ਖੇਤਰੀ ਪ੍ਰਤੀਨਿਧ
ਪਟਿਆਲਾ, 25 ਨਵੰਬਰ
ਪੰਜਾਬੀ ਯੂਨੀਵਰਸਿਟੀ ਵਿਖੇੇ ਵਾਰਿਸ ਸ਼ਾਹ ਦੀ ਤੀਜੀ ਜਨਮ ਸ਼ਤਾਬਦੀ ਨੂੰ ਸਮਰਪਿਤ ਜਾਰੀ ਜਸ਼ਨਾਂ ਦੇ ਚੌਥੇ ਦਿਨ ਪੰਜਾਬੀ ਭਾਸ਼ਾ ਅਤੇ ਪੰਜਾਬੀ ਫ਼ਿਲਮਾਂ ਬਾਰੇ ਨਿੱਗਰ ਸੰਵਾਦ ਰਚਾਇਆ ਗਿਆ। ਇਸ ਦੌਰਾਨ ‘ਮਰ ਰਹੀ ਹੈ ਮੇਰੀ ਭਾਸ਼ਾ ਬਨਾਮ ਜਿਉਂਦੀ ਰਹੇਗੀ ਮੇਰੀ ਭਾਸ਼ਾ’ ‘ਤੇ ਆਧਾਰਤ ਬੈਠਕ ਵਿੱਚ ਭਾਸ਼ਾ ਵਿਗਿਆਨੀ ਡਾ. ਬਲਦੇਵ ਸਿੰਘ ਚੀਮਾ ਨੇ ਕਿਹਾ ਕਿ ਭਾਸ਼ਾ ਇੱਕ ਵਹਿਣ ਹੈ ਤੇ ਸੰਭਵ ਤੌਰ ‘ਤੇ ਬਦਲਾਅ ਆਉਣੇ ਹੁੰਦੇ ਹੈ। ਸਾਨੂੰ ਭਾਸ਼ਾ ਵਿੱਚ ਆ ਰਹੇ ਸਾਰਥਕ ਬਦਲਾਵਾਂ ਨੂੰ ਹਾਂ ਮੁਖੀ ਹੁੰਗਾਰੇ ਵਜੋਂ ਹੀ ਲੈਣਾ ਚਾਹੀਦਾ ਹੈ। ਡਾ. ਸਿਕੰਦਰ ਸਿੰਘ ਨੇ ਕਿਹਾ ਕਿ ਬੋਲੀ ਦੇ ਵਹਿਣ ਦਾ ਮਤਲਬ ਇਹ ਨਹੀਂ ਕਿ ਅਸੀਂ ਵਹਿਣ ਵਿੱਚ ਵਹਿ ਜਾਈਏ। ਡਾ. ਰਾਜਵਿੰਦਰ ਢੀਂਡਸਾ ਦੀ ਦੇਖ-ਰੇਖ ਹੇਠਲੀ ਇੱਕ ਹੋਰ ਬੈਠਕ ‘ਚ ਐਜੂਕੇਸ਼ਨ ਵਿਭਾਗ ਦੇ ਡਾ. ਕੁਲਦੀਪ ਸਿੰਘ ਦਾ ਕਹਿਣਾ ਸੀ ਕਿ ਖੇਤਰੀ ਜ਼ੁਬਾਨਾਂ ਨੇ ਲਗਾਤਾਰ ਸੰਘਰਸ਼ ਕੀਤਾ ਹੈ। ਉਨ੍ਹਾਂ ਡਾਟਾ ਦੇ ਆਧਾਰ ਉੱਤੇ ਸਿੱਧ ਕੀਤਾ ਕਿ ਸ਼ਹਿਰੀਕਰਨ ਨੇ ਪੰਜਾਬੀ ਭਾਸ਼ਾ ਨੂੰ ਵੱਡਾ ਖੋਰਾ ਲਾਇਆ ਹੈ। ਛੇਵੀਂ ਬੈਠਕ ਵਿੱਚ ਵਾਰਤਕ ਲੇਖਕ ਡਾ. ਗੁਰਬਚਨ ਨਾਲ ਰੂ ਬ ਰੂ ਕੀਤਾ ਗਿਆ। ਇਸ ਬੈਠਕ ਦੀ ਅਗਵਾਈ ਪਬਲੀਕੇਸ਼ਨ ਬਿਊਰੋ ਦੇ ਇੰਚਾਰਜ ਪ੍ਰੋ. ਸੁਰਜੀਤ ਸਿੰਘ ਨੇ ਕੀਤੀ। ਡਾ. ਗੁਰਮੁਖ ਸਿੰਘ ਦੀ ਦੇਖਰੇਖ ਹੇਠਾਂ ‘ਪੰਜਾਬੀ ਸਿਨਮਾ: ਤੇਰੇ ਨੀ ਕਰਾਰਾਂ ਮੈਨੂੰ ਪੱਟਿਆ’ ਦੇ ਬੈਨਰ ਹੇਠਾਂ ਹੋਈ ਸੱਤਵੀਂ ਬੈਠਕ ਵਿਚ ਅਮਿਤੋਜ ਮਾਨ ਨੇ ਕਿਹਾ ਕਿ ਸਾਨੂੰ ਇਹ ਦੇਖਣਾ ਪਵੇਗਾ ਕਿ ਸਾਡੀ ਕਲਾ ਕਿੰਨੀ ਗੰਭੀਰ ਅਤੇ ਸਰਲ ਹੈ। ਜਦੋਂ ਸਾਡੇ ਦਰਸ਼ਕ ਨੂੰ ਅਣਕਿਹਾ ਵੀ ਸਮਝ ਆਉਣ ਲੱਗ ਪਿਆ, ਉਸ ਵਕਤ ਅਸੀਂ ਸਿਨੇਮੇ ਦੇ ਬਿਹਤਰ ਦੌਰ ਵਿੱਚ ਹੋਵਾਂਗੇ। ਅਮਰਦੀਪ ਗਿੱਲ ਨੇ ਫਿਲਮਾਂ ਦੇ ਨਵੇਂ ਸ਼ੋਸ਼ਲ ਮੀਡੀਆ ਪਲੇਟਫਾਰਮਾਂ ਬਾਰੇ ਗੱਲਬਾਤ ਕੀਤੀ।