ਪੱਤਰ ਪ੍ਰੇਰਕ
ਰਾਜਪੁਰਾ, 6 ਮਾਰਚ
ਇੱਥੋਂ ਦੀ ਆਦਰਸ਼ ਕਲੋਨੀ ਵਿੱਚ ਧਾਰਮਿਕ ਸਮਾਗਮ ਵਿੱਚ ਸ਼ਾਮਿਲ ਹੋਣ ਜਾ ਰਹੇ ਪਰਿਵਾਰ ਦੀਆਂ ਦੋ ਔਰਤਾਂ ਸਮੇਤ ਤਿੰਨ ਜੀਆਂ ਤੋਂ ਦੋ ਮੋਟਰਸਾਈਕਲ ਸਵਾਰ ਅਣਪਛਾਤੇ ਵਿਅਕਤੀ ਪਿਸਤੌਲ ਦਿਖਾ ਕੇ ਲੱਖਾਂ ਰੁਪਏ ਦੇ ਗਹਿਣੇ ਲੁੱਟ ਲੈ ਗਏ।
ਇਸ ਸਬੰਧੀ ਮਿਉਂਸਿਪਲ ਕੌਂਸਲਰ ਮਨਦੀਪ ਰਾਣਾ ਨੇ ਦੱਸਿਆ ਕਿ ਉਸ ਦਾ ਭਰਾ ਸਚਿਨ ਕੁਮਾਰ, ਮਾਤਾ ਅਤੇ ਤਾਈ ਕਾਰ ਵਿੱਚ ਟਾਊਨ ਦੀ ਆਦਰਸ਼ ਕਾਲੋਨੀ ਵਿੱਚ ਧਾਰਮਿਕ ਸਮਾਗਮ ਵਿੱਚ ਸ਼ਾਮਿਲ ਹੋਣ ਲਈ ਜਾ ਰਹੇ ਸਨ। ਜਦੋਂ ਇਹ ਧਾਰਮਿਕ ਸਮਾਗਮ ਵਾਲੀ ਥਾਂ ’ਤੇ ਆਪਣੀ ਕਾਰ ਵਿੱਚੋਂ ਉਤਰਨ ਲੱਗੇ ਤਾਂ ਮੋਟਰਸਾਈਕਲ ’ਤੇ ਆਏ ਦੋ ਅਣਪਛਾਤੇ ਵਿਅਕਤੀ ਜਿਨ੍ਹਾਂ ਨੇ ਸਿਰ ’ਤੇ ਹੈਲਮਟ ਪਹਿਨੇ ਹੋਏ ਸਨ ਅਤੇ ਮੂੰਹ ’ਤੇ ਮਾਸਕ ਅਤੇ ਐਨਕਾਂ ਲਗਾਈਆਂ ਹੋਈਆਂ ਸਨ, ਨੇ ਆਉਂਦੇ ਸਾਰ ਸਚਿਨ ਕੁਮਾਰ ਦੀ ਪੁੜਪੁੜੀ ’ਤੇ ਪਿਸਤੌਲ ਰੱਖਿਆ। ਸਚਿਨ ਸਮੇਤ ਰਾਣਾ ਦੀ ਮਾਤਾ ਤੇ ਤਾਈ ਦੇ ਸੋਨੇ ਦੇ ਗਹਿਣੇ ਜਿਨ੍ਹਾਂ ਵਿੱਚ ਸੋਨੇ ਦੀ ਚੇਨ, ਦੋ ਅੰਗੂਠੀਆਂ, ਦੋ ਕੜੇ, ਵਾਲੀਆਂ ਅਤੇ ਮੰਗਲ ਸੂਤਰ ਲੁੱਟ ਕੇ ਲੈ ਗਏ। ਇਸ ਸੰਬਧੀ ਪੁਲੀਸ ਨੂੰ ਸੂਚਿਤ ਕਰ ਦਿੱਤਾ ਗਿਆ ਹੈ। ਥਾਣਾ ਸਿਟੀ ਦੇ ਮੁਖੀ ਇੰਸਪੈਕਟਰ ਗੁਰਪ੍ਰਤਾਪ ਸਿੰਘ ਨੇ ਆਖਿਆ ਕਿ ਸਿਟੀ ਪੁਲੀਸ ਵੱਲੋਂ ਸਚਿਨ ਕੁਮਾਰ ਦੀ ਸ਼ਿਕਾਇਤ ’ਤੇ ਦੋ ਅਣਪਛਾਤੇ ਵਿਅਕਤੀਆਂ ਖ਼ਿਲਾਫ਼ ਕੇਸ ਦਰਜ ਕਰ ਲਿਆ ਗਿਆ ਹੈ।