੁਹਾਰਾ ਚੌਕ ’ਤੇ ਸਰਕਾਰ ਦੇ ਖ਼ਿਲਾਫ਼ ਅਰਥੀ ਫੂਕ ਮੁਜ਼ਾਹਰਾ ਵੀ ਕੀਤਾ।
ਇਸ ਮੌਕੇ ਜਗਰੂਪ ਲਹਿਰਾ, ਗੁਰਵਿੰਦਰ ਪੰਨੂੰ,ਸ਼ੇਰ ਸਿੰਘ ਖੰਨਾ, ਵਰਿੰਦਰ ਮੋਮੀ, ਜਗਸੀਰ ਸਿੰਘ ਭੰਗੂ, ਅਮਰੀਕ ਮਹਿਰਾਜ ਅਤੇ ਕੁਲਦੀਪ ਬੁੱਢੇਵਾਲ ਸਮੇਤ ਕਈ ਹੋਰ ਸੂਬਾਈ ਆਗੂਆ ਨੇ ਵੀ ਸੰਬੋਧਨ ਕੀਤਾ। ਜਿਸ ਦੌਰਾਨ ਸਰਕਾਰ ‘ਤੇ ਕੱਚੇ ਮੁਲਾਜ਼ਮਾਂ ਦਾ ਸੋਸ਼ਣ ਕਰਨ ਦੇ ਦੋਸ਼ ਲਾਏ। ਮੋਰਚੇ ਦੇ ਬੁਲਾਰੇ ਜਗਸੀਰ ਭੰਗੂ ਦਾ ਕਹਿਣਾ ਸੀ ਕਿ ਅਮਰਿੰਦਰ ਸਿੰਘ ਨੂੰ ਤਾਂ ਮੁਲਾਜਮਾ ਦੀ ਹਾਅ ਲੱਗ ਗਈ ਹੈ। ਜੇਕਰ ਨਵੇਂ ਮੁੱਖ ਮੰਤਰੀ ਨੇ ਵੀ ਮੁਲਾਜ਼ਮਾਂ ਦੀਆਂ ਮੰਗਾਂ ਦੀ ਪੂਰਤੀ ਨਾ ਕੀਤੀ, ਤਾਂ ਉਸ ਦਾ ਹਸ਼ਰ ਵੀ ਇਹੋ ਹੀ ਹੋਵੇਗਾ ਅਤੇ ਸਮੁੱਚੀ ਸਰਕਾਰ ਨੂੰ ਹੀ ਇਸ ਦਾ ਖਮਿਆਜ਼ਾ ਭੁਗਤਣਾ ਪਵੇਗਾ।