ਖੇਤਰੀ ਪ੍ਰਤੀਨਿਧ
ਪਟਿਆਲਾ, 20 ਅਕਤੂਬਰ
ਸਥਾਨਕ ਸ਼ਹਿਰ ਵਿਚਲੀ ਇੱਕ ਡਰੇਨ ਨੂੰ ਪੱਕੇ ਅਤੇ ਕਈ ਥਾਵਾਂ ਤੋਂ ਢਕਣ ਦੇ ਚੱਲ ਰਹੇ ਕੰਮ ਦੌਰਾਨ ਸ਼ਹਿਰ ਵਿਚਲੇ ਇੱਕ ਇਲਾਕੇ ਵਿਚ ਇਸ ਡਰੇਨ ਦੇ ਨੇੜੇ ਬਣੇ ਤਿੰਨ ਘਰਾਂ ਦੀਆਂ ਕੰਧਾਂ ਨੁਕਸਾਨੀਆਂ ਗਈਆਂ। ਇਸ ਦੌਰਾਨ ਭਾਵੇਂ ਕਿਸੇ ਜਾਨੀ ਨੁਕਸਾਨ ਦੀ ਖਬਰ ਨਹੀਂ ਹੈ, ਪਰ ਇਨ੍ਹਾਂ ਘਰਾਂ ਦੇ ਮਾਲਕਾਂ ਦਾ ਵਿੱਤੀ ਨੁਕਸਾਨ ਜ਼ਰੂਰ ਹੋਇਆ ਹੈ ਜਿਸ ਲਈ ਉਨ੍ਹਾਂ ਵੱਲੋਂ ਡਰੇਨੇਜ ਵਿਭਾਗ ਦੀ ਆਲੋਚਨਾ ਕੀਤੀ ਜਾ ਰਹੀ ਹੈ।
ਅਜਿਹੇ ਹੀ ਇੱਕ ਮਕਾਨ ਦੇ ਮਾਲਕ ਜੈਕਬ ਦਾ ਕਹਿਣਾ ਸੀ ਕਿ ਇਸ ਦੌਰਾਨ ਉਨ੍ਹਾਂ ਦੇ ਮਕਾਨਾਂ ਦੀਆਂ ਨੀਂਹਾਂ ਦੇ ਬਿਲਕੁਲ ਨੇੜਿਉਂ ਵੀ ਮਿੱਟੀ ਕੱਢ ਦਿੱਤੀ ਗਈ ਜਿਸ ਕਾਰਨ ਉਨ੍ਹਾਂ ਦੇ ਘਰਾਂ ਦੀਆਂ ਕੰਧਾਂ ਢਹਿ ਗਈਆਂ। ਉਨ੍ਹਾਂ ਦਾ ਕਹਿਣਾ ਸੀ ਕਿ ਉਨ੍ਹਾਂ ਦੇ ਇਸ ਨੁਕਸਾਨ ਲਈ ਡਰੇਨੇਜ ਵਿਭਾਗ ਪੂਰੀ ਤਰ੍ਹਾਂ ਜ਼ਿੰਮੇਵਾਰ ਹੈ ਜਿਸ ਦੀ ਭਰਪਾਈ ਵੀ ਵਿਭਾਗ ਨੂੰ ਹੀ ਕਰਨੀ ਚਾਹੀਦੀ ਹੈ। ਉਧਰ ਇਸ ਸਬੰਧੀ ਜਦੋਂ ਡਰੇਨੇਜ ਵਿਭਾਗ ਦੇ ਇੱਕ ਅਧਿਕਾਰੀ ਰਾਘਵ ਗਰਗ ਨਾਲ਼ ਗੱਲ ਕੀਤੀ ਗਈ ਤਾਂ ਉਨ੍ਹਾਂ ਦਾ ਕਹਿਣਾ ਸੀ ਕਿ ਇਹ ਮਕਾਨ ਕਥਿਤ ਰੂਪ ਵਿਚ ਨਾਜਾਇਜ਼ ਢੰਗ ਨਾਲ਼ ਬਣੇ ਹੋਏ ਹਨ। ਇਸ ਸਬੰਧੀ ਸਬੰਧਤ ਮਾਲਕਾਂ ਨੂੰ ਬਾਕਾਇਦਾ ਨੋਟਿਸ ਵੀ ਕੱਢੇ ਹੋਏ ਹਨ। ਉਨ੍ਹਾਂ ਦਾ ਇਹ ਵੀ ਕਹਿਣਾ ਸੀ ਕਿ ਨਾਲ਼ੇ ਉਂਜ ਵੀ ਜਦੋਂ ਇਹ ਕੰਧਾਂ ਨੁਕਸਾਨੀਆਂ ਗਈਆਂ, ਉਸ ਵੇਲ਼ੇ ਡਰੇਨ ’ਤੇ ਕੰਮ ਨਹੀਂ ਸੀ ਚੱਲ ਰਿਹਾ।